Royaume ti Nzapa akomanse kua awe!

1. Nyen la e hinga na bê ti e kue? Ngbanga ti nyen?

TONGANA mo bâ akpale kue so ayeke na yâ ti dunia laso, eskê a yeke ngangu na mo ti pensé so aye ayeke ga ande nzoni? Azo ti yâ ti sewa aye terê mingi tongana ti kozo ape. Azo mingi aga azo so ayeke sara aye ti ngangu na amba ti ala nga ala pensé gï na ala wani ahon ti kozo. A yeke ngangu na azo mingi ti sara confiance na azo so ayeke komande. Me atâa aye so kue, mo peut ti duti sûr so aye ayeke ga ande nzoni. Ngbanga ti nyen? Ngbanga ti so azo ayeke sara ye tâ gï tongana ti so mbeni kpengba prophétie na ndö ti “lâ ti nda ni” afa (2 Tim. 3:1-5). Zo kue so ayeke sara ye na lege ni ayeke yeda so prophétie so ayeke ga tâ tënë laso. So prophétie so ayeke ga tâ tënë, a fa nga so Christ Jésus aga Gbia ti Royaume ti Nzapa awe. Me so ayeke gï mbeni oko ti aprophétie so asara tënë ti Royaume la. Tongana e kiri e bâ ambeni prophétie so aga tâ tënë ade ti ninga ape, a yeke kpengba mabe ti e.

2. Nyen la e yeke bâ na yâ ti article so? Ngbanga ti nyen? (Sara tënë na ndö ti foto ti couverture ni.)

² Na yâ ti article so, e yeke bâ (1) mbeni prophétie so ayeke aidé e ti hinga lawa la Royaume ti Nzapa akomanse kua, (2) aprophétie so ayeke aidé e ti comprendre so Jésus aga Gbia ti Royaume ti Nzapa na yayu awe nga (3) aprophétie so ayeke fa tongana nyen la a yeke futi awato ti Royaume ti Nzapa. Legeoko tongana ambage ti dessin so a tingbi ni awe si a bâ dessin ni kue nzoni, tongana a tingbi atënë ti yâ ti aprophétie so, a yeke fa na e polele ngoi so e yeke dä na yâ ti ye so Jéhovah aleke ti sara.

LEGE TI HINGA NGOI SO ROYAUME AKOMANSE KUA

3. Prophétie so ayeke na Daniel 7:13, 14 atene nyen na ndö ti Gbia ti Royaume ti Nzapa?

³ Prophétie so ayeke na Daniel 7:13, 14 atene na e so Christ Jésus la ayeke nzoni zo ti duti Gbia ti Royaume ti Nzapa. Azo ti amara kue ayeke duti ande na ngia ti ‘sara kua na lo’ nga mbeni gbia ayeke mû ande place ti lo lâ oko ape. Mbeni prophétie so ayeke na yâ ti mbeti ti Daniel atene kozo awe so Jésus ayeke komanse ti komande na ndö ti Royaume ni na hunzingo ti angoi mbasambala. Eskê lege ayeke dä ti hinga ngoi so Jésus aga Gbia?

4. Fa tongana nyen la Daniel 4:10-17 a-aidé e ti hinga ngu so na yâ ni Christ aga Gbia. (Bâ nga kete tënë na gbe ni.)

⁴ Diko Daniel 4:10-17. “Angoi mbasambala” aye ti sara tënë ti ngoi so aninga ngu 2 520. Ngoi ni so akomanse na ngu 607 kozo na ngoi ti e na ngoi so azo ti Babylone azi ndangba gbia so akomande na ndö ti trône ti Jéhovah na Jérusalem. A hunzi na ngu 1914 na ngoi so Jéhovah azia Jésus, “lo so ndia afa so ye ni ayeke ti lo”, Gbia ti Royaume ti Nzapa.b—Ézéch. 21:25-27.

5. Mbeni lege so prophétie na ndö ti “angoi mbasambala” apeut ti aidé e ayeke so wa?

⁵ Prophétie so apeut ti aidé e tongana nyen? Ti hinga ye na ndö ti “angoi mbasambala” adë bê ti e so Jéhovah ayeke sara ye alingbi na azendo ti lo tâ na ngoi ni. Gï tongana ti so Jéhovah afa ngoi so Royaume ti lo akomanse kua, lo yeke bâ nga ande si tanga ti aprophétie ti lo kue aga tâ tënê na ngoi so lo fa. Biani, lango ti Jéhovah ‘ayeke si na retard ape!’—Hab. 2:3.

AYE SO AFA SO CHRIST AGA GBIA TI ROYAUME TI NZAPA AWE

6. (a) Nyen la e bâ na ndö ti sese so afa so Christ ayeke komande na yayu? (b) Tongana nyen la prophétie so ayeke na Apocalypse 6:2-8 ayeda na ni?

⁶ Nduru na hunzingo ti kua ti fango tënë ti Jésus na ndö ti sese, lo fa lani ambeni ye so ayeke si na yâ ti dunia so ayeke aidé adisciple ti lo ti hinga so lo komanse ti komande na yayu awe. Ambeni ye so lo sara tënë ni ayeke abira, akota nzara nga na yengingo ti sese. Lo fa nga lani so asioni kobela wala akobela ayeke tï “na ando nde nde na peko ti terê,” na tapande kobela ti COVID-19 so amû ndo ade ti ninga ape. Aye so ayeke mbage ti aye so Bible airi ni “fä” ti ngoi so Christ ayeke duti dä (Mat. 24:3, 7; Luc 21:7, 10, 11). Ahon ngu 60 na peko ti so Jésus akui nga lo kiri na yayu, lo kiri lo fa ambeni ye na bazengele Jean na ndö ti aye so ayeke si. (Diko Apocalypse 6:2-8.) Aye so kue asi ngbene ye na ngoi so Jésus aga Gbia na ngu 1914 ti ga na ni.

7. Ngbanga ti nyen la asioni ye ayeke si mingi na ndö ti sese na ngoi so Jésus aga Gbia?

⁷ Ngbanga ti nyen la aye aga sioni mingi na ndö ti sese na ngoi so Jésus aga Gbia? Apocalypse 6:2 afa mbeni kota tënë na ndö ni atene kozo ye so Jésus asara na peko ti so lo ga Gbia ayeke ti sara mbeni bira. Lo doit ti sara bira ni na zo wa? Lo doit ti sara bira na Zabolo nga na asioni yingo ti lo. Ti gue oko na Apocalypse chapitre 12, a sö benda na ndö ti Satan na asioni yingo ti lo na a bi ala na ndö ti sese. Ngonzo asara Satan na lo komanse ti tuku ngonzo ti lo na ndö ti azo na sese, na ye so aga na “mawa na sese”.—Apoc. 12:7-12.

8. Tongana e bâ aye so ayeke si so asara si aprophétie na ndö ti Royaume aga tâ tënë, a peut ti aidé e tongana nyen?

⁸ Aprophétie so apeut ti aidé e tongana nyen? Aye so ayeke si na yâ ti dunia nga na bango ndo ti azo so achangé so e bâ ni polele a-aidé e ti hinga so Jésus aga Gbia awe. Tongaso, ahon ti tene bê ti e ason tongana e bâ azo aga azo ti kion nga ala yeke sioni mingi, e yeke girisa ape so asarango ye ti ala asara si prophétie ti Bible aga tâ tënë. Royaume akomanse kua awe! (Ps. 37:1). E yeke bâ aye ti vundu mingi na yâ ti dunia tongana Harmaguédon aga nduru mingi (Marc 13:8; 2 Tim. 3:13). E kiri singila mingi na Babâ ti e ti yayu so aye e so ayeke aidé e ti comprendre ndani so akpale ayeke mingi na yâ ti dunia.

A YEKE FUTI ANDE AWATO TI ROYAUME TI NZAPA TONGANA NYEN?

9. Nyen la Daniel 2:28, 31-35 atene na ndö ti ndangba gouvernement so ayeke ngangu mingi na yâ ti dunia? A bâ gigi lawa?

⁹ Diko Daniel 2:28, 31-35. E bâ so prophétie so ayeke ga tâ tënë laso. Bango li ti Nébucadnezzar afa aye so ayeke si na “andangba lango”, na peko ti so Christ akomanse ti komande. Na popo ti awato ti Jésus na ndö ti sese, a yeke wara ndangba gouvernement so ayeke ngangu mingi na yâ ti dunia so Bible asara tënë ni, so “gere ni so ayeke na wen nga na popoto” aye ti sara tënë ni. Gouvernement ni so akomanse ti komande awe. A bâ gigi na ngoi ti Kozo bira so amû sese kue na ngoi so Grande-Bretagne nga na États-Unis akomanse ti sara kua maboko na maboko mingi. Statue so Nébucadnezzar abâ na yâ ti bango li afa nga aye use tongaso na ndö ti gouvernement so ayeke ngangu mingi na yâ ti dunia kue, so asara si lo yeke nde na aroyaume so aga kozo na lo.

10. (a) Tongana nyen la prophétie ti Daniel afa tâ na lege ni sarango ye ti Grande-Bretagne nga na États-Unis? (b) Kpale wa la e doit ti kpe ni? (Bâ encadré “Sara hange na popoto ni!”)

¹⁰ Kozoni, nde na agouvernement so ayeke ngangu mingi na yâ ti dunia so a sara tënë ni na yâ ti vision ni, wen nga na popoto la aye ti sara tënë ti komandema ti Grande-Bretagne nga na États-Unis, me a yeke pëpe aye so akpengba tongana lor wala argent. Popoto ni aye ti sara tënë ti “amolenge ti azo,” wala asenge zo (Dan. 2:43, kete tënë na gbe ni). Laso, e bâ polele so ngangu so azo so ayeke sara vote ayeke na ni, tënë ti droit ti azo, gbâ ti azo so alondo ti fa ngonzo ti bê ti ala nga na syndicat ti azo so ayeke sara kua asara si a yeke ngangu na gouvernement so ayeke ngangu mingi na yâ ti dunia so ti sara ye so lo ye.

11. Tongana nyen la komandema ti Grande-Bretagne nga na États-Unis so ayeke ngangu mingi na yâ ti dunia asara si e kiri e hinga na bê ti e kue so e yeke na lâ ti nda ni?

¹¹ Use ni, komandema ti Grande-Bretagne nga na États-Unis, so gere ti kota statue ni aye ti sara tënë ni, ayeke ndangba komandema so ayeke ngangu mingi na yâ ti dunia so Bible asara tënë ni. Mbeni komandema ti azo ayeke bâ ande gigi na peko ti ala ape. Me Royaume ti Nzapa ayeke futi ande ala nga na agouvernement ti azo kue na Harmaguédon.c—Apoc. 16:13, 14, 16; 19:19, 20.

12. Mbeni ye nde wa la prophétie ti Daniel afa so adë bê ti e nga amû na e beku?

¹² Prophétie so apeut ti aidé e tongana nyen? Prophétie ti Daniel akiri afa mbeni ye so afa so e yeke na lâ ti nda ni. Ahon ngu 2500 awe, Daniel atene lani so na peko ti Babylone, akodro osio so ayeke na ngangu mingi na yâ ti dunia ayeke komande na ndö ti awakua ti Nzapa. Lo kiri lo fa nga so komandema ti Grande-Bretagne nga na États-Unis, so ayeke ngangu mingi na yâ ti dunia, ayeke duti ndangba komandema ni. Ye so adë bê ti e nga amû na e beku so fafadeso Royaume ti Nzapa ayeke futi agouvernement kue ti azo nga ayeke komande na ndö ti sese kue.—Dan. 2:44.

13. “Miombe gbia ni” nga na “agbia bale-oko” so a sara tënë ti ala na Apocalypse 17:9-12 aye ti sara tënë ti nyen? Prophétie so aga tâ tënë tongana nyen?

¹³ Diko Apocalypse 17:9-12. So Kozo bira so amû ndö ti sese afuti aye mingi, a sara si mbeni prophétie ti Bible na ndö ti lâ ti nda ni aga tâ tënë. Akota zo ti dunia so aye lani ti ga na siriri na yâ ti dunia. Tongaso na janvier 1920, ala zia na sese Bungbi ti amara so Bendo ti gigi amû place ni na octobre 1945. A iri bungbi so “mbeni miombe gbia”. Me a yeke lani na ngangu mingi na yâ ti dunia ape. A yeke lani na ngangu gï grâce na mungo maboko ti agouvernement. Bible airi agouvernement so “agbia bale-oko”.

14-15. (a) Apocalypse 17:3-5 afa nyen na ndö ti “Babylone, Ngangu gbata”? (b) Nyen la ayeke si na azo so ayeke mû maboko na abungbi ti vorongo nzapa ti wataka?

¹⁴ Diko Apocalypse 17:3-5. Na yâ ti mbeni vision so Nzapa afa na bazengele Jean, lo bâ mbeni wali-ndumba, “Babylone, Ngangu gbata,” so aye ti sara tënë ti abungbi ti vorongo nzapa ti wataka kue. Vision so afa nyen? Teti angu mingi, abungbi ti vorongo nzapa ti wataka ayeke sara kua maboko na maboko na agouvernement ti dunia so nga ala mû maboko na ala. Me fafadeso Jéhovah ayeke zia na bê ti agouvernement ti dunia so “ti sara ye so ayeke na bê ti lo”. Ye ti peko ni ayeke duti ande nyen? Agouvernement so, so ti tene “agbia bale-oko,” ayeke tourné ande na terê ti abungbi ti vorongo nzapa ti wataka nga ala yeke futi ala.—Apoc. 17:1, 2, 16, 17.

¹⁵ E hinga tongana nyen so a ga nduru ti futi Babylone, Ngangu gbata awe? Ti kiri tënë na hunda so, a yeke nzoni e girisa ape so kota Ngu ti Euphrate la ayeke bata lani mbeni mbage ti gbata ti Babylone ti ândö. Mbeti ti Apocalypse ahaka azo kutu mingi so ayeke mû maboko na Babylone, Ngangu gbata na “angu” so ayeke bata zo (Apoc. 17:15). Me a fa nga so angu ni ayeke hule, ti fa so abungbi ti vorongo nzapa ti wataka kue ayeke perdre ande azo mingi so ayeke mû maboko na ala (Apoc. 16:12). Laso prophétie so ayeke ga tâ tënë ndali ti so azo mingi ayeke na yâ ti abungbi ti vorongo nzapa ape nga ala yeke gue na ambeni ndo nde ti tene a leke akpale ti ala.

16. Tongana e mä yâ ti aprophétie na ndö ti ngoi so Bendo ti gigi abâ gigi nga ngoi so a yeke futi Babylone, Ngangu gbata, apeut ti aidé e tongana nyen?

¹⁶ Aprophétie so apeut ti aidé e tongana nyen? So Bendo ti gigi abâ gigi nga so azo mingi amû maboko na abungbi ti vorongo nzapa ti wataka encore ape afa nga so e yeke na lâ ti nda ni. Atâa so azo mingi ayeke mû maboko encore ape na Babylone, Ngangu gbata, a yeke ni la ayeke futi ande ni ape. Tongana ti so e tene fade, Jéhovah ayeke zia ande na bê ti “agbia bale-oko,” so ti tene agouvernement so ayeke mû maboko na Bendo ti gigi, “ti sara ye so ayeke na bê ti lo”. Amara so ayeke futi ande abungbi ti vorongo nzapa ti wataka gï hio tongaso, na a yeke hon ande gbungo li ti azo ti dunia (Apoc. 18:8-10).d Futingo Babylone, Ngangu gbata ayeke yengi ande dunia nga apeut ti ga na angangu kpale, me awakua ti Nzapa ayeke na araison use ti duti na ngia. Abungbi ti vorongo nzapa ti wataka, so ayeke awato ti Jéhovah Nzapa teti angu mingi, ayeke duti dä encore ape, nga na yâ ti ngoi kete, a yeke sö e na ngoi so a yeke futi sioni dunia so.—Luc 21:28.

SARA MBETO TI KEKEREKE APE

17-18. (a) Tongana nyen la e peut ti ngbâ ti kpengba mabe ti e? (b) Nyen la e yeke bâ na yâ ti article ti peko?

¹⁷ Daniel atene lani kozo awe so “tâ hingango ye ayeke ga mingi.” Na a yeke ye so asi la. Laso, e mä yâ ti aprophétie so asara tënë na ndö ti ngoi ti e (Dan. 12:4, 9, 10). Aprophétie so ayeke tâ na lege ni asara si e ne Jéhovah nga na Mbeti ti lo, Bible, mingi (És. 46:10; 55:11). Tongaso, ngbâ ti kpengba mabe ti mo na lege so mo manda Bible nzoni nga mo aidé azo ti duti na nzoni songo na Jéhovah. Lo yeke bata ande azo kue so azia bê ti ala kue na lo, nga lo yeke sara si ala “duti lakue na siriri”.—És. 26:3.

¹⁸ Na yâ ti article ti peko, e yeke sara tënë mingi na ndö ti aprophétie so abâ congrégation ti aChrétien na lâ ti nda ni so. Tongana ti so e yeke manda ande, aprophétie so nga afa so e yeke na lâ ti nda ni. E yeke bâ ande ambeni ye so afa so Jésus, so ayeke fadeso Gbia ti e, ayeke fa lege na adisciple ti lo so ayeke be-ta-zo.