A-Témoin ti Jéhovah: Guengo na Li ni na Hingango Ye Biani na Bê!

Tondo ti Bungbi ti Ngu Oko Oko

NA ANGOI so laso azo ayeke na bibe ti kite, aTémoin ti Jéhovah aluti polele tongana aChrétien so ahinga ye biani na bê. Ye so asigigi polele na ngoi ti bungbi ti ngu oko oko ti Watch Tower Bible and Tract Society of Pennsylvania, na samedi lango 7 ti nze ti octobre ngu 2000 na Da ti Assemblée ti aTémoin ti Jéhovah na Jersey City, New Jersey.a

Na yâ ti akozo tene ti lo, président ni, John E. Barr, mbeni oko ti Wabatango Bungbi ti aTémoin ti Jéhovah, atene: “Na popo ti azo ngbundangbu mingi ti sese kue, e hinga fadeso na e mä na bê so Molenge ti Jéhovah, Christ Jésus, so lo ndoye mingi, ayeke na ndo mbata ti gbia na yayu, lo yeke komande na popo ti awato ti lo.” Na yâ ti atondo omene ti dongo bê so alondo na sese kue, fä ti hingango ye biani na bê tongaso asigigi la ni polele.

Hongo Ndo ti Salango Ye ti Ayingo Sioni na Lege ti Tâ Tene ti Bible na Haïti

Salango ye ti ayingo sioni amu ndo mingi na Haïti. John Norman, coordinateur ti Komite ti Filiale ni atene: “Mingi ni, azo ayeke sala vodou ti bata tele ti ala.” Mbeni zo ti likundu ato nda ti dë kite na ngoi so gere ti lo oko afâ na yâ ti mbeni ndao. Lo hunda tele ti lo: ‘Tongana ayingo ayeke bata mbi, tongana nyen si ye so alingbi ti si na mbi?’ Tongana ti so a sala na ambeni zo nde mingi nga, aTémoin ti Jéhovah afa tâ tene na koli so na a mu maboko na lo ti sigigi na gbe ti salango ye ti ayingo sioni. Ye so afa atene lege ayeke dä ti wara kota guengo na li ni na Haïti a yeke ti so na lango 19 ti nze ti avril ngu 2000, wungo ti azo so ague na Mémorial ti kuâ ti Christ ahon fani osio wungo ti awafango tene ti Royaume na yâ kodoro so.

Wâ na yâ Territoire ti Corée so Akono Mingi

Na Corée, tongana a mu aTémoin ti Jéhovah ngbangbo oko, 40 na popo ti ala ayeke na yâ kusala ti ngoi kue. Milton Hamilton, coordinateur ti Komite ti Filiale ni atene: “Na kota wungo ti awafango tene tongaso, fani oko na yâ nze e yeke hunzi territoire ti e so azo kutu 47 ayeke dä.” Guengo na li ni so asi na yâ ti akongrégation ti yanga ti azo ti kangango mê ayeke mbilimbili ye ti dongo bê. Na yâ ti mbeni circonscription oko ti yanga ti azo ti kangango mê, a mu li ni na amandango Bible 800. Wungo so ayeke ndulu na étude oko teti wafango tene oko. Ye ti mawa ni ayeke so, a ngbâ ti bi aita-koli so ade pendere na da ti kanga teti dutingo ti ala nde. Ye oko, na da ti kanga, a yeke sala nzoni na aChrétien be-ta-zo so, na mingi a yeke mu na ala kua ti sala ni, so a hunda mbeni zo so a zia bê na lo.

Ti Sala ye Alingbi na Guengo na Li ni na Mexique

Na nze ti août ngu 2000, mbeni kota wungo ti awafango tene 533 665 abi rapport ti kusala na Mexique. Wungo ti azo so ague na Mémorial ti kuâ ti Christ ahon fani ota wungo so. Robert Tracy, coordinateur ti Komite ti Filiale ni atene: “Ye so e zia na gbele e ti sala na ngu so ayeke ti leke aDa ti Royaume ahon 240.” Lo kiri lo tene: “Ye oko, e hunda ti wara mingi ahon so.”

Apendere na popo ti aTémoin ti Jéhovah na Mexique ayeke na nzoni tambela. Na ndo tene ti mbeni oko so ade pendere, mbeni prêtre ti Catholique atene: “Mbi ye gi ti wara mbeni zo oko tongana lo na popo ti azo so amu peko ti mbi. Mbi gonda azo so teti so ala leke na bê kue ti sala kusala na Bible na lege ti ndara. Ala mu mbage ti Nzapa, atä tongana salango tongaso azia fini ti ala na gbele kpale.”

Be-biani na yâ ti Wuluwulu na Sierra Leone

Ngbele ye na nze ti avril ngu 1991, na ngoi so bira na popo ti azo ti kodoro ato nda ni na Sierra Leone, a fâ azo saki mingi, a sala sioni na ala, wala abuba mbeni mbage ti tele ti ala. Bill Cowan, coordinateur ti Komite ti Filiale ni atene: “Bira na kpale asala ye ngangu na ndo ti azo. Azo mingi so kozoni asala pepe nzala ti tene ti e ayeke mä e fadeso na nzala ni. Fani mingi azo aga gi ala mveni ti lï na yâ Da ti Royaume ti e ti ga na kozo bungbi ti ala. Mingi ni na ndo lege a yeke hunda na aita ti luti na azo ahunda ti tene aita ni amanda Bible na ala.” Atä so wusuwusu angbâ ti gue na li ni na yâ kodoro ni, kusala ti fango tene ti Royaume ayeke lë lengo na Sierra Leone.

Kota Pialo ti Lekengo Ada na Afrika ti Mbongo

Na ndembe so, territoire so biröo ti filiale ti Afrika ti Mbongo ayeke ba lege ni ahunda ti wara aDa ti Royaume saki mingi. A leke awe ngbangbo mingi na popo ni. John Kikot, mbeni oko ti Komite ti Filiale ni atene: “A hon ti bungbi na yâ ti mbeni kpangba wala na gbe ti keke, tongana ti so a yeke sala kozoni, aita ti e awara lege ti bungbi na mbeni ndo so alingbi, na ndo apendere ngende. Atä so a hunda kota nginza pepe ti leke mingi ti aDa ti Royaume, ala ngbâ lakue ti duti ada so apika bê mingi na ndo so ala yeke dä. Na ambeni ndo, a ba so tongana a hunzi ti leke mbeni Da ti Royaume awe, wungo ti azo na yâ ti kongrégation ni ague na li ni ahon fani use na ngu so aga na pekoni.”

Mbeni Fini Wagame ti A-Témoin na Ukraine

Na ngoi ti ngu ti kusala ti 2000, kodoro so awara mbeni kota guengo na li ni ti wungo ti awafango tene 112 720. Wungo ti azo ahon 50 000 na popo ti ala amanda tâ tene ti Bible gi na yâ ti angu oku so ahon. John Didur, coordinateur ti Komite ti Filiale ni atene: “Biani, Jéhovah asigigi na mbeni fini wagame, so ade pendere, ti aTémoin ti fa iri ti lo!” Lo kiri lo tene: “Na yâ ti angu use so ahon, e zia na maboko ti azo apériodique ahon kutu 50, wungo so ayeke legeoko na wungo ti azo ti kodoro ni kue. Na nze oko oko, tongana abungbi anze ni kue, e yeke wara ambeti saki mingi so alondo na azo so asala nzala ti tene, ala hunda ti manda ye mingi ahon.”

Ambeni Mbage ti Programme ni so Andu Bê

Daniel Sydlik, oko ti Wabatango Bungbi, amu mbeni diskur so agbu bê. Na yâ article “Lege so Wabatango Bungbi Ayeke Nde na Bungbi so Ndia Ayeda na Ni,” so asigigi na yâ périodique so, aluti na ndo atene so amu ti fa ye na zo.

Theodore Jaracz ti Wabatango Bungbi amu mbeni diskur so apusu zo ti gbu li, so kota li ti tene ni ayeke “Ahiri Asurveillant na Aserviteur ti Mungo Maboko na Lege ti Théocratie.” Mbeni oko ti a-article so asigigi na yâ ti périodique so aluti na ndo kota tene so.

Bungbi so ayeke sala ni ngu oko oko andu nga mbeni diskur so agbu bê, so David Splane, mbeni oko ti Wabatango Bungbi, amu na ndo versê ti ngu 2001. Kota tene ni alondo na atene ti bazengele Paul so ayeke: “I luti tongana azo so alingbi kue, na i hinga na bê ti i biani ye kue so Nzapa aye.” (aColossien 4:12) Na ndo sese kue, aTémoin ti Jéhovah aleke na bê kue ti sala tongaso na ngoi so, na dutingo be-ta-zo, ala yeke fa nzo tene ti Royaume ti Nzapa na sese kue.​—Matthieu 24:14.

[Kete Tene na Gbe Ni]