Maï akode ti fango tënë ti mo: Changé yâ ti akode ti mo

NDANI SO A YEKE KOTA YE: A-Chrétien so asoro ala ti gue na yayu nga na ambeni taba atisa mara ti azo kue ti “nyon ngu so amû fini na zo . . . senge senge.” (Apc 22:17). Ngu so amû fini na zo aye ti sara tënë ti aye kue so Jéhovah aleke ti zi azo so amä yanga na gbe ti siokpari na kuâ. Ti aidé azo so ngobo ti ala nga na bungbi ti vorongo nzapa ti ala ayeke nde nde, e bezoin ti fa “nzoni tënë ti lakue lakue” na mbeni lege so andu zo oko oko.—Apc 14:6.

LEGE TI SARA NI:

• Soro mbeni tënë nga na mbeni versê so ayeke ndu bê ti azo ti territoire ti mo. Mo lingbi ti soro mbeni kode ti sarango na lisoro wala mbeni ye so mo sara kua na ni kozo awe so andu bê ti azo. Atënë nga na aversê wa la ala yeke yeda na ni nzoni? Mbeni sango ayeke dä so ade ti ninga ape ala yeke sara tënë na ndö ni? Tënë wa la alingbi na mbeni koli wala mbeni wali?

• Yôro na yâ ti lisoro ni fason ti barango azo nga na asarango ye so alingbi na ndo so mo yeke dä.—2aC 6:3, 4

• Hinga nzoni ambeti nga na avidéo so e yeke fa na tënë nga e yeke fa na ye ti aidé na mbeni zo so tënë ni andu bê ti lo

• Téléchargé ambeti nga na avidéo na ayanga ti kodro ti azo so mo lingbi ti wara ala na yâ ti territoire ti mo

• Changé yâ ti atënë so mo yeke fa ti lingbi na bezoin ti zo ni (1aC 9:19-23). Na tapande, mo yeke tene ande nyen tongana mo mä so mbeni zo so lo hinga lo akui ade aninga ape?

BÂ VIDÉO NI, NA PEKONI KIRI TËNË NA AHUNDA SO:

• Tënë wa la wafango tënë ni akomanse ti sara lisoro na zo ni na ndö ni?

• Nyen la asi na zo ni na yâ ti gigi ti lo?

• Na popo ti aversê so ita ni agbu li na ndö ni so, ti so wa la ayeke nzoni na ngoi ni so? Mo tene tongaso ngbanga ti nyen?

• Tongana nyen la mo yeke changé tënë so mo ye ti fa ti lingbi na azo ti territoire ti mo?