Ala sara ye yeke na mbage ti ambeni prêtre so ngonzo asara ala ngangu

Artur, so ayeke mbeni surveillant ti circonscription na Arménie, ague ti sara vizite na mbeni congrégation ti aTémoin ti Jéhovah. Lo ga ti bâ so congrégation ni ade ti komanse ti fa tënë ti Nzapa na lege ti aprésentoir ape. Ti encouragé ala ti tara kode ti fango tënë ni so, Artur na wali ti lo, Anna, nga na mbeni Témoin ti Jéhovah ni so iri ti lo ayeke Jirayr, ague afa tënë na présentoir na yâ ti mbeni kete kodro. Ala zia ni na mbeni ndo so azo ayeke hon dä mingi na gere.

Azo so ayeke hon na lege akomanse ti ga na terê ti présentoir ni na ala mû ambeti. Me mo ye ti bâ, ambeni zo so aye aTémoin ti Jéhovah ape kue abâ présentoir ni. Ambeni prêtre use aga na terê ti présentoir ni, na mbeni oko aga gï droit lo botté présentoir ni na sese. Na pekoni, lo giflé Artur, na lunette ti Artur atï na sese. Artur, Anna nga na Jirayr atara ti calmé aprêtre ni, me kue gbä. Aprêtre ni adö yâ ti présentoir ni nga ala tuku ambeti ni kirikiri. Na pekoni, ala zonga aTémoin ti Jéhovah ni nga ala menacé ala, na ala mû lege ala hon.

Artur, Anna nga na Jirayr angbâ ague na ndokua ti lapolice ti sara plainte. Ala fa ye so apassé nga ala sara tënë kete na ndö ti Bible na ambeni turugu ti lapolice ni nga na ambeni zo nde so asara kua na yâ ni. A ngbâ a mû aTémoin ti Jéhovah ota so a gue na ala na yâ ti bureau ti kota zo ti lapolice ni. Kozoni, kota zo ti lapolice ni aye gï ti hinga ye so apassé. Me na ngoi so lo mä so Artur, so ayeke mbeni zo so ayeke na gaba, asara ye oko ape na ngoi so a giflé lo, kota zo ti lapolice ni angbâ a-arrêté ti hunda tënë na lo na ndö ti ye so apassé, na lo gi fadeso ti hinga ye na ndö ti aye so aTémoin ti Jéhovah amä na bê na ni. A-Témoin ti Jéhovah ni asara lisoro na lo l’heure osio! Atënë so ala tene na lo andu bê ti lo ngangu mingi asara si lo tene: “Bungbi ti Nzapa ti ala ayeke tâ nde mingi! Mbi nga kue mbi ye ti gue dä!”

Na ndade ni, na temps so Artur akiri akomanse ti fa tënë na présentoir, mbeni mbakoro-koli so lo kue lo bâ aye so aprêtre ni asara so, aga na mbage ti Artur. Koli ni agonda Artur ndali ti so lo duti kpo nga lo tiri na aprêtre ni ape. Lo tene so ye so lo bâ so asara si lo yeke ne encore aprêtre ape.

Na lakui ni, kota zo ti lapolice ni airi Artur ti gue encore na ndokua ti lapolice ni. Me ahon ti tene lo sara lisoro na Artur na ndö ti kpale so asi, lo hunda na lo tënë mingi na ndö ti Bible. Ambeni turugu ti lapolice ni use aga atï nga na yâ ti lisoro ni.

Na ndade ni, Artur akiri aga abâ kota zo ti lapolice ni, me ti so ni so lo fa na lo ambeni vidéo ti e so atënë ti yâ ni alondo na Bible. Kota zo ti lapolice ni angbâ airi ambeni turugu ti lapolice ni ti ga ti bâ nga avidéo ni.

Sioni sarango ye ti aprêtre so asara si gbâ ti azo ti lapolice amä nzoni tënë ti Royaume; na a yeke ti kozo ni ti tene ala mä ni la. Ye so ala mä so asara si ala bâ aTémoin ti Jéhovah na nzoni lê.