E zia lê ti e lakue na ndo ti sarango adisciple

1. Nyen la a lingbi e sara ti tene azo asö fini ti ala?

¹ Rapport ti ngu ti kusala ti 2014 afa so awakua ti Jéhovah ayapu na kua nga ala leke na bê ti ala ti ngbâ ti fa nzoni tënë ti Royaume (Mat. 24:14). Na fango tënë da na da, na lege ti kapa ti kangbingo atract na ambeti ti tisango ndo, nga na lege ti fango tënë na ando so azo ayeke dä mingi, e yeke sara si mingi ti azo awara nzoni tënë ahon ti kozo. Ye oko, ti tene azo so asö fini ti ala, a lingbi e manda Bible na ala ti mû maboko na ala ti ga adisciple ti Jésus.—1 Tim. 2:4.

2. Ahundango tënë wa alingbi ti mû maboko na e ti duti nduru ti manda Bible na azo?

² Duti nduru ti manda Bible na azo: Tongana mbeni zo ayeda na tënë ni, eskê mo yeke sara kue ti mû adresse ti lo nga ti kiri hio ti sara vizite na lo na ti to nda ti étude? Lawa la mo tara ti sara étude na mbeni zo na kozo gango ti mo? Lawa la mo hunda ti manda Bible na azo so mo yeke zia ka apériodique na ala? Eskê mo yeke fa vidéo Ndani nyen ti manda Bible? wala vidéo E yeke manda Bible na azo tongana nyen? na amba ti mo ti place ti kua, akamarade ti mo ti ekole, avoizin ti mo, afami ti mo, nga na ambeni zo so mo hinga ala? Tongana mo yeke fa tënë na table wala poussette, sara kue ti fa na azo so amû mbeni mbeti so e yeke sara na étude na azo, so nda ti mbeti ni ayeke ti manda na Bible na zo.

3. Ti tene e fa ye na azo nzoni, e yeke na bezoin ti nyen?

³ Mungo maboko so alondo na Jéhovah nga na Jésus: Commandement ti Jésus so atene ‘ala sara si azo aga adisciple’ ato nda ni na tënë “ala gue”, a ye ti fa so a lingbi e sara ngangu ti gue na mbage ti azo ni. Ye oko, lo zia e gi tongaso ape me lo mû zendo so lo yeke lakue na tere ti e (Mat. 28:19, 20). Na ndo ni, Jéhovah amû na e yingo vulu ti lo, aye ti kua ni nga na afango ye so e yeke na bezoin ni ti fa tâ tënë na azo (Zach. 4:6; 2 aCor. 4:7). E lingbi ti sambela ti duti na “nzara ti sara ye” nga ti sara ye ni na mungo mbage na kota kua so.—aPhil. 2:13.

4. Ngbanga ti nyen a lingbi e zia lê ti e lakue na ndo ti sarango adisciple?

⁴ Ti fa nzoni tënë na azo ayeke ga na e ngia mingi. Ye oko, a yeke nzere na e mingi tongana e fa na mbeni zo tâ tënë nga e mû maboko na lo ti ga na tere ti e si e tambela na ndo ti “lege so ague na fini”. (Mat. 7:14; 1 aThes. 2:19, 20). Mingi ahon so, tongana e zia lê ti e angbâ gi na ndo ti sarango adisciple, e yeke zia ngia na bê ti Jéhovah lo so ‘aye si zo oko akui pëpe, me lo ye si azo kue achangé bê ti ala.’—2 Pi. 3:9.