E gi lakue ti manda Bible na azo
1. Ti sara ye alingbi na yanga so Jésus amû na Matthieu 28:19, 20 ahunda nyen?
1 Jésus amû yanga na e ti ‘sara si azo aga adisciple na ti fa ye na ala’. (Mat. 28:19, 20). Ni la e ye si na ngoi kue e gi ti manda Bible na azo, pëpe gi na lango oko ti nda-yenga so a zia ni nde ti hunda na azo ti manda Bible na ala. Awango so ge alingbi ti mû maboko.
2. E lingbi ti hunda na azo wa ti manda Bible na ala?
2 Hunda na azo ni wala ala ye ti manda Bible: Tongana e yeke hunda mingi na azo ti manda Bible, lege ayeke zi nga na e mingi ti wara mbeni étude (Zo-ti. 11:6). Mo tara awe ti hunda droit na zo ni ti manda Bible na lo? Aita ti mbeni congrégation na Amerika amä tere ti sara tongaso na yâ ti nze oko. So ngia si ala wara ti to nda ti a-étude 42! Pensé pëpe so azo so mo si na yanga-da ti ala ahinga so mo ye ti manda Bible na ala. Tongana mo kiri ti peko, mo lingbi ti hunda na ala wala ala ye ti manda Bible? Tongana ala ke, a sara ye pëpe. Mo lingbi lakue ti ga ti bâ ala. Mo hunda na avoizin ti mo awe wala ala ye ti manda Bible? A lingbi ti duti nga afami ti mo, azo so mo na ala asara kua place oko wala akamarade ti ekole. Mo lingbi ti hunda nga na azo so mo yeke manda Bible na ala ti fa wala akamarade ti ala wala afami aye ti manda Bible nga.
3. Ye ti kua wa alingbi ti mû maboko na e ti to nda ti a-étude, na e lingbi ti sara kusala na ni na ngoi wa?
3 Tâ ye ti kua ni: Tract Mo ye ti hinga tâ tënë? ayeke mû maboko mingi ti to nda ti a-étude. Mo lingbi ti mû ni na azo atâa ala yeda na ambeni mbeti wala pëpe. Mo lingbi ti sara nga kusala na ni na ngoi so mo yeke fa tënë na ando ti dengo buze, na ndo ti lege, na ngoi so mo yeke tokua lettre nga na ngoi so mo kiri ti bâ azo so mo bâ ala kozo awe. Mo lingbi ti zia nga ni na ada so mo wara zo dä pëpe. Na ndembe so mo yeke na yâ ti taxi wala bus, wala na ngoi so mo yeke vo ye wala mo yeke na place ti kua, mo lingbi ti duti na mbeti so na tere ti mo? Ndangba lembeti ni afa na nduru tënë tongana nyen e yeke manda ka Bible na azo nga asara tënë na ndo ti buku Bible afa.
4. Tongana nyen e lingbi ti sara kusala na tract Mo ye ti hinga tâ tënë? ti to nda ti mbeni étude?
4 Na peko ti so mo mû tract ni na zo ni awe, mo lingbi ti fa na lo ahundango ndo so ayeke na ndo ti mbeti ni na ti hunda lo, “Na popo ti ahundango ndo so, so wa la agbu bê ti mo mingi?” Na pekoni, mo na lo kue ala bâ kiringo tënë ni so ayeke na yâ ti tract ni. Ala diko tënë so ayeke na ndangba lembeti ni so asara tënë na ndo ti étude ni, wala fa gi peko ti tënë ni. Na pekoni, mo lingbi ti fa na lo buku Bible afa nga ndo so lo lingbi ti wara asango na ndo ti tënë ni so mingi. Mû na lo buku ni nga mä tere na lo ti kiri ti bâ lo si lisoro ni angbâ ti gue.
5. A yeke nzoni e gi lakue ti manda Bible na azo ngbanga ti nyen?
5 Gbâ ti azo angbâ na yâ ti territoire ti e so aye ti hinga ye mingi na ndo ti ye so Bible afa biani. Tongana e yeke gi lakue ti manda Bible na azo, e yeke wara nga pasa mingi ti mû maboko na azo ti tambela na ndo ti lege so ague na fini, na ye so ayeke mû ngia na e mingi.—Mat. 7:13, 14.