Afini tract so a sara ni na mbeni lege so ayeke nde!
1. Afini pendere ye wa a sigigi na ni ndali ti fango tënë?
1 Na ngoi ti Kota Bungbi ti District ti ngu 2013 “Tënë ti Nzapa ayeke tâ tënë”, a sigigi na afini tract oku. Nga, a zia na ndo ti atract oku so tract Sango ti Royaume No. 38 so li ni ayeke “A yeke zingo ande biani azo so akui awe?” so a sigigi na ni kozo awe. A sara afini tract omene so na mbeni lege so ayeke nde. A sara ni tongaso ngbanga ti nyen? Nga tongana nyen e lingbi ti sara kusala nzoni na afini tract so na ngoi so e yeke fa tënë da na da?
2. Ngbanga ti nyen a sara afini tract so na mbeni lege so ayeke nde?
2 Ndani so afini tract so ayeke ti ala nde: Ti fa tënë da na da nzoni ahunda ti sara aye osio so: (1) Hunda mbeni tënë so apusu zo ti fa bango ndo ti lo. (2) Fa ye so Bible atene na ndo ni. (3) Mû mbeti na zo ni ti tene lo diko. (4) Hunda mbeni tënë so mo yeke kiri ti sara lisoro na ndo ni na gango ti mo ti peko, nga fa lango so mo yeke kiri ti bâ lo. Afini tract so ayeke mû maboko na e ti sara aye osio so kue.
3. Fa tongana nyen e lingbi ti sara kua na afini tract so na fango tënë.
3 Lege ti sara kua na ni: (1) Na peko ti so mo bara zo ni awe, fa na lo ahundango tënë ota so ayeke na gbe ti kota li ti tënë ni, nga hunda bango ndo ti lo na ndo ni. (2) Zi yâ ti tract ni, na fa na lo mbage so atene “Ye so Bible atene.” Diko versê ni na yâ ti Bible tongana lege ayeke dä. Tongana zo ni ayeke na ngoi, sara nga lisoro na lo na mbage so atene “Tënë so abâ mo tongana nyen?” (3) Mû na lo tract ni, na wa lo ti diko tanga ti atënë ni na ngoi kue so bê ti lo aye. (4) Kozo si mo zia lo, fa na lo hundango ndo so ayeke na peko ti tract ni, na gbe ti li ti tënë “Bâ tënë so” na leke ti kiri ti sara lisoro na ndo ti kiringo tënë ti Bible na ndo ni.
4. Tongana nyen la e lingbi ti sara kua na afini tract so na ngoi so e kiri ti sara vizite na mbeni zo?
4 Ti sara kua na afini tract so na ngoi so e kiri ti sara vizite na mbeni zo akpengba pëpe. Diko aversê so ayeke na peko ti tract ni ti kiri tënë na hundango tënë so mo hunda lani na zo ni na hunzingo ti lisoro ti ala. Kozo si mo zia zo ni, fa na lo foto ti brochure Nzoni tënë so ayeke na peko ti tract ni. Na pekoni fa na lo brochure ni, na gue na lo na ye ti manda so lo lingbi ti wara atënë mingi na ndo ti tënë ni so nga mû na lo brochure ni. Tongana lo yeda ti mû brochure ni, leke ti sara lisoro na ndo ni na vizite ti peko. Mo komanse mbeni étude awe la! Wala ahon ti zia na lo brochure ni, mo lingbi ti zia mbeni tract ni nde nga ti kiri ti sara lisoro na ndo ni na zo ni.
5. Atract amû maboko na e tongana nyen?
5 A sara angu 130 awe la e yeke fa tënë na atract. Atâa so konongo ni nga na lege so a sara na ni achangé na ambeni ngoi, atract amû maboko na e lakue ti fa tënë nzoni. Zia e sara kua na afini tract so nzoni ti ngbâ ti fa hingango ye ti Bible na yâ ti dunia kue.—aProv. 15:7a.