ARTICLE TI MANDANGO NI 30
Mbeni ngbene prophétie so ayeke kota ye ndali ti mo
“Mbi yeke zia kengo terê na popo ti mo na wali ni.”—GEN. 3:15.
BIA 15 Sepela kozo Molenge ti Jéhovah!
AYE SO E YEKE BÂ NIa
1. Hio na peko ti so Adam na Ève asara siokpari, nyen la Jéhovah asara? (Genèse 3:15).
HIO na peko ti so Adam na Ève asara siokpari, Jéhovah amû beku na ahale ti ala na lege ti mbeni prophétie so ayeke kota mingi. Tënë so lo tene ayeke na Genèse 3:15.—Diko ni.
2. Ngbanga ti nyen la prophétie so ayeke kota mingi?
2 Prophétie so ayeke na yâ ti kozo mbeti ti Bible. Me na yâ ti ambeni ye, tanga ti ambeti ti Bible kue ague oko na ni. Tongana ti so kamba so a kanga na akeke ti wâ asara si akeke ti wâ ni abungbi oko, tënë so ayeke na Genèse 3:15 asara si atënë ti yâ ti tanga ti ambeti ti Bible kue abungbi oko na yâ ti tënë so: Zo so Nzapa ayeke tokua lo ti sö e ayeke futi Zabolo nga na asioni zo kue so amû peko ti lo.b Ye so ayeke duti ande pendere mingi ndali ti azo kue so aye Jéhovah.
3. Nyen la e yeke bâ na yâ ti article so?
3 Na yâ ti article so, e yeke kiri tënë na ahunda so na ndö ti prophétie so ayeke na Genèse 3:15: Azo wa la prophétie ni aye ti sara tënë ti ala? Prophétie ni aga tâ tënë tongana nyen? E yeke bâ nzoni dä tongana nyen?
AZO WA LA PROPHÉTIE NI AYE TI SARA TËNË TI ALA?
4. “Ngbo ni” aye ti sara tënë ti zo wa? E hinga ni tongana nyen?
4 Genèse 3:14, 15 asara tënë ti mbeni “ngbo”, “hale” ti ngbo ni, mbeni “wali” nga na “hale” ti wali ni. Bible a-aidé e ti hinga ala oko oko kue.c Zia e komanse na “ngbo ni”. Mbeni vrai ngbo alingbi pëpe ti mä yâ ti atënë so Jéhovah atene lani na yaka ti Éden. Tongaso, a doit ti duti mbeni créature so ahinga ndo la Jéhovah afâ lani ngbanga na ndö ti lo. A yeke zo wa? Apocalypse 12:9 afa polele ngbo ni ayeke zo wa. A fa polele so “ngbo ti giriri” ayeke Satan Zabolo. Me azo wa la ayeke hale ti ngbo ni?
NGBO NI
Satan Zabolo, so Apocalypse 12:9 airi lo “ngbo ti giriri” (Bâ paragraphe 4)
5. Azo wa la ayeke hale ti ngbo ni?
5 Na ambeni ngoi, Bible asara kua na tënë “hale” ti sara tënë ti azo so asara ye tâ gï tongana mbeni zo, tongaso a peut ti iri ala amolenge ti lo. Tongaso, hale ti ngbo ni ayeke a-ange so ayeke be-ta-zo ape nga na azo so, legeoko tongana Satan, asara kpengba-li na Jéhovah Nzapa nga ake awakua ti Lo. Na popo ti ala, mo yeke wara a-ange so azia yayu na ngoi ti Noé nga na asioni zo so ayeke sara ye tongana babâ ti ala Zabolo.—Gen. 6:1, 2; Jean 8:44; 1 Jean 5:19; Jude 6.
HALE TI NGBO NI
Asioni yingo nga na azo so asara kpengba-li na Jéhovah Nzapa nga ake awakua ti lo (Bâ paragraphe 5)
6. Ngbanga ti nyen la “wali ni” apeut lani ti duti Ève ape?
6 Fadeso e bezoin ti hinga “wali ni” ayeke zo wa. Lo peut lani ti duti Ève ape. Ngbanga ti nyen? Zia e bâ gï mbeni raison ni oko. Prophétie ni atene so hale ti wali ni ayeke “neka” li ti ngbo ni. Tongana ti so e londo ti bâ, ngbo ni ayeke Satan so ayeke sioni ange, nga mbeni zo so ayeke mbilimbili-kue ape so ayeke hale ti Ève apeut ti neka lo ape. Tongaso, a yeke futi Satan tongana nyen?
7. Tongana ti so a fa na Apocalypse 12:1, 2, 5 nga na 10, wali so Genèse 3:15 asara tënë ti lo ayeke zo wa?
7 Ndangba mbeti ti Bible afa na e wali so Genèse 3:15 asara tënë ti lo. (Diko Apocalypse 12:1, 2, 5, 10.) So ayeke senge wali ape. Nze ayeke na gbe ti gere ti lo nga mbeni couronne ti atongoro 12 ayeke na li ti lo. Lo dü mbeni molenge so ayeke nde mingi: Royaume ti Nzapa. Royaume ni ayeke na yayu, tongaso wali ni adoit nga ti duti na yayu. Wali ni aye ti sara tënë ti mbage ti bungbi ti Jéhovah so ayeke na yayu so a-ange so ayeke be-ta-zo na lo ayeke na yâ ni.—aGal. 4:26.
WALI NI
Mbage ti bungbi ti Jéhovah so ayeke na yayu so acréature ti yingo so ayeke be-ta-zo na lo ayeke na yâ ni (Bâ paragraphe 7)
8. Mbage ti hale ti wali ni so ayeke kota mingi ayeke zo wa? Lawa la lo ga kota mingi? (Genèse 22:15-18).
8 Bible a-aidé e ti hinga hale ti wali ni so ayeke kota mingi. Lo doit ti duti mbeni hale ti Abraham. (Diko Genèse 22:15-18.) Tongana ti so prophétie ni atene, Jésus ayeke lani hale ti koli so, so ayeke be-ta-zo (Luc 3:23, 34). Me hale so adoit ti duti ngangu mingi ahon mbeni senge zo ndali ti so lo doit ti neka Satan Zabolo. Tongaso, na ngoi so Jésus awara lani ngu 30 tongaso, lo ga Molenge ti Nzapa so a soro lo na lege ti yingo vulu. Na ngoi so a soro Jésus, lo ga mbage ti hale ti wali ni so ayeke kota mingi (aGal. 3:16). Na peko ti so Jésus akui nga a zingo lo na kuâ, Nzapa ‘azia couronne ti gloire na ti gonda na li ti lo’ nga lo mû na lo “komandema kue na yayu nga na sese”, lo mû nga na lo ngangu ti futi akusala ti Zabolo.”—aHéb. 2:7; Mat. 28:18; 1 Jean 3:8.
HALE TI WALI NI
Jésus Christ nga na azo 144 000 so a soro ala ti gue na yayu so ayeke komande legeoko na lo (Bâ paragraphe 8-9)
9-10. (a) Azo wa la ayeke nga mbage ti hale ti wali ni? Lawa la ala ga mbage ti hale ti wali ni? (b) Nyen la e yeke gue ti bâ ni?
9 Me use mbage ti hale ni ayeke nga dä. Bazengele Paul afa azo so ayeke use mbage ti hale ni tongana lo tene na aJuif nga na azo so ayeke aJuif ape so a soro ala ti gue na yayu, lo tene: “Tongana ala yeke ti Christ, ala yeke biani hale ti Abraham, ala yeke ahéritier ndali ti mbeni zendo.” (aGal. 3:28, 29). Tongana Jéhovah asoro mbeni Chrétien na lege ti yingo vulu ti gue na yayu, lo yeke ga mbage ti hale ti wali ni. Tongaso, hale ni ayeke Jésus Christ nga na azo 144 000 so ayeke komande ande legeoko na lo (Apoc. 14:1). Ala kue ayeke gi ti pensé nga ti sara ye tongana Babâ ti ala, Jéhovah Nzapa.
10 So e hinga awe azo so Genèse 3:15 aye ti sara tënë ti ala, zia e bâ kete tongana nyen la Jéhovah asara si yeke yeke prophétie so aga tâ tënë nga tongana nyen la e yeke bâ nzoni dä.
PROPHÉTIE NI AGA TÂ TËNË TONGANA NYEN?
11. Na lege wa la a dë lani “peko ti gere” ti hale ti wali ni?
11 Prophétie so ayeke na Genèse 3:15 atene so ngbo ni ayeke ‘dë peko ti gere ti’ hale ti wali ni. Prophétie so aga lani tâ tënë na ngoi so Satan apusu aJuif nga na azo ti Rome ti fâ Molenge ti Nzapa (Luc 23:13, 20-24). Tongana ti so zo awara kä na peko ti gere ti lo teti mbeni ngoi lo peut ti tambela ape, so Jésus akui nga a lu lo, teti mbeni kete ngoi lo peut lani ti sara ye oko ape.—Mat. 16:21.
12. Lawa la ayeke neka ande li ti ngbo ni? A yeke neka ni tongana nyen?
12 Ti tene prophétie so ayeke na Genèse 3:15 aga tâ tënë, Jésus adoit ti ngbâ na yâ ti dû ti kuâ ape. Ngbanga ti nyen? Ngbanga ti so prophétie ni atene so hale ni ayeke neka li ti ngbo ni. Ye so aye ti tene so a doit ti zingo Jésus na kuâ. Na a zingo lo biani. Lango ota na peko ti kuâ ti Jésus, a zingo lo, lo ga mbeni yingo so apeut ti kui encore ape. Na ngoi so Nzapa afa, Jésus ayeke futi ande Satan (aHéb. 2:14). Christ nga na azo so ayeke komande legeoko na lo ayeke futi ande awato ti Nzapa, so ti tene, hale ti ngbo ni.—Apoc. 17:14; 20:4, 10.d
E YEKE BÂ NZONI NA LEGE TI PROPHÉTIE SO TONGANA NYEN?
13. So prophétie so ayeke ga tâ tënë, e bâ nzoni dä tongana nyen?
13 Tongana mo yeke mbeni wakua ti Nzapa, mo yeke bâ nzoni na lege ti gango tâ tënë ti prophétie so. Jésus aga lani na sese tongana zo. Lo sara ye tâ gï tongana Babâ ti lo (Jean 14:9). Tongaso, na lege ti lo e hinga Jéhovah Nzapa nga e ye lo. E yeke bâ nga nzoni na lege ti afango ye ti Jésus nga na fango lege so lo yeke fa laso na congrégation ti aChrétien. Lo fa na e tongana nyen ti vivre na mbeni lege so azia ngia na bê ti Jéhovah. Nga, so a dë peko ti gere ti Jésus, wala a fâ lo, e kue e peut ti bâ nzoni dä. Na lege wa? Na peko ti so Jésus akui nga Jéhovah azingo lo na kuâ, Jéhovah ayeda na sandaga ti Molenge ti lo so ayeke mbilimbili-kue so “asukula e na a zi asiokpari kue awe.”—1 Jean 1:7.
14. Tongana nyen la e hinga so prophétie so Jéhovah atene lani na Éden aga tâ tënë na ngoi ni kâ ape? Fa ndani so mo tene tongaso.
14 Tënë so Jéhovah atene lani na Éden afa so ambeni ngoi ayeke hon si prophétie ni aga tâ tënë kue. A yeke mû ngoi ti tene wali ni adü hale so a mû zendo ti lo, ti tene Zabolo abungbi azo so ayeke mû peko ti lo nga ti tene kengo terê abâ gigi na popo ti agroupe use so. Tongana e mä yâ ti prophétie so, a yeke aidé e ndali ti so a fa na e so azo ti dunia so, so Satan ayeke komande na ndö ni, ayeke ke awakua ti Jéhovah. Ambeni ngoi na pekoni, Jésus atene mara ti tënë so na adisciple ti lo (Marc 13:13; Jean 17:14). E bâ biani gango tâ tënë ti mbage ti prophétie so, mbilimbili na yâ ti angu 100 so ahon. Na lege wa?
15. Ngbanga ti nyen la laso dunia ake hale ti wali ni mingi ahon ti kozo? Ngbanga ti nyen la e yeke na raison oko ape ti sara mbeto ti Satan?
15 Kete na peko ti so a zia Jésus Gbia na yayu na ngu 1914, a tomba Satan kâ. Laso, lo yeke gï na sese ge, lo yeke ku ngoi so a yeke futi lo (Apoc. 12:9, 12). Me lo duti gï tongaso lo yeke ku ape. Satan ayeke na ngonzo mingi na lo yeke sara bira na awakua ti Nzapa (Apoc. 12:13, 17). Ndani la, dunia ti Satan ake encore mingi awakua ti Nzapa. Me e yeke na raison oko ape ti sara mbeto ti Satan nga na azo so amû peko ti lo. Tënë ti bê ti e apeut ti gue oko na ti bazengele Paul so lo tene: “Tongana Nzapa ayeke na e, zo wa la si ayeke ke e ande?” (aRom. 8:31). E peut ti sara confiance kue na Jéhovah ndali ti so, tongana ti so e bâ fade, kota mbage ti prophétie so ayeke na Genèse 3:15 aga tâ tënë awe.
16-18. So Curtis, Ursula nga na Jessica amä yâ ti Genèse 3:15, ala bâ nzoni dä tongana nyen?
16 Zendo ti Jéhovah so ayeke na Genèse 3:15 apeut ti aidé e ti hon ndö ti akpale kue so e wara. Curtis, so asara kua ti missionnaire na Guam, atene: “Na ambeni ngoi, aye so asi na yâ ti fini ti mbi asara si a yeke ngangu na mbi ti ngbâ be-ta-zo na Jéhovah. Me gbungo li na ndö ti prophétie so ayeke na Genèse 3:15 a-aidé mbi ti ngbâ ti sara confiance na Babâ ti mbi ti yayu.” Curtis ayeke ku kungo lango so Jéhovah ayeke zi ande akpale ti e kue.
17 Mbeni ita-wali na Bavière, so iri ti lo ayeke Ursula, atene so, so lo mä yâ ti Genèse 3:15 a-aidé lo ti hinga na bê ti lo kue so a sû Bible na gbe ti yingo ti Nzapa. Lo bâ tongana nyen la tanga ti aprophétie kue ague oko na prophétie so, na a pika bê ti lo mingi. Lo tene nga, lo tene: “Na ngoi so mbi hinga lani so Jéhovah asara mbeni ye hio ti mû na e beku, a sara si mbi ye lo encore mingi.”
18 Jessica, so ayeke na Micronésie, atene: “Mbi ngbâ ti dabe ti mbi na terê ti mbi so anzere lani na ngoi so ti kozoni mbi bâ so mbi wara tâ tënë awe. Prophétie so ayeke na Genèse 3:15 ayeke ga lani tâ tënë. A aidé mbi ti girisa ape so aye so ayeke sara e pasi laso so ayeke aye so Jéhovah aye lani ndali ti e ape. Prophétie so asara nga si mbi hinga na bê ti mbi kue so ti sara na Jéhovah asara si mbi duti na fini so ayeke nzoni laso nga, na yâ ti angoi so ayeke ga, mbi yeke duti ande na fini so ayeke nzoni mingi.”
19. Ngbanga ti nyen la e peut ti duti sûr so ndangba mbage ti prophétie ni ayeke ga ande tâ tënë?
19 Tongana ti so e bâ fade, Genèse 3:15 angbâ ti ga tâ tënë. A hinga hale ti wali ni nga na hale ti ngbo ni polele awe. Jésus, so ayeke kota mbage ti hale ti wali ni, awara sava na peko ti so a dë peko ti gere ti lo na fadeso lo yeke ngangu Gbia so alingbi ti kui ape. Sorongo azo so ayeke use mbage ti hale ti wali ni aga nduru ti hunzi awe. So kozo mbage ti prophétie ni aga tâ tënë awe, e yeke sûr so ndangba mbage ni, so andu nekango li ti ngbo ni, ayeke ga nga tâ tënë. Awakua ti Nzapa ayeke duti ande na ngia mingi na ngoi so a futi Satan. Ti ku na ngoi ni so, découragé ape. Nzapa alingbi ti tene e sara confiance na lo. Na lege ti hale ti wali ni, lo yeke ga ande na gbâ ti anzoni ye na “amara kue ti sese”.—Gen. 22:18.
BIA 23 Jéhovah ato nda ti komande
a E yeke mä yâ ti atënë ti Bible nzoni tongana e comprendre prophétie so ayeke na Genèse 3:15. Ti manda prophétie so apeut ti kpengba mabe ti e na Jéhovah nga ti sara si e duti na confiance mingi so lo yeke sara ye alingbi na azendo ti lo kue.
b Bâ Ambeni tënë: Mbage B1, “Atënë so ayeke na yâ ti Bible,” na yâ ti Mbeti ti Nzapa ti fini dunia.
c Bâ encadré “Azo so Genèse 3:14, 15 aye ti sara tënë ti ala.”
d Bâ encadré “Ambeni kota ye so asi so asara si Genèse 3:15 aga tâ tënë.”