Jéhovah ayeke dë bê ti azo so ayeke na yâ ti vundu. Tongana nyen la e peut ti mû tapande ti Jéhovah ti bâ mawa ti azo nga ti dë bê ti ala? Mbeni lege so e peut ti sara ni ayeke ti gi ti duti na asarango ye so ayeke aidé e ti bâ mawa ti azo nga ti dë bê ti ala. Ambeni sarango ye ni ayeke so wa? Nyen la ayeke aidé e ti ngbâ ti ye terê nga ti “ngbâ ti dë bê ti mba” lâ na lâ? (1 aThes. 4:18). E bezoin ti hinga ti zia terê ti e na place ti mba, ti ye terê na popo ti e na yengo terê ti aita nga ti sara nzoni na zo (aCol. 3:12; 1 Pi. 3:8). Asarango ye so ayeke aidé e tongana nyen? Tongana e bâ mawa ti aita ti e nga e pensé na ala biani, e yeke ye mingi ti dë bê ti ala na ngoi so ala yeke bâ pasi. Jésus atene: “Yanga ayeke sara tënë ti ye so asi singo na bê ti zo. Zo ti nzoni asigi na aye ti nzoni so ayeke na yâ ti nzoni mosoro ti lo.” (Mat. 12:​34, 35). Ti dë bê ti aita so abezoin dengo bê ayeke biani mbeni kpengba fason ti fa so e ye ala. w23.11 10 par. 10-11

Tongana e ye ti mä yâ ti aprophétie ti Bible, e doit ti hunda mungo maboko. Bâ tapande so. Imaginé so mo gue ti bâ mbeni ndo so mo hinga ni ape, me mbeni kamarade ti mo so ahinga ndo ni nzoni ayeke na terê ti mo. Lo hinga mbilimbili ndo so ala yeke dä nga lo hinga ndo so lege oko oko kue ayeke gue dä. Kite ayeke dä ape so a yeke nzere na mo so kamarade ti mo ni ayeda ti tene mo na lo ague. Jéhovah ayeke tongana nzoni kamarade so, lo hinga nzoni mingi ye so ayeke si na e kekereke. Tongaso, ti mä yâ ti aprophétie ti Bible, e doit ti sara terê ti e kete e hunda lo ti aidé e (Dan. 2:28; 2 Pi. 1:​19, 20). Tongana ti mbeni nzoni babâ, Jéhovah aye ti tene kekereke ti amolenge ti lo aduti nzoni (Jér. 29:11). Me nde na ababâ so ayeke azo, Jéhovah apeut ti fa na e tâ na lege ni ye so ayeke si kekereke. Lo sara si a sû na yâ ti Bible aprophétie tongaso si e peut ti hinga ye na ndö ti akota ye so ayeke si kozo si asi.—És. 46:10. w23.08 8 par. 3-4

Nzapa amû ngangu na Jésus ti leke akpale kue so azo awara. Na lege ti amiracle so Jésus asara, lo fa so lo yeke na ngangu ti leke akpale so e peut ti leke ni lâ oko ape. Na tapande, lo yeke na ngangu ti zi ye so ayeke na gunda ti akpale ti azo, so ti tene, siokpari nga na aye ti peko ni so ayeke kobela nga na kuâ (Mat. 9:​1-6; aRom. 5:​12, 18, 19). Amiracle ti lo afa so lo peut ti sava “mara ti akobela nde nde kue” nga lo peut même ti zingo akuâ (Mat. 4:23; Jean 11:​43, 44). Lo yeke nga na komandema na ndö ti akota pupu nga lo tomba asioni yingo na yâ ti azo (Marc 4:​37-39; Luc 8:2). So e hinga so Jéhovah amû mara ti ngangu so na Molenge ti lo, a dë bê ti e mingi. E peut ti duti biani na confiance so anzoni ye so Nzapa amû zendo ti ga na ni na yâ ti Royaume ayeke si ande biani. Amiracle so Jésus asara na ngoi so lo yeke lani na sese afa na e aye so lo yeke sara ande na ndö ti sese kue ndali ti so lo yeke Gbia ti Royaume ti Nzapa. w23.04 3 par. 5-7