Mo Sala Awe si Tâ Tene Aga Ye ti Mo Mveni?

“I gbian lege ti i na lege ti bibe ti fini, si i lingbi hinga ye so Nzapa aye, ye so ayeke nzoni, ye so alingbi na lê ti Lo, na ye so alingbi kue.”​—AROMAIN 12:2.

1, 2. Ngbanga ti nyen a yeke ngangu ti duti mbeni tâ Chrétien laso?

TI DUTI mbeni tâ Chrétien na lâ ti nda ni ti “ngoi ti kpale na ti ngangu” so ayeke kete ye pepe. (2 Timothée 3:1) Ye ni ayeke so, ti mu tapande ti Christ, a lingbi zo ahon sese so na ngangu. (1 Jean 5:4) Dabe mo na ye so Jésus atene na ndo lege ti Chrétien: “I lï na kete yanga-da ni; teti lege so ayeke kota na akono ayeke gue na futingo, na azo mingi alï na lege so; me yanga-da so ayeke kete na lege so akono pepe ague na fini, na azo so awara ni ayeke mingi pepe.” Lo tene nga: “Tongana mbeni zo aye ti ga na peko ti mbi, zia lo ke tele ti lo mveni na lo yö keke ti pasi ti lo lâ na lâ na lo mu peko ti mbi lakue.”​—Matthieu 7:13, 14; Luc 9:23, NW.

² Teti so lo wara awe kete lege so ague na fini, ye so a lingbi mbeni Chrétien ahon ndo ni na pekoni ayeke ti ngbâ dä. Ngbanga ti nyen a yeke mbeni ye ti hon ndo ni? Ngbanga ti so mungo tele ti e na Nzapa nga na batême ti e asala si e ga ye so Satan agi ti gbu na lege ti akusala ti mayele ti lo wala alege ti handa ti lo. (aÉphésien 6:11, NW; kete tene na gbe lembeti) Lo yeke ba mbilimbili awokongo ti e na lo yeke gi ti sala kusala na ni ti buba dutingo ti e na lege ti yingo. Teti biani, lo tara la ni ti sala si Jésus atï, ngbanga ti nyen lo yeke zia e kpö?​—Matthieu 4:1-11.

Akusala ti Mayele ti Satan

3. Tongana nyen Satan alu la ni akite na yâ bibe ti Ève?

³ Mbeni kode so Satan ayeke sala kusala na ni ayeke ti lu akite na yâ bibe ti e. Lo yeke gi awokongo na yâ ye ti e ti yingo ti bata tele na yâ bira. Gi na tongo nda ni giriri, lo sala kusala na kode so na mbage ti Ève, tongana lo hunda na lo: “Biani, Nzapa atene, Mo lingbi te le-keke kue ti yaka pepe?” (Genèse 3:1) Ti tene ni nde, Satan ayeke tene la ni: ‘Nzapa alingbi biani ti zia mara ti ndia tongaso na ndo mo? Lo yeke gbanzi na mo mara ti nzoni ye mingi tongaso? Biani, Nzapa ahinga so gi na lâ ni so mo yeke te le-keke so, lê ti mo ayeke zi, na mo yeke ga tongana Nzapa, na hingango nzoni na sioni!’ Satan alu mbeni kite na yâ bibe ti Ève, na lo ku ti ba tongana nyen a yeke maï.​—Genèse 3:5.

4. Atene ti kite wa alingbi ti sala ngangu na ndo ambeni zo laso?

⁴ Tongana nyen Satan ayeke sala kusala na kode so laso? Tongana e bi bê pepe na dikongo Bible ti e, mandango ye ti e mveni, asambela ti e, kusala ti e ti fango tene nga na abungbi ti e ti Chrétien, e lingbi peut-être ti zi lege si kite so ambeni zo asigigi na ni alï na yâ bibe ti e. Na tapande: “E hinga tongana nyen so ye so ayeke tâ tene so Jésus afa ni la ni?” “So ayeke tâ lâ ti nda ni biani? Teti biani, e lï fadeso awe na yâ siècle 21.” “E yeke ndulu mingi na Harmaguédon, wala a ngbâ yongoro mingi?” Tongana mara ti akite tongaso alondo, ye nyen e lingbi ti sala ti lungula ni?

5, 6. Ye nyen e lingbi ti sala tongana akite aye ti londo?

⁵ Jacques amu la ni awango so alingbi tongana lo sû na mbeti: “Me tongana mbeni zo na popo ti i amanqué ndara, a lingbi lo hunda Nzapa, Lo so amu ye na azo kue senge senge, Lo zingo na ala pepe, na fade Lo mu na lo. Me a lingbi lo hunda na mabe, na kite pepe; teti lo so adë kite ayeke legeoko tongana mapo ti kota ngu ti ingo so pupu aïa, na a yengi kirikiri. A lingbi zo tongaso atene na bê ti lo pepe, fade lo wara mbeni ye na tïtî Seigneur; lo yeke zo ti bê use, na lo yeke kirikiri na lege ti lo kue.”​—Jacques 1:5-8.

⁶ Tongaso, a lingbi e sala nyen? A lingbi e “hunda Nzapa” na yâ sambela ti wara mabe na gbungo nda ti ye, na e kpengba angangu ti e na yâ mandango ye e mveni na ndo ahundango tene wala akite kue. E lingbi nga ti hunda mungo maboko ti ala so ayeke ngangu na yâ mabe, na dutingo na kite oko pepe so fade Jéhovah ayeke mu maboko na e alingbi na ye so e ye. Jacques atene nga: “Tongaso i mä Nzapa, me i ke Diable, na fade lo kpe i. I ga ndulu na Nzapa, na fade Lo ga ndulu na i.” Biani, akite ti e ayeke glisa ande tongana e ga ndulu na Nzapa na lege ti mandango ye na sambela.​—Jacques 4:7, 8.

7, 8. Ambeni kpengba lege ti hinga vorongo so Jésus afa giriri ayeke so wa? Na azo wa laso asala ye alingbi na ni?

⁷ Na tapande, hunda tene so: Tongana nyen e hinga so e yeke na yâ vorongo so Jésus afa la ni? Ti kiri tene na ni, aye wa a lingbi e gi ti ba? Bible afa so a lingbi atâ Chrétien aduti na tâ ndoye na popo ti ala. (Jean 13:34, 35) A yeke nzoni ala sala si iri ti Nzapa, Jéhovah, aga nzoni-kue. (Esaïe 12:4, 5; Matthieu 6:9) Na a lingbi ala sala si azo hinga iri so.​—Exode 3:15; Jean 17:26.

⁸ Mbeni ye so na lege ni a lingbi ti hinga tâ lege ti vorongo ayeke bango na nene ni Tene ti Nzapa, Bible. A yeke gi oko buku so afa na gigi asalango ye ti Nzapa na aye so lo leke na bê ti lo ti sala. (Jean 17:17; 2 Timothée 3:16, 17) Na ndo ni, atâ Chrétien ayeke fa Royaume ti Nzapa tongana gi oko beku ti zo teti fini ti lakue lakue na ndo mbeni sese so aga paradis. (Marc 13:10; Apocalypse 21:1-4) Ala duti nde na aye ti poroso ti sese so abuba awe nga na sioni lege ti tambela ti lo. (Jean 15:19; Jacques 1:27; 4:4) Azo wa laso asala ye alingbi na aye so afa ge? Aye afa so kiringo tene na hundango tene so ayeke gi oko: aTémoin ti Jéhovah.

Ka Tongana Akite ni Angbâ Lakue?

9, 10. E lingbi ti sala nyen ti hon ndo ti akite so angbâ lakue?

⁹ Ka tongana e yeke na akite mingi mingi, e lingbi ti sala nyen ti hon ndo ni? Gbia ti ndara Salomon akiri tene: “Molenge ti mbi, tongana mo wara ande atene ti mbi na tongana mo bata akomandema ti mbi nzoni na tele ti mo, tongaso si mo dengi mê ti mo ti mä tene ti ndara, si mo leke bê ti mo ti ba nda ti ye; nga, tongana mo toto ti hinga nda ti ye nga tongana mo dekongo ti ba nda ti ye, tongana mo ngbâ ti gi ni tongana argent, nga si mo kiri mo gi ni lakue tongana mosoro so ahonde, tongaso, fade mo hinga nda ti kpengo mbito ti Jéhovah, na fade mo wara tâ hingango ye ti Nzapa.”​—aProverbe 2:1-5, NW.

¹⁰ So ayeke pepe tene ti dongo bê? Tongana e yeke ndulu ti dengi mê kue na ndara ti Nzapa, fade e yeke “wara tâ hingango ye ti Nzapa.” Biani, e lingbi biani ti wara hingango ye ti Seigneur Gbia ti ndagigi tongana e yeke ndulu ti mä na ti ba tongana ye ti ngele ngangu atene ti lo. So ahunda ti bi lê na mbage ti Jéhovah na yâ sambela nga na lege ti mandango ye e mveni. Amosoro so ahonde ti Tene ti Lo alingbi ti lungula akite kue na ti mu maboko na e ti ba lumière ti tâ tene.

11. Tongana nyen kite asala ngangu na ndo wakua ti Élisha?

¹¹ A wara na 2 aGbia 6:11-18 mbeni tapande so afa polele tongana nyen sambela amu maboko na mbeni wakua ti Nzapa so asala mbito na so ade kite. Tâ bango ye na lege ti yingo atia wakua ti Élisha. Lo lingbi la ni pepe ti ba so aturugu ti yayu ayeke dä ti mu maboko na prophète ti Nzapa so aturugu ti Syrie ase kando na tele ti lo. Na mbito, wakua ni adekongo: “Aï, mveni ti mbi! Fade e sala nyen?” Tongana nyen Élisha akiri tene? “Sala mbito pepe, teti ala so ayeke na e ayeke mingi ahon ala so ayeke na ala.” Me tongana nyen wakua ni alingbi ti mä na bê dä? Lo lingbi pepe ti ba aturugu ti yayu so.

12. (a) Tongana nyen akite ti wakua ti Élisha ahon? (b) Tongana nyen e lingbi ti hon ndo ti akite kue so e lingbi ti wara?

¹² “Élisée asambela, lo tene, L’Eternel [“Jéhovah,” NW], mbi hunda Mo, Mo lungula lê ti lo si lo lingbi ba ndo. L’Eternel alungula lê ti pendere koli so, lo ba ndo, na ba, ambarata na apuse ti mbarata ti wa asi singo na hoto na tele ti Élisée.” Na yâ tapande so, Jéhovah asala si wakua ni aba aturugu ti yayu so ayeke bata Élisha. Ye oko, a lingbi e ku pepe ti wara mara mungo maboko ti Nzapa tongaso laso. E dabe ti e, wakua ti prophète so ayeke la ni pepe na Bible kue ti manda ni ti tene akpengba mabe ti lo. Me e, e yeke na Bible. Tongana e sala kusala na ni nzoni, mabe ti e alingbi ti kpengba legeoko tongaso nga. Na tapande, e lingbi ti gbu li ngangu na ndo ambaï nde nde so afa Jéhovah na yâ sedu ti lo ti yayu. Salango tongaso ayeke fa biani so Jéhovah ayeke na mbeni bungbi na yayu so ayeke mu maboko na awakua ti lo laso na yâ kusala ti fango ye na ndo sese kue.​—Esaïe 6:1-4; Ezéchiel 1:4-28; Daniel 7:9, 10; Apocalypse 4:1-11; 14:6, 7.

Hange na Akusala ti Mayele ti Satan!

13. Na lege ti nyen Satan ayeke tara ti woko lege so e yeke gbu na tâ tene ngangu?

¹³ Ambeni lege nde so Satan ayeke sala na kusala ti woko dutingo ti e na lege ti yingo nga na lege so e yeke gbu tâ tene ngangu ayeke so wa? Mbeni oko ti lege ni ayeke ye ti pitan, na yâ ambage ni nde nde kue. Na yâ sese ti laso, so bungbingo ti koli na wali agbu bê ti azo mingi, ye so a hiri ni dutingo na andeko na gigi (tene so aga na place ti dutingo be-ta-zo pepe na koli wala na wali) wala salango pitan gi teti bï oko (pitan so a sala lakue pepe) aga ye so mbeni wagame so azia bê ti lo kue gi na ngia, na so asala ngangu kue gi ti wara nzoni ngoi, ayeke sala lâ na lâ. Alimon, télévizion, na vidéo ayeke maï mara ti tambela so. Ambeti na atene so andu bungbingo ti koli na wali amu yâ ti asango, mbilimbili Internet. Tara ayeke ku azo so aye ti hinga ye na ndo ni.​—1 aThessalonicien 4:3-5; Jacques 1:13-15.

14. Ngbanga ti nyen ambeni Chrétien atï na gbe ti ahanda ti Satan?

¹⁴ Ambeni Chrétien azia lege na nzala ti hingango aye ti ala ti hon ndo ti ala, na ala sala si bibe na bê ti ala abuba na lege ti bango afoto so afa na mayele bungbingo koli na wali wala même afoto so afa ni polele mingi ahon. Ala tï ala mveni na yâ son ti handa ti Satan. Fani mingi, salango tongaso asala si mingi atï na lege ti yingo tongana mangboko so atï na ngu. Amara ti azo tongaso angbâ pepe ti “duti foroto” teti “ye ti sioni.” Ala ga pepe ‘abiazo na lege ti angangu ti gbungo nda ti ye ti ala.’ (1 aCorinthien 14:20) Ngu oko oko, azo saki mingi ayeke ba pasi na peko ti batango pepe akpengba-ndia na alege ti tambela ti Tene ti Nzapa. Ala bi bê pepe ti yü na ti bata “aye kue ti bira ti Nzapa.”​—aÉphésien 6:10-13, NW; aColossien 3:5-10; 1 Timothée 1:18, 19.

Zia E Ba na Nene ni Ye so E Yeke na Ni

15. Ngbanga ti nyen ambeni zo alingbi ti ba so a yeke ngangu na ala ti yekia ye ti héritier ti ala na lege ti yingo?

¹⁵ Jésus atene: “Fade i hinga tâ tene, na fade tâ tene azi i.” (Jean 8:32, NW) La ni a lingbi mingi ti aTémoin azia lege ti ngbele tambela ti ala na vorongo ti ala. Tongaso, ala lingbi ti duti ndulu ti yekia liberté so tâ tene aga na ni. Na mbeni mbage, ambeni pendere so awara fango lege ti ababâ na mama so ayeke na yâ tâ tene alingbi peut-être ti ba so a yeke ngangu na ala ti yekia ye ti héritier ti ala ti yingo. Ala mu mbage ti ala lâ oko pepe na lege ti vorongo ti wataka wala na sese so na kota nzala ti lo ti ngia, dutingo ti lo tongana ngba ti nyongo mbangi, na ye ti pitan ti lo. Ye ti pekoni ayeke so ala lingbi peut-être ti ba pepe kota kangbi so ayeke na popo ti paradis ti e ti yingo na sese ti sioni ti Satan. Ambeni alingbi peut-être ti tï na gbe ti tara ti ndu kete sioni yorö ti sese so ti hinga ye so ala de ti tara pepe!​—1 Jean 2:15-17; Apocalypse 18:1-5.

16. (a) Ahundango tene wa e lingbi ti hunda na tele ti e? (b) Ye nyen a fa na e na a wa e ti sala?

¹⁶ A hunda na e ti zö na wâ ali ti maboko ti e ti hinga songo ti ye nga na pasi? E lingbi pepe ti manda ye na lege ti asioni ye so asi na yâ fini ti ambeni zo? A hunda na e ti kiri na yâ “potopoto” ti sese so ti ba wala e glisa mbeni ye wala pepe? (2 Pierre 2:20-22) Pierre adabe ti aChrétien ti kozo siècle so amu mbage ti ala giriri na sese ti Satan: “Teti lâ ti salango ye so aGentil aye alingbi awe, lâ ti tambela na ye ti pitan, nzala ti tele nde nde, nyongo vin, pumba kirikiri, nyongo samba, na sambelango ayanda na lege so ake ndia.”Biani, a hunda na e pepe ti tara ‘salango sioye mingi’ ti sese so ti ba tongana nyen fini abuba. (1 Pierre 4:3, 4) Nde na so, na yâ aDa ti Royaume ti e so ayeke ndo ti fango ye na ndo Bible, a yeke fa na e andia ti kota ahon ti Jéhovah na ndo tambela. Na, a wa e ti sala kusala na ngangu ti bibe ti e ti fa na e mveni so e yeke na tâ tene, na tongaso e yeke sala si tâ tene aga ye ti e mveni.​—Josué 1:8; aRomain 12:1, 2; 2 Timothée 3:14-17.

Iri ti E Ayeke Pepe Gi Mbeni Senge Iri

17. Tongana nyen e lingbi ti ga aTémoin ti Jéhovah so alë lengo na yâ kusala ti ala?

¹⁷ Tongana e sala si tâ tene aga ye ti e mveni, fade e yeke gi ti kangbi ni na ambeni zo na angoi kue so alingbi. So aye ti tene pepe so e yeke tara ande ti gbu na ngangu ala so asala nzala ti tâ tene ni pepe si ala mä ni. (Matthieu 7:6) Nde na so, e yeke duti na kamela pepe ti fa tele ti e tongana aTémoin ti Jéhovah. Tongana mbeni zo afa na gigi mbeni kete nzala teti tene ni na hundango atene na bê kue wala na yengo da na ambeti so aluti na ndo Bible, fade e yeke duti ndulu na e yeke leke tele ti e ti kangbi na lo beku ti e. Biani, so ahunda ti tene e duti lakue na mbeni mbeti na tele ti e atä ndo so e yeke duti dä: na yanga-da, na ndo-kua, na ekole, na ando ti vongo ye, wala na ando ti wungo tele.​—1 Pierre 3:15.

18. Tongana nyen fango tele ti e tongana aChrétien alingbi ti duti mbeni ngangu so asala kusala nzoni na yâ fini ti e?

¹⁸ Tongana e fa tele ti e polele tongana aChrétien, e yeke kpengba lutingo ti e na gbele asalango ngangu ti mayele ti Satan. Tongana a yeke ngoi ti mbeni matanga ti dungo wala ti Noël wala ti salango ngia ti nginza na ndo ti kua, mingi ni fade afon e ti kua ayeke tene: “E bi bê ti i na lo pepe. Lo yeke Témoin ti Jéhovah.” Teti oko tene so, tongana e yeke dä, azo alingbi peut-être pepe ti sala atene ti ngia ti saleté. Tongaso, fango tele ti e tongana Chrétien ayeke mbeni ngangu so asala kusala nzoni na yâ fini ti e, legeoko tongana ti so bazengele Paul agboto lê dä: “Na fade zo nyen asala i sioni, tongana i yeke na nzala ti sala ye ti nzoni? Me même tongana i hu pono teti ye ti mbilimbili, ngia ayeke na i.”​—1 Pierre 3:13, 14.

19. Tongana nyen e hinga so e lï mingi na yâ lâ ti nda ni?

¹⁹ Mbeni ye ti nzoni so aga na peko ti salango si tâ tene aduti ye ti e mveni ayeke so e yeke hinga na bê ti e kue so e yeke biani na lâ ti nda ni teti bungbi ti aye ti fadeso. Fade e yeke hinga so mingi ti aprophétie ti Bible asi na kota mbage ti gango tâ tene ti ala awe na ngoi ti e.a Akota ye ti ngangu so asi na yâ siècle so ahon ayeda biani na gbotongo mê ti Paul so atene “na lâ ti nda ni fade ngoi ti kpale na ti ngangu asi.” (2 Timothée 3:1-5, NW; Marc 13:3-37) Na ndo siècle 20, kota li ti tene ti mbeni mbeti-sango atene tongaso: “Fade A Yeke Dabe na ni Tongana Siècle ti Asalango Ye ti Sioni Mingi.” Article ni atene: “Ngu 1999 aga ngu so a fâ azo dä mingi ahon angu kue ti use ndambo ti siècle so a fâ azo dä mingi ahon.”

20. Fadeso a yeke ngoi ti sala kusala wa?

²⁰ Fadeso ayeke pepe ngoi ti gi bê. Deba nzoni ti Jéhovah asigigi polele na yâ kusala ti fango ye ti Bible ti kota ahon so asala ni lâ oko pepe na ndo sese, tongana tene ti témoin teti amara. (Matthieu 24:14) Sala tâ tene aga ye ti mo mveni, na kangbi ni na ambeni zo. Kekereke ti mo ti lakue lakue aga na lege ti ye so mo yeke sala laso. Ti woko na yâ kusala ayeke ga ande na deba nzoni ti Jéhovah pepe. (Luc 9:62) Nde na so, a yeke ngoi ti ‘duti kpö, ti zia ye ayengi i pepe, ti wu na kusala ti Seigneur lakue, teti i hinga kusala ti i ayeke senge pepe na yâ Seigneur.’​—1 aCorinthien 15:58.

[Kete Tene na Gbe Ni]

Mo Dabe Mo?

• Tongana nyen e lingbi ti tomba akite?

• E lingbi ti manda nyen na lege ti tapande ti wakua ti Élisha?

• A lingbi e sala hange lakue na atara wa so andu salango ye?

• Ngbanga ti nyen a lingbi e fa tele ti e polele tongana aTémoin ti Jéhovah?

[Foto na lembeti 19]

Mandango Bible lakue na sambela alingbi ti mu maboko na e ti lungula akite

[Foto na lembeti 20]

Ye so aba tongana suma alungula akite ti wakua ti Élisha

[Foto na lembeti 21]

A yeke fa na e andia ti kota ahon ti Jéhovah na ndo tambela na yâ aDa ti Royaume tongana ti so na Bénin