Jésus asara kozo miracle ti lo na ngoi ti mbeni mariage

A sara fadeso lango ota awe la si Nathanaël aga mbeni oko ti akozo disciple ti Jésus. Jésus amû ambeni disciple ti lo, lo na ala ague na nord ti Galilée, ndo so ala kue akono dä. Ala gue na gbata ti Cana, kodro ti Nathanaël. Cana ayeke na yâ ti ahoto na nord ti Nazareth, ndo so Jésus akono dä. A tisa ala na mbeni matanga ti mariage na Cana.

Mama ti Jésus nga kue ague na matanga ni so. Marie ayeke kamarade ti afami ti azo so asara mariage ni so, âmanke lo bi tere ti lo na yâ ti kua ti mungo kobe na sämba na gbâ ti agene so aga na matanga ni so. Tongaso, lo bâ hio so mbeni ye amanke na lo tene na Jésus, lo tene: “Azo ni ayeke na vin ape.”—Jean 2:3.

Marie aye ti tene so a yeke nzoni Jésus sara mbeni ye, ngbanga ti so vin ahunzi. Jésus atene na lo mbeni tënë na kode, ti fa so lo ye ape, lo tene: “Wali, ti mbi na mo nyen na yâ ni?” (Jean 2:4). Nzapa la azia Jésus Gbia, na a yeke na Nzapa ti fa na Jésus ye so lo doit ti sara, pëpe azo ti sewa ti lo wala akamarade ti lo la adoit ti fa ni na lo. Na ndara, Marie azia ye ni kue na yâ ti maboko ti molenge ti lo, na lo tene na azo so ayeke kangbi kobe na sämba, lo tene: “Ye kue so lo tene na ala, ala sara ni.”—Jean 2:5.

Ambeni kota ta ti tênë omene ayeke na place ni so. Ta oko apeut ti mû ahon litre 40 tongaso. Jésus atene na azo so ayeke kangbi kobe na sämba, lo tene: “Ala tuku ngu asi yâ ti akota ta so.” Na pekoni, lo tene: “Ala tö mbeni ala gue na ni na zo ti bango ndo na ndo ti matanga ni.”—Jean 2:7, 8.

Pendere ti vin ni asara si bê ti zo so ayeke bâ ndo na ndo ti matanga ni adö mingi, me lo hinga ape so a wara vin so na lege ti miracle. Lo ngbâ lo iri koli so alondo ti sara mariage fini fini, na lo tene na lo, lo tene: “Azo ayeke kangbi ka nzoni vin kozoni, na tongana azo asoulé awe si a yeke kangbi na ala vin so ayeke nzoni mingi ape. Me ti mo, mo bata nzoni vin ni juska fadeso.”—Jean 2:10.

A yeke kozo miracle so Jésus asara la. Tongana adisciple ti lo abâ miracle ni so, mabe ti ala na mbage ti lo akpengba. Na pekoni, Jésus, mama ti lo nga na aita ti lo ti koli, ague na Capernaüm, gbata so ayeke na nord-ouest ti yanga ti Kota ngu ti Galilée.