E Wara Mbeni Fini Gbakuru ti To Nda ti Amandango Ye!
1 Mbeni wali ti kodoro ti Amerika amû bê ti lo kue na Église Catholique ti Rome. Lo bata, na dutingo be-ta-zo, afango ye ti église ti lo. Lo sala même mbeni tambela ti vorongo na Vatican. Na tongana mbeni oko ti aTémoin ti Jéhovah asi na yanga da ti lo, lo yeda ti manda Bible na da. Ngbanga ti nyen? Ngbanga ti so lo ye ti manda ye so Mbeti ti Nzapa atene nga église ti lo ahunda na lo pëpe ti manda Bible na da. Ye so asi aye ti fa nyen na e? So e hinga lâ oko pëpe zo wa ayeke yeda peut-être na mandango Bible so a sala ni senge senge.—Zo-ti. 11:6.
2 Mo yeke gi bê mbeni lâ awe ti tene na azo so e yeke na nzala ti manda Bible na azo kue so tënë ni anzere na ala? Azo oko oko kue ti vaka ti mo ahinga so e yeke sala kusala so senge senge? Tongana nyen e lingbi ti hinga biani so ala hinga ni? Na salango kusala na mbeni fini gbakuru! A yeke mbeni tract so agboto lê, ti alembeti omene so iri ni ayeke Mo Ye ti Hinga Ye Mingi Ahon na ndo Bible? Zia e gi ti hinga tract so na bango akete li ti tënë ni oko na oko.
3 “Ngbanga ti Nyen ti Diko Bible?” Anda ti tënë so tract ni amû ayeke gboto lê mingi. Lo fa so a lingbi ti wara na yâ ti Bible “wango-tene so Nzapa amû na ndoye,” na fango tongana nyen ti ga ndulu na Lo na lege ti sambela ti wara mungo maboko, nga tongana nyen ti wara matabisi ti lo ti fini ti lakue lakue. (1 aThes. 2:13) Tract ni andu ‘atâ tënë nde nde ti Bible so azi lê ti zo,’ tongana, ye nyen asi na peko ti so e kui, na ngbanga ti nyen akpale ayeke mingi na ndo sese. Lo sala tënë ti “akpengba-ndia ti Nzapa na yâ ti Bible” so tongana e sala kusala na ni a yeke ga na anzoni ye na lege ti mitele nga a sala si ngia, beku, na ambeni pendere lengo amaï. Tract ni andu mbeni nda ti tënë oko ti diko Bible: aprophétie so andu gigi ti kekereke so afa ye so ayeke ku e na yâ ngoi kete.—Apoc. 21:3, 4.
4 “Maboko na yâ Gbungo Nda ti Bible”: Tract ni atene: “E kue e yeke na bezoin ti wara maboko ti gbu nda ti Tënë ti Nzapa.” Na pekoni lo sala tënë ti kode ti e ti mandango Bible: “Mingi ni, a yeke nzoni ti manda Bible yeke yeke, na tongo nda ni na akozo gere ti fango ye.” Na ngoi so lo fa polele so “Bible ayeke lingu ti tâ hingango ye,” tract ni asala mbilimbili tënë ti brochure Ahunda tongana mbeni ye so ayeke mû maboko ande na wamandango ye ti “gbu nda ti aversê ti Tënë ti Nzapa so a fa na ndo atënë nde nde.” Kete li ti tënë ti peko ahunda mbeni tënë so agboto lê.
5 “Mo Yeke Ndulu ti Mû Ngoi Yenga Oko Oko ti Gbu Nda ti Bible?” Tract ni atene so a lingbi ti leke mandango Bible na mbeni ngoi nga na ndo so ayeke nzoni teti wamandango ye ni, na ndo ti lo mveni, wala même na singa-me. Azo wa alingbi ti mû mbage na yâ lisoro ni? Tract ni akiri tënë: “Sewa ti mo kue. Akamarade kue so mo soro ti tisa alingbi nga ti mû mbage dä. Wala tongana mo ye, a lingbi ti sala lisoro ni gi na mo oko.” A lingbi a manda Bible ni teti ngoi oke? Tract ni atene: “Azo mingi azia nde ngbonga oko na yâ yenga oko oko ti manda Bible. Atâa mo lingbi ti mû ngoi mingi ahon so wala mo yeke na ngoi gi kete yenga oko oko, fade aTémoin ayeke duti ndulu ti mû maboko na mo.” Bâ kota tënë ni la! E yeke na nzala ti leke ye ti lingbi na adutingo ti wamandango Bible oko oko.
6 “Mbeni Tisango Ndo ti Manda Ye”: A zia mbeni ndo teti zo so awara tract ni ti sû mbeti dä ti hunda brochure Ahunda wala mbeni vizite ti fa kapa ti e ti manda Bible na da senge senge. A fa kozo lembeti ti brochure Ahunda na nzoroko. Mo lingbi ti bâ ngbanga ti nyen tract so ayeke wa ande azo ti bê ti mbilimbili mingi ti yeda na mungo maboko ti e? Fadeso, tongana nyen e lingbi ti sala nzoni kusala na fini gbakuru so?
7 Mo Lingbi ti Mû Tract ni na Zo Wa? A lingbi ti zia tract ni na zo ni mveni wala ti zia na azo so ayeke na yanga da ti ala pëpe. Alingbi ti kangbi ni da na da, na lege, nga na yâ territoire ti dengo buze. Mû ni na azo atâa ala yeda na ambeti ti e wala ala ke ni. Zia ni na yâ apériodique wala ambeti so mo kangbi. Yôro ni na yâ ti alettre so mo yeke sû. Zia ni na yâ mbeti so mo yeke tokua ni na azo so mo wara tele na ala na singa-me. Duti lakue na atract ni na tele ti mo ti kangbi ni tongana mo yeke gue ti vo aye, tongana mo yeke na yâ akutukutu ti yongo azo, nga tongana mo yeke fa tënë na lege kue so azi. Mû ni na mbeni zo so aga na yanga da ti mo. Mû ni na asongo ti mo, azo ti tele ti da ti mo, akamarade ti ndo ti kusala, akamarade ti ekole, nga ambeni zo so mo hinga ala. Sala ngangu ti zia tract so na maboko ti azo kue so mo tingbi na ala! Na a lingbi a sala nyen na pekoni?
8 Tongana Kiringo Tënë Ayeke Fade Fade: Ambeni zo ayeke kiri tënë fade fade na tenengo so ala ye ti wara mbeni mandango Bible. Ni la, na angoi kue so mo yeke na fango tënë, a lingbi mo duti lakue na brochure Ahunda use: oko ti wamandango ye ni nga oko ti mo mveni. Tongana mbeni zo ayeke na nzala ti manda ye, to nda ti mandango ye ni fade fade. Zi na kozo lembeti, na diko “Lege ti Sala Kusala na Brochure so.” Na pekoni gue na ye ti manda 1, nga fa tongana nyen ti manda ni. Ye so ayeke ngangu pëpe.
9 Tongana Wamango Mo Ahunda Ngoi ti Gbu Li na ndo Ni: Sala ngangu ti kiri ti wara tele na lo kozoni si ngoi ahon mingi. A lingbi mo yeke na brochure Ahunda na tele ti mo tongana mo gue ti bâ lo. Fa na lo ali ti atënë so ayeke na ndo use lembeti ti brochure ni. Zia lo soro kota tënë so lo bâ anzere na lo mingi ahon. Zi brochure ni dä, nga to nda ti lisoro ni na ndo ye ti manda so lo soro.
10 Na Pekoni So A Zia Apériodique: Tongana mo zia tract ni legeoko na apériodique, mo lingbi ti kiri ti sala tënë so: “Na ndangba ngoi so mbi si na mo, mbi yeke lani na ngia ti zia na mo mbeni Tour ti Ba Ndo. Mo bâ peut-être so kota li ti tënë ti mbeti ni ayeke Tour ti Ba Ndo Afa Tene ti Royaume ti Jéhovah. Laso, mbi ye ti fa nda ti Royaume so na mo nga aye ti tene ande nyen teti mo na sewa ti mo.” Na pekoni, zi brochure Ahunda na ye ti manda 6. Na tongo nda ni na kozo paragraphe, diko ni na sala lisoro na zo ni tongana lo yeke na ngoi. Na pekoni, mä tele na lo ti kiri mbeni lâ na ti hunzi ye ti manda ni.
11 Zia si Atract ni Amanke Pëpe: Surveillant ti kusala na aita so abâ lege ti ambeti aye ande ti bata mbeni kota wungo ti tract Hinga Bible na angoi kue na yâ kongregation. Zia ambeni na yâ ti bozo ti bongo wala na yâ kotoko, na yâ kutukutu ti mo, na ndo ti kusala ti mo, na ekole, ndulu na lindango na yanga da ti mo, ndo so zo alingbi ti wara ni hio. Nga, mû ambeni na yâ bozo ti mo ti fango tënë teti angoi so mo yeke tingbi na mbeni zo so mo lingbi ti sala lisoro na lo na ndo ti Bible.
12 Zia Jéhovah Adeba Nzoni na ndo Ngangu So E Sala: Mbeni pendere ye so aChrétien kue agi ayeke ti fa tâ tënë na mbeni zo nde. (Mat. 28:19, 20) Mo yeke mû li ni na yâ mandango Bible na da na ngoi so? Tongana mo yeke sala ni, mo lingbi ti wara ngoi teti mbeni zo nde na yâ kapa ti mo ti yenga oko oko? Tongana mo yeke na mbeni zo ti manda Bible na lo fadeso pëpe, mo ye biani ti wara ni. Sambela Jéhovah ti tene lo deba nzoni na ndo angangu so mo yeke sala ti wara mbeni zo so mo lingbi ti manda Bible na lo. Na pekoni, sala ye alingbi na asambela ti mo.—1 Jean 5:14, 15.
13 E yeke na fini gbakuru ti to nda ti amandango ye! Zia e hinga ni nzoni. Zia e kangbi ni senge. Sala ngangu kue ti ‘sala nzoni, ti duti na anzo kusala mingi; ti mû ye mingi na azo nga ti duti ndulu ti kangbi na azo’ ye so mo manda na ndo Tënë ti Nzapa.—1 Tim. 6:18.
[Encadré na lembeti 7]
ALEGE SO AZI TI KANGBI TRACT NI
◼ Alisoro ti lâ oko oko
◼ Tongana mbeni zo ayeda na ambeti ti e
◼ Tongana zo oko ayeke na yanga da pëpe
◼ Tongana e yeke sala afini vizite
◼ Tongana e tingbi na mbeni zo na ngoi ti fango tënë na lege
◼ Tongana e yeke fa tënë na yâ territoire ti dengo buze
◼ Tongana e yeke fa tënë na lege kue so azi
◼ Tongana e yeke sû alettre
◼ Tongana e yeke na yâ akutukutu ti yongo azo
◼ Tongana mbeni zo aga na yanga da ti e
◼ Tongana e yeke sala tënë na asongo ti e, azo ti tele ti da ti e, akamarade ti e ti ndo ti kusala, ti ekole, nga ambeni zo so e hinga ala