LEGE TI HON NDÖ TI BIBE TI KENGO ZO

3 | Gi ti zi na yâ ti bê ti mo bibe ti kengo zo

Fango ye ti Bible:

“Ala changé na lege so ala sara si bibe ti ala akiri fini ni, si ala wani alingbi ti hinga ye so bê ti Nzapa aye, so ayeke nzoni, so anzere nga so ayeke mbilimbili-kue.”—AROMAIN 12:2.

Tënë so aye ti tene nyen:

Aye so e gbu li na ndö ni ayeke kota ye na lê ti Nzapa (Jérémie 17:10). E doit gï ti kpe pëpe ambeni tënë wala asarango ye so ayeke sioni, me e bezoin ti sara ambeni ye ahon ti so. Bibe ti kengo zo ayeke komanse na yâ ti bê ti e. Tongaso, e bezoin ti zi hio na yâ ti bê ti e aye so e pensé na ndö ni so asara si e yeke na bibe ti kengo zo. A yeke tâ gï ye so la apeut ti “changé” e ti tene e hon ndö ti bibe ti kengo zo.

Ye so mo peut ti sara:

Gbu li nzoni na ndö ti fason so mo yeke pensé na ni na ndö ti azo, mbilimbili azo so mara ti ala wala kodro ti ala ayeke nde. Hunda terê ti mo: ‘Mbi yeke bâ ala tongana nyen? Eskê bango ndo ti mbi aluti na ndö ti ye so mbi hinga na ndö ti ala? Wala aluti na ndö ti kengo zo senge senge?’ Kpe aréseau sociaux, afilm wala angia so ayeke maï bibe ti kengo zo nga na sarango ye ti ngangu.

Tënë ti Nzapa apeut ti aidé e ti hon ndö ti bibe ti kengo zo so ayeke na yâ ti bê ti e

A yeke lakue facile ape ti tene e wani e gi ti bâ aye so ayeke na yâ ti bê ti e wala asentiment ti e. Me, Tënë ti Nzapa apeut ti aidé e ti ‘hinga nda ti abibe ti bê ti e nga na aye so bê ti e aye ti sara.’ (aHébreu 4:12). Tongaso, gi ti manda ti Bible. Haka aye so Bible afa na apensé ti mo wani, nga sara kue ti tene apensé ti mo ague oko na ye so Bible afa. Tënë ti Nzapa apeut ti aidé e ti hon ndö ti bibe ti kengo zo so ayeke na yâ ti bê ti e so “gere ni aluti ngangu”.—2 aCorinthien 10:4, 5.

Vrai ye so asi: STEPHEN

achangé fason so lo yeke pensé na ni

Ye so Stephen na afami ti lo avivre ni asara si ala ke amunzu. Ye ti peko ni ayeke so, lo lï lani na yâ ti mbeni kama-poroso so ayeke tiri ndali ti droit ti azo. Ambeni ngoi na pekoni, teti so lo ke azo ti mbeni mara asara si lo tiri na ala. Stephen atene: ‘Mbeni lâ, mbi na akamarade ti mbi e bâ afilm so a fa tongana nyen la amunzu asara pasi na azo vuko so a gue na ala na ngbâa na États-Unis. Na bango aye ni so, ngonzo amû e, na e londo na terê ti amunzu so ayeke na yâ ti da ti film ni. Na pekoni, e sigi e gue na yâ ti aquartier so amunzu ayeke dä ti tene e pika ala.’

Bango ndo ti Stephen achangé kue na ngoi so aTémoin ti Jéhovah amanda Bible na lo. Lo tene: ‘Azo ake mbi lani mingi ndali ti mara ti mbi, me mbi bâ ambeni ye na popo ti aTémoin ti Jéhovah so asara si li ti mbi akpe. Na tapande, na ngoi so mbeni Témoin ti Jéhovah, so ayeke munzu, aye ti gue na kodro-wande, lo zia amolenge ti lo na mbeni sewa ti azo vuko ti bâ lege ti ala. Nga, mbeni sewa ti amunzu ayeda ti mû na da ti ala mbeni maseka zo vuko so ayeke na ndo ti lango ape.’ Stephen aga ti bâ biani so aTémoin ti Jéhovah ayeke sewa ti aita so ayeke na yâ ti dunia kue so ndoye ayeke na popo ti ala tongana ti so Jésus atene lani.—Jean 13:35.

Nyen la a-aidé Stephen ti zia lege ti sarango ye ti ngangu nga na kengo ambeni zo? Versê so ayeke na aRomain 12:2 la a-aidé lo. Lo tene: “Mbi bâ so mbi doit ti changé pensé ti mbi. Mbi doit ti changé pensé ti mbi si mbi duti na bibe ti siriri, nga mbi bâ so a yeke nzoni ye so zo adoit ti sara na yâ ti gigi ti lo la.” Laso, Stephen ahon ndö ti bibe ti kengo zo ahon ngu 40 awe.