Sara kusala na atract ti tene nzoni tënë amû ndo
1 A sara angu mingi awe la awakua ti Jéhovah ayeke sara kusala na atract ti tene nzoni tënë amû ndo. Na ngu 1880, C. T. Russell na amba ti lo ato nda ti sigigi lani na Tracts des Étudiants de la Bible, na a mû atract so na awadikongo Tour ti Ba Ndo ti tene ala kangbi ni na azo. Atract ayeke lani kota ye mingi, ni la si na ngu 1884 na ngoi so C. T. Russell ahunda ti tene ndia ti kodoro ayeda na bungbi so ndani ayeke ti sara si kua ti Royaume ague na li ni, mbupa “tract” ayeke lani na yâ ti iri, Zion’s Watch Tower Tract Society, so fadeso a iri ni Watch Tower Bible and Tract Society of Pennsylvania. Na ngu 1918, aWamandango Bible akangbi atract ahon kutu 300. Atract angbâ lakue mbeni nzoni gbakuru ti fango na tënë.
2 Ndani so a yeke sara kua nzoni: Afoto ayeke na lê ni nga ayeke gboto lê ti zo hio. Atënë ti yâ ni ayeke nduru na andu bê ti zo nga afa ye na zo. A yeke gboto lê ti azo so peut-être asara mbeto ti périodique wala ti mbeni buku. A yeke ngangu pëpe na afini wafango tënë nga na amolenge ti fa na tënë. Na ndo ni, atract akono ape nga ane ape.
3 Azo mingi ato nda ti manda tâ tënë na lege ti tract. Na tapande, mbeni wali na kodoro ti Haïti abâ mbeni tract ti e na ndo ti lege. Lo mû ni, lo diko ni, na nzerengo tere lo tene: “Mbi wara tâ tënë awe!” Na pekoni, lo gue na Da ti Royaume, lo to nda ti manda Bible, na lo wara batême; a yeke grâce na ngangu ti tënë ti Nzapa so lo wara na yâ ti mbeni tract.
4 Na da na da: Teti so atract ayeke nzoni gbakuru ti fango na tënë, ti to nda ni na nze ti novembre, e yeke fa tënë na ni na yâ ti ambeni nze. Ye so e zia na gbele ti e ayeke gi pëpe ti mû atract na azo, me e ye ti sara kusala na ni ti to nda ti lisoro. Tongana zo ni asara nzara ti tënë ni na kozo tingbingo na lo wala na ngoi so e sara vizite na lo, e lingbi ti sara kusala na buku Bible afa wala na mbeni mbeti ti e so e yeke sara na a-étude ti fa na lo tongana nyen e yeke manda Bible. E lingbi ti fa tënë na atract na da na da tongana nyen? Tract oko oko ayeke nde nde, tongaso ati so e yeke fa na tënë a lingbi e hinga ni nzoni si.
5 A lingbi tënë so e yeke tene alingbi na azo ti territoire ni nga ague oko na tract so e yeke sara kua na ni. E lingbi ti to nda ti lisoro na zo ni na ngoi so e yeke mû na lo tract ni. Tënë wala foto so ayeke na ndo ni alingbi ti pusu zo ni ti sara nzara ti tënë ni. Wala e lingbi ti fa na zo ni atract nde nde na e zia lo ti soro so anzere na lo. Tongana zo ni aye pëpe ti sara lisoro na e, e lingbi ti mû na lo tract ni na mbeni lege so lo lingbi ti bâ ye so ayeke na ndo ni, wala e lingbi ti hunda mbeni tënë so alingbi ti pusu lo ti fa tënë ti bê ti lo. Tongana li ti tënë ti tract ni ayeke mbeni hundango tënë, e lingbi ti hunda lo ti fa bango ndo ti lo na ndo ni. Wala e lingbi ti leke mbeni hundango tënë so alingbi ti zingo nzara ti zo ni nga ti pusu lo ti sara lisoro. E lingbi ti diko mbeni mbage ti tract ni na zo ni, e luti kete na place ti ahundango tënë na e hunda lo ti fa pensé ti lo. E lingbi ti diko aversê so tënë ni aluti na ndo ni. Na pekoni so e sara lisoro awe na ndo ti mbeni tënë ti yâ ti tract ni, e lingbi ti hunzi lisoro ni nga ti mä tere na zo ni ndali ti vizite ti peko. Tongana congrégation ti e ayeke zia ka mbeti na azo so a wara ala na yanga-da pëpe, e lingbi ti zia mbeni tract na gbe ti porte tongana azo ti da ni ayeke dä pëpe.
6 Fango tënë na lege: Mo yeke fa ka tënë na ndo ti lege na atract? Ambeni zo so ahon na lege ayeke pressé na ala ye ti luti pëpe ti sara lisoro na e. A lingbi ti duti ngangu ti hinga wala ala sara nzara ti tënë ni. Ahon ti mû na ala afini périodique sân ti hinga wala ala yeke gue ti diko ni, a yeke nzoni ti mû na ala mbeni tract. Teti so foto wala tënë so ayeke na ndo ni ayeke gboto lê ti zo nga atënë ni ayeke gi nduru, azo alingbi ti sara nzara ti diko tract tongana ala yeke na ngoi kete. Me tongana zo ni ayeke pressé pëpe, e lingbi ti sara lisoro na lo na ndo ti ambeni tënë ti yâ ti tract ni.
7 Fango tënë na alege kue so azi: A yeke ngangu pëpe ti fa tënë na atract na alege kue so azi. Mbeni ita-koli ayeke zia ka kete wungo ni na yâ ti bozo ti lo na ngoi kue so lo yeke hon. Na ngoi so lo tingbi na mbeni zo, tongana a yeke zo ti kango ye na yâ ti magazin, lo tene na zo ni so ni ye ti mû na lo mbeni ye ti dikongo ni na lo mû tract na zo ni. Na ngoi so mbeni ita-koli na wali ti lo ague na New York City ti bâ ndo, ala hinga so kâ ala yeke tingbi na azo so alondo na akodoro nde nde. Tongaso ala mû na tere ti ala brochure Une bonne nouvelle nga na gbâ ti atract na ayanga ti kodoro nde nde. Na pekoni so ala si kâ, tongana ala mä mbeni zo ti kango ye na tere ti lege wala mbeni zo so aduti na tere ti ala na yâ ti parc wala na yâ ti restaurant so atene mbeni yanga ti kodoro nde, ala mû na lo tract na yanga ti kodoro ti lo.
8 “Lu le-kobe ti mo”: A lingbi ti haka atract na lê ti kobe. Mbeni zo ti fango yaka ayeke tuku alê ti kobe ti lo kirikiri ngbanga ti so lo hinga pëpe so wa la ayeke sigigi nga ayeke maï. Zo-ti-fa-tene 11:6 atene: “Na ndapre mo lu le-kobe ti mo, na lakui mo duti senge pëpe, teti mo hinga pëpe fade ye so aga nzoni, tongana a yeke so ge wala so kâ, wala ala use kue aga nzoni.” Ni la, zia e sara kusala na nzoni gbakuru so ti sara si “hingango ye awu”.—aProv. 15:7.
[Ahundango tënë ti manda na ye]
1. Tongana nyen la azo ti Nzapa asara kua na atract?
2. Ngbanga ti nyen atract ayeke nzoni gbakuru ti kua?
3. Fa mbeni ye so asi na mo wala so a fa na yâ ti ambeti ti e so afa so atract ayeke kota ye mingi.
4. Nyen la e zia na gbele ti e na ngoi so e yeke fa tënë na atract?
5. Tongana nyen la e lingbi ti fa tënë da na da na atract?
6. Tongana nyen la e lingbi ti fa tënë na atract na lege?
7. Fa ambeni ye so asi so afa tongana nyen ti sara kusala na atract ti fa tënë na alege kue so azi.
8. Na lege wa atract ayeke tongana lê ti kobe?
[Kete tënë na lembeti 3]
Teti so atract ayeke nzoni gbakuru ti fango na tënë, ti to nda ni na nze ti novembre, e yeke fa tënë na ni na yâ ti ambeni nze