Salango kusala na atract ti wara aye ti nzoni na pekoni

¹ Bungbi ti Jéhovah ti laso ayeke na mbeni mbaï ti salango kusala nzoni na atract. Tâ iri so ndia ahinga na bungbi ti e, Watch Tower Bible and Tract Society, aye ti fa so atract ayeke sala mbeni kpengba kusala na yâ kangbingo nzo tënë. Ti londo na ngu 1881 ti si na ngu 1918, awakua ti Jéhovah akangbi atract ahon kutu 300. Mingi ti ala so aga mbage ti tanga ti aita ti Christ na ngoi ni so awara tâ tënë na lege ti akozo tract so.

² Na ngu 1987 a kiri a gboto lê na ndo salango kusala na akete tract na lege ti sigingo ti atract osio so a sala na nzoroko, so e ngbâ ti wara ni laso. Na Kota Bungbi ti District ti ngu 1992 so kota li ti tënë ni ayeke “Azo so ayo lumière”, a fa na e so a yeke kiri ti kono wungo ti molongo ti atract so na lege ti sigingo na ambeni tract osio so a sala na nzoroko na so ayeke pusu zo ti gbu li. A yeke atract tongana De l’aide pour les déprimés, Sewa so ayeke na ngia, Zo Wa Akomande Biani Sese? nga na Sese ti laso ayeke sö kuâ ande? Na a kiri a zia ambeni tract nde na ndo ni. Na tapande, a yeke atract tongana: Jéhovah​—Qui est-il?, Jésus Christ​—Lo Yeke Zo Wa?, Mo Yeke na Mbeni Yingo so Alingbi ti Kui Pepe?, Mo Ye ti Hinga Ye Mingi Ahon na ndo Bible. . . ? Mo yeke sala kusala na atract so kue ti wara aye ti nzoni na yâ kusala ti mo ti fango tënë?

³ Aye ti nzoni ayeke ga na peko ti salango kusala nzoni na atract. A yeke kota ye ande teti e ti hinga nzoni atract oko oko kue. Na tapande, mo diko awe atract so nzoni si mo lingbi ti bata na li ye so tract oko oko asala tënë na ndo ni? Mo bi bê ti mo na ndo mara ti zo wa tract oko oko alingbi ande ti nzere na lo? Hingango tract oko oko nzoni ayeke mû ande lege na mo ti sala kusala na ni na mbito pëpe na yâ kusala ti fango tënë da na da, nga na alege nde nde so azi.

⁴ Sala kusala na ni na yâ fango tënë da na da: Mbeni surveillant ti circonscription asû na mbeti: “Mbi yeke wara ye ti nzoni mingi na tongo nda ti mingi ti alisoro ti mbi na lege ti mbeni tract.” Mo tara mara ti kode so awe? Ngbanga ti nyen mo sala kusala pëpe na atract tongana mbeni lege ti to nda ti lisoro ti mo? Na lege ti atract, e yeke fadeso na akozo tënë nde nde so apika bê ti zo, so e lingbi ti soro ti sala na kusala. Tract oko oko ayeke mû lege na e ti to nda ti mbeni mandango Bible wala na kozo gango ti e wala na ngoi ti mbeni fini vizite.

⁵ Ambeni lege nde so azi ti sala kusala na atract ayeke dä. Na ngoi ti mbeni lisoro na yanga ti mbeni da, e ga ti hinga so zo ni agirisa mbeni zo so lo ndoye lo ade ti ninga pëpe wala mbeni zo ti yâ ti sewa ni ayeke na kobela. Fani mingi, azo so ayeke na yâ kota vundu wala ala so ayeke tara ti hon ndo ti akpale so aninga ayeke maï asioni bibe na bê ti ala anze kue. So tâ mbeni kusala ti ndoye ti fa na ala tokua ti dengo bê so ayeke na yâ tract De l’aide pour les déprimés! Mo lingbi ti mä so zo ni akangbi na koli wala wali ti lo ade ti ninga pëpe wala lo girisa kua ti lo. Mara ti aye tongaso alingbi ti duti tâ ye so ayengi zo mingi, nga ayeke ga na kpale mingi na ndo sewa ni. Sala kusala na ahundango tënë so ayeke na lembeti 2 ti tract Sewa so ayeke na ngia: “Ngbanga ti nyen akota kpale ayengi asewa laso tongaso? Zo alingbi ti wara mbeni sewa so ayeke na ngia tongana nyen?” Peut-être a yeke ambilimbili hundango tënë so zo ni ayeke gbu li ti lo dä. Atâa tongana lo fa na gigi nzara ti diko tract ni fade fade pëpe, ye alingbi ti si so lo yeke diko ni ande.​—Zo-ti. 11:6.

⁶ Teti so ambeni kongregation ayeke sala kusala fani mingi na yâ territoire ti ala, mingi ti azo ayeke na ambeni mbeti ti e awe. Na salango kusala na atract, e yeke wara ande lege ti sala lisoro na ndo mbeni ye so agbu bê ti azo ni, ti pusu ala ti fa atënë ti bê ti ala na gigi nga ti gue na ala ti bi bê na ndo beku ti Royaume. E yôro na yâ bibe ti ala mbeni hundango tënë so e lingbi ti sala lisoro na ndo ni na ngoi ti peko. E sala fini vizite na e gi ti kono nzara ti ala teti tënë ni. Tongana ngoi ayeke hon, e lingbi ti to nda ti manda ye na ala na salango kusala na mbeni brochure wala buku so ala yeke na ni awe.

⁷ Sala kusala na atract na alege kue so azi: Tongana e zia atract ndulu na tele ti e, na tapande na yâ bozo ti bongo ti e, na yâ kete bozo so e yeke gbu na maboko wala na yâ bozo ti e ti fango tënë, e lingbi ti sala kusala na ni na angoi nde nde nga na ndo kue so e lingbi ti wara azo dä. E sala kusala na ni na ngoi so e yeke gue ti vo aye, e yeke na voyage, e yeke sala lisoro na asongo ti e wala na azo so aga ti bâ e. Atract ayeke mû lege na e ti fa mbeni kete tënë ti témoin. Tract ayeke pëpe mbeni ye so dikongo ni alingbi ti hon ngangu ti mbeni zo, me ayeke mbeni ye so ayeke gboto lê na ndo mbilimbili tënë ni nga na lege ti ndara. Azo ayeke ndulu mingi ti yeda na atract ahon mbeni buku wala apériodique, teti so a hunda ngoi mingi pëpe ti diko ni.

⁸ Duti ndulu ti fa atract na alege kue so azi na ekole wala na place ti kua ti mo, na ando ti tengo kobe, ando ti kango essence nga na ambeni ndo nde. Na ngoi so lo yeke leke tele ti lo ti gue na âta ti lo ti wali na ndo ti mbeni docteur, mbeni ita-wali amû biani ambeni tract na tele ti lo. Na ndo so azo ayeke ku docteur ni dä, lo to nda ti lisoro na mbeni mama ti ngo. Na pekoni so lo fa tract Dutingo na siriri na yâ fini sese na wali ni, ita-wali ni ahunda: “Mo ye ti bata molenge ti mo na yâ mbeni sese so ayeke tongana ti so ayeke na yâ foto so?” Lo wara lani lege ti ngbâ ti sala lisoro ni na lege ti mbeni vizite na yanga-da ti wali ni. Ye so amû lani lege na lo ti kiri lakue ti bâ wali so.

⁹ A lingbi ti to nda ti amandango Bible na lege ti atract: Mbeni surveillant ti circonscription afa so mbeni kongregation so lo sala vizite dä ato nda ti amandango Bible 64 na yâ ti yenga ni na salango kusala na atract na yâ akozo tënë so ala yeke tene na azo ni.

¹⁰ Mo tara awe ti hunda ti manda Bible na mbeni zo na kozo ngoi so mo wara lo na yanga-da? Na salango kusala na mbeni tract, mo lingbi ti fa na ndulu tënë tongana nyen mbeni mandango Bible ayeke tambela. Mbeni ita-wali asala tongaso na salango kusala na tract Dutingo na siriri na yâ fini sese. Na gbotongo lê na ndo foto ni, lo hunda zo ni wala ti lo, sese alingbi mbeni lâ ti duti tongaso? Na pekoni so zo ni akiri tënë, ita-wali ni atisa lo ti diko 2 Pierre 3:13 na Esaïe 65:17, aversê so a fa na yâ tract ni. Na pekoni ita-wali ni atene: “Azendo so ayeke pëpe mbeni senge tënë ti bango li, me ayeke aye so asû ni biani na yâ Tënë ti Nzapa, Bible.” Na pekoni lo leke ti kiri na ndo lisoro ni na yenga ti peko. Na ngoi ti vizite ti peko, lo kiri tënë na ambeni hundango tënë mingi ti wali ni na lo zia na lo mbeni buku. Na nda ni ala to nda ti mbeni mandango Bible.

¹¹ Mo yeke mbeni zo so awara batême ade ti ninga pëpe wala peut-être mo yeke mbeni wafango tënë so ade ti wara batême pëpe na mo yeke gi ti wara akode na yâ kusala ti mo? Tongana a yeke tongaso, mo lingbi ti gue ti bâ ala so ayeke na akode mingi ti hunda awango na ndo salango kusala na atract na yâ territoire ti mo. E yeke na atapande mingi na yâ Bible, ti ala so awara lani atënë ti mungo maboko nga na fango lege na mbage ti ala so akpengba na yâ mabe.​—Kusala 18:24-27; 1 aCor. 4:17.

¹² Surveillant ti Mandango Buku ti Kongregation alingbi mbilimbili ti sala nzoni, na lekengo aye ti tene ambeni zo amû maboko na mo ti sala kusala nzoni na atract. Ababâ na mama ayeke na kungba ti mû maboko na amolenge ti ala ti gue na li ni na yâ kusala ti fango tënë. Mbeni babâ na mama afa na molenge ti ala tongana nyen ti fa tract Dutingo na siriri na yâ fini sese. Na ngoi so lo na mama ti lo ayeke sala mbeni étude, lo fa mbeni tract na koli ti wali so asala nzara ti tënë ni. Bê ti koli ni adö so mbeni kete molenge ayeke na mara ti akpengba tënë ti mabe tongaso. A nzere na lo mingi ti diko tract ni. Lakue tongana kete molenge so na mama ti lo ayeke kiri, lo yeke fa na koli so mbeni versê wala mbeni mbaï ti Bible so lo leke ni mbilimbili teti lo. Fadeso, koli ni ayeke diko apériodique lakue, lo sala nzara ti buku Révélation: dénouement nga lo yeke gue na ambeni bungbi. Aye so kue asi teti so babâ na mama ni amû lani ngoi ti sala ye so a hunda na ala na fango na molenge ti ala ti wali ti sala kusala nzoni na atract.

¹³ E sala kusala nzoni na atract ti e kue: Ti sala kusala na tract Sese ti laso ayeke sö kuâ ande?, mo lingbi ti fa tele ti mo na ti to nda ti lisoro ni na tenengo: “Bala ala. E yeke sala lisoro na azo na ndo dutingo ti e laso. Mo bâ so dutingo ti e ayeke ga ande nzoni wala ayeke ngbâ gi ti buba bubango tongaso? [Zia zo ni akiri tënë]. Ambeni zo atene so aye so ayeke si laso ayeke gango tâ tënë ti aprophétie ti Bible, nga so hunzingo ti sese so ayeke ndulu. Mo tene ti mo nyen?” Na pekoni so zo ni akiri tënë, fa na lo tract ni na gboto lê ti lo na ndo ahundango tënë ota so ayeke na yâ use paragraphe ni. Na pekoni, na mungo peko ti atënë ti tract ni, fa tongana nyen mbeni sese ahunzi ândö nga so sese ti laso ayeke hunzi ande. Na hunzingo ti lisoro ni, leke ti kiri ti bâ lo ti sala lisoro na ndo afä ti Bible so afa atene sese so ayeke ndulu ti hunzi.

¹⁴ Mingi ni, na place ti kua wala na ekole ngoi ayeke gi kete teti e ti fa tokua ti Royaume na ambeni zo. Na place ti kua ti mo, mbeni lisoro alingbi ti bâ gigi na ndo ambeni fini sango so andu ngorogbia. Mo lingbi ti yeda so atâa angangu kue so akota zo ti kodoro so ayeke na nzoni bibe ayeke sala, na yâ mbaï ti e kue, azo abâ pasi mingi. Na pekoni, mo lingbi ti gboto lê na ndo ndangba paragraphe ti lembeti 2 ti tract Zo Wa Akomande Biani Sese? Diko ahundango tënë ota so apusu zo ti gbu li. Tongana ngoi ayeke dä pëpe ti sala mbeni ndulu lisoro, mû tract ni na (a)zo ni na leke ti sala lisoro na ndo ahundango tënë so na mbeni ngoi nde wala na mbeni ndo nde.

¹⁵ Gi mo oko wala na sewa, mû ngoi ti bâ tongana nyen ti fa tract oko oko so. Bata ambeni ngoi ti tara tele ti mo. Tongana nyen mo lingbi ti sala kusala na atract ni legeoko na ambeni mbeti so a fa ni ti sala na kusala na yâ nze ni? Mo leke ambeni rendez-vous awe so mo lingbi ti mû ambeni tract ti gue na ni dä? Na yâ yenga so, mo yeke tingbi ande na mbeni zo so lo lingbi ti wara ye ti nzoni na lege ti tokua so atract afa ni na so alingbi tâ na ngoi ti e?

¹⁶ Kota ndoye ti e teti Jéhovah nga gingo bê ti e teti azo ayeke pusu ande e ti sala kue si azo ahinga nzo tënë. Salango kusala lakue na atract ayeke mû ande maboko na e ti sala tongaso. Mbeni kete molenge-koli ti ngu mbasambala aye ti mû maboko na voizin ti lo ti lï na yâ fini sese. Tongaso lo mû na lo mbeni tract na ala to nda ti manda Bible. Na mango tënë ni, ayeke mbeni ye so akpengba pëpe! Ye oko e yeke bâ na nene ni kode so akpengba pëpe na ngoi so e yeke fa tënë? Ti peko, tongana e zia tract na mbeni zo, a lingbi ti gue na lo ti to nda ti manda Bible. Tongana e sala kusala na atract na lege ti ndara na yâ fango nzo tënë ti Royaume, e yeke wara biani aye ti nzoni.