E Sala Kusala na Atract ti To Nda ti Ambeni Lisoro
1 A yeke tâ tene pepe so mingi ni, nzoni lengo ti fango tene ti e ayeke ga teti so e yeke mu li ni ti to nda ti ambeni lisoro? Kpale ni ayeke ti sala mbeni tene so azingo nzala ti wamango e ni na a ga na lo ti sala tene. Tongana nyen ti sala tongaso?
2 Awafango tene mingi aba so, na lege ti ambeni tene so asoro ni nzoni, a lingbi ti to nda ti mbeni lisoro na fango mbeni oko ti atract ti e so aluti na ndo Bible. Akota li ti tene ni ayeke gbu bê na afoto so ayeke na nzoroko agboto lê. Atract akpa pepe mbeni ye so dikongo ni amu angoi mingi ahon ndo ni. Me so a kanga lege pepe ti tene andulu tokua so ayeke na yâ ni agboto lê na ti tene a to nda ti mbeni mandango Bible na lege ti ala.
3 Ba bibe ti mbeni Témoin: “Na yâ sese so aye ti salango ni ahon ndo ni, azo so ayeda ti mu ngoi ti diko ye ayeke mingi pepe. Me yongo ti tene ti yâ ti atract so alingbi na ni ti duti na mbeni kpengba tokua, na a yeke ndulu alingbi na ni ti sala si zo ake ni pepe gi na bango ni. Mbi diko atract mingi . . . , na ayeke tongaso si mbi hinga tâ tene.” E ba lâ oko pepe tongana kete ye ngangu ti Tene ti Nzapa so a fa pekoni na yâ andulu tokua so apika ni na masini.—aHéb. 4:12.
4 Kapa osio so akpengba pepe: Mingi a wara anzoni lengo na salango ye na mbeni lege so akpengba pepe. (1) E fa atract mingi na mbeni zo na e hunda na lo so wa si anzere na lo. (2) Tongana zo ni asoro mbeni oko na popo ni, e hunda na lo mbeni hundango tene so a leke nzoni na so afa mbeni oko ti akota mbage ti tene so asigigi na yâ tract ni. (3) Ti kiri tene na hundango tene so, e diko na yâ tract ni mbeni paragraphe wala mbeni versê so alingbi. (4) Tongana zo ni ayeda, e gue na li ni na bango atene ti yâ ti tract ni, wala e gue na mbeni ye ti manda ti brochure Ahunda wala nga mbeni chapitre ti buku Hingango Ye, so ayeke fa nda ti ye mingi ahon. Peut-être fade e yeke to nda ti mbeni mandango Bible hio na lege so. Awango so ayeke ga na peko ayeke mu maboko ande na e ti leke ambeni lisoro na lege ti atract osio:
5 Li ti tene ti tract “Zo Wa Akomande Biani Sese?” ayeke mbeni hundango tene so alingbi ti sala na kusala.
◼ Tongana wamango e akiri tene “Nzapa” wala “Mbi hinga pepe,” e diko akozo tene use ti lembeti 2 na kozo paragraphe ti lembeti 3. E fa 1 Jean 5:19 na Apocalypse 12:9. Wala zo ni adë kite wala pepe so Satan ayeke, wala lo hinga wala pepe so lo gbu sese na gbe ti ngangu ti lo, e lingbi ti pusu lisoro ni na li ni na lege ti tene so afa na li ti tene “Lingu ti aye so asi na ndo lê sese.” Tongana lo sala nzala ti tene ni, e hunda na lo ti fa na lo, na lege ti alembeti 3 na 4 ti tract ni, ndo so Diable alondo dä.
6 Tract “Beku Wa Ayeke Dä Teti Azo ti E so Akui Awe?” ayeke zingo nzala ti tene polele. E lingbi ti to nda ti mbeni lisoro na hundango:
◼ “Mo bi bê so e lingbi ande ti kiri ti ba mbeni lâ azo so e ndoye ala na so akui awe?” Na peko ti so wamango e ni akiri tene, e ba use paragraphe ti lembeti 4 na e diko Jean 5:28, 29. Na pekoni, e fa so versê ni ayeke mu maboko ti hinga ye so afa ni na gbe ti kozo li ti tene ti tract ni. E hunda ti sala lisoro na ndo ni.
7 Tract “Sewa so Ayeke na Ngia” andu asewa ti sese kue. E lingbi ti tene:
◼ “Mo hinga biani so sewa ayeke na yâ akpale mingi laso. Na lê ti mo, ye nyen alingbi ti sala ti kpengba asongo ti sewa?” Tongana zo ni akiri tene awe, e gboto lê ti lo na ndo atene so ayeke na yâ ti kozo paragraphe ti lembeti 6. E mu mbeni oko ti aversê so amu ni na alembeti 4 na 5 ti tract na e fa nda ni. Na pekoni, e hunda ti manda Bible senge na lo na da.
8 A lingbi ti sala kusala na tract “Pourquoi avoir confiance en la Bible” na fango ye tongaso:
◼ “Mingi ti azo amä tene ti mbaï ti Caïn na Abel, so a wara ni na kozo buku ti Bible. Tene ti Genèse asala nga tene ti wali ti Caïn. Mo hunda tele ti mo awe na ndo so lo londo dä?” E kiri tene na lege ti ndangba paragraphe ti lembeti 2. E fa so tract ni asala tene nga na ndo akpengba fango ye ti Bbile na ndo kekereke. E gue na li ni na yâ lisoro ni a to nda ni na paragraphe 3 ti lembeti 5, na salango kusala na aversê ni.
9 Kangbingo atract na ndo Bible ayeke mbeni lege ti fa nzo tene so ayeke sala kusala nzoni mingi. Teti a yeke ngangu pepe ti hon na ala na ndo kue, atract ayeke sala kusala nzoni mingi na yâ fango tene da na da nga na yâ fango tene na ngoi so aku pepe. Ala yeke sala kota kusala na yâ fango tene ti e. E ba nzoni ti mu amara ni nde nde na ti sala kusala na ni mingi ti to nda ti alisoro.—aCol. 4:17.