Atënë so azo ahunda
Ngbanga ti nyen Elisée ahunda ti wara mbage ti yingo ti Elie ‘lege use’?
Kozoni ti tene Elie ahunzi kusala ti lo ti prophète na Israël, prophète Elisée so ayeke ngambe na lo ahunda na lo mbeni ye: ‘Mbi voro mo, zia mbi wara yingo ti mo lege use.’ (2 aGbia 2:9). Na lege ti yingo, a lingbi ti tene so Elisée ahunda ândö ti tene a mû na lo mbage ti aye use tongana ti so a yeke mû lani na mbeni kozo molenge (Deutéronome 21:17). Bingo lê kete na ndo tondo ni ayeke zi nda ti tënë so polele, na a yeke mû ande maboko na e ti gboto aye ti manda na ndo aye so asi lani.
Ti gue oko na fango lege ti Jéhovah, prophète Elie asoro Elisée ti mû kusala na peko ti lo (1 aGbia 19:19-21). Teti angu omene tongaso, Elisée asala kusala tongana wakua be-ta-zo ti Elie na lo leke lani na bê ti lo ti sala ni juska na nda ni. Même na ndangba lango ti Elie tongana prophète na Israël, Elisée asala kusala ndulu mingi na tele ti lo. Atâa so Elie ahunda na ngangu na Elisée ti zia ti mû peko ti lo, fani ota prophète Elisée, so ayeke maseka na lo, atene: “Fade mbi zia mo pëpe.” (2 aGbia 2:2, 4, 6; 3:11). Biani, Elisée abâ mbakoro prophète ni tongana babâ ti lo na lege ti yingo.—2 aGbia 2:12.
Ye oko, Elisée ayeke lani gi oko molenge ti Elie na lege ti yingo pëpe. A hinga lani Elie na Elisée nga na mbeni bungbi ti akoli tongana “amolenge ti aprophète”. (2 aGbia 2:3). Tondo ti mbeti Use ti aGbia afa so “amolenge” so ayeke nga na kpengba songo na mbage ti Elie, babâ ti ala na lege ti yingo (2 aGbia 2:3, 5, 7, 15-17). Ye oko, tongana zo ti mungo kusala na peko ti Elie so a sa yingo na ndo ti lo, Elisée ayeke lani kota na popo ti amolenge ti Elie na lege ti yingo; lo yeke lani tongana mbeni kozo molenge. Na yâ ti mbeni sewa ti Israël ti giriri, kozo molenge ayeke wara ambage use ti ye ti héritier ti babâ ti lo, na tanga ti amolenge ni oko oko ayeke wara gi mbage oko. Tongaso, Elisée ahunda lani mbage use ti aye ti héritier ti yingo ti Elie.
Ngbanga ti nyen Elisée ahunda ye ni gi na ngoi ni so? Ngbanga ti so a ndu lani yongo mbeni nene kungba, so ayeke ti mû kusala na peko ti Elie tongana prophète na Israël. Elisée abâ ândö so ti sala kusala so ayengi bê, a lingbi lo wara mbeni ngangu ti yingo so ahon ti lo mveni, mbeni ngangu so gi Jéhovah oko si alingbi ti mû ni. A hunda na lo ti duti na mbito pëpe tongana Elie (2 aGbia 1:3, 4, 15, 16). Ni la, lo hunda ti wara yingo ti Elie lege use, mbeni yingo ti duti na mbito pëpe, nga mbeni ti “sala mbanda mingi teti L’Eternel”, so ayeke apendere lengo so yingo ti Nzapa ayeke lë na yâ zo (1 aGbia 19:10, 14). Elie akiri tënë tongana nyen?
Elie ahinga so Elisée ahunda mbeni ye so a yeke gi na Nzapa ti mû ni, me pëpe na lo. Tongaso, na tâ be-ti-molenge Elie atene na lo: “Ye so mo hunda ayeke ngangu; me tongana mo bâ mbi tongana A [mû] mbi na tele ti mo, fade ye so aga na mo tongaso.” (2 aGbia 2:10). Biani, Jéhovah amû lege na Elisée ti bâ Elie ama na yâ mbeni kota pupu (2 aGbia 2:11, 12). A yeda lani na hundango ye ti Elisée. Jéhovah amû na lo yingo so a yeke nzoni lo duti na ni ti to nda ti fini kusala ti lo nga ti luti na gbele atara so ayeke ga.
Laso, aChrétien so a sa yingo na ndo ti ala (so ngoi na ngoi a hiri ala bungbi ti Elisée) na awakua ti Nzapa, tongana a mû ala kue, alingbi ti gboto atënë ti kpengbango zo mingi na lege ti mbaï ti Bible so. Ngoi na ngoi, e lingbi peut-être ti bâ so mbeni fini kusala so a mû na e ahon ndo ti e, na e bâ so e lingbi na ni pëpe, wala e lingbi peut-être ti duti na mbito ti ngbâ ti sala kusala ti e ti fango tënë ti Royaume tongana e tingbi na salango nzara ti mango tënë pëpe so ayeke gue guengo na li ni wala kangango lege so e wara na yâ territoire ti e. Ye oko, tongana e toto na Jéhovah ti wara mungo maboko ti lo, fade lo yeke mû na e yingo vulu ti lo tongana ti so e hunda, ti hon ndo ti akpale nga aye so ayeke gbian gbiango (Luc 11:13; 2 aCorinthien 4:7; aPhilippien 4:13). Biani, legeoko tongana ti so Jéhovah akpengba Elisée na yâ anengo kungba ti lo, fade lo yeke mû maboko na e kue, amaseka na ambakoro, ti sala kusala ti e.—2 Timothée 4:5.