Lë bibe ti mungo ye

A DÜ zo oko pëpe na bibe ti mungo ye. Bibe ti mbeni kete molenge ayeke gi ti kaï nzara ti aye so lo ye, na so lo sala nzara ni. Lo yeke bi bê même kete pëpe na ndo azo so abata lo. Ye oko, na nda ni, molenge ni ayeke manda so a yeke gi lo oko si ayeke na ndo sese ni pëpe. A lingbi lo bi bê na ndo aye so atia amba ti lo, na a lingbi lo manda, pëpe gi ti wara ye, me nga ti mû na ti kangbi ye. A hunda ti lë mbeni bibe ti mungo ye.

A yeke pëpe azo kue so amû ye, même tongana ala mû ye mingi, si ayeke na bibe ti mungo ye. Ambeni zo alingbi peut-être ti mû ye gi ti sala si aye ti ala mveni amaï. Ambeni alingbi peut-être ti sala ni ti tene azo agonda ala. Ye oko, mungo ye ti atâ Chrétien ayeke nde. Tongaso, ambage ti mungo ye wa Mbeti ti Nzapa awa ni? Mbeni kete bingo lê na ndo mungo ye so aChrétien afa ni giriri ayeke kiri ande tënë na ahundango tënë so.

Tapande ti mungo ye ti aChrétien

Mingi ni, mungo ye ti aChrétien tongana ti so a fa pekoni na yâ Bible ayeke lani “ti mû ye na azo” so tâ ye atia ala (aHébreu 13:16; aRomain 15:26). A yeke gbu zo lani gbungo na ngangu pëpe ti sala ni. Bazengele Paul asû ândö na mbeti: “Zia azo oko oko kue amû ye tongana bê ti ala aye, na vundu pëpe, wala na [ngangu] pëpe; teti Nzapa andoye zo so amû matabisi na ngia.” (2 aCorinthien 9:7). A yeke mû nga lani aye ti tene zo ni afa baba pëpe na lê ti azo. Ananias na Saphira afa mara ti fandara tongaso na ala wara lani ye ti sioni na pekoni.—Kusala 5:1-10.

A hunda lani ti mû ye mingi na ngoi so aJuif nga na azo so agbian ti ga aJuif so alondo yongoro, aga ti bungbi tele na Jérusalem teti matanga ti Pentecôte ti ngu 33. A yeke na ndo so si adisciple ti Jésus “asi na Yingo Vulu, na ala komanse ti sala tënë na mbeni yanga nde nde”. Gbâ ti azo abungbi lani na tele ti ala ti mä kpengba diskur so Pierre amû na ndo Jésus Christ. Na pekoni, azo abâ lege so Pierre na Jean asava mbeni koli so gere ti lo abuba so aduti na yanga ti temple. Ala kiri amä Pierre asala tënë ti fani use ni na ndo Jésus na lo hunda na ala ti gbian bê ti ala. Azo saki mingi agbian bê ti ala lani na awara batême tongana adisciple ti Christ.​—Kusala, achapitre 2 na 3.

Afini zo so agbian lege ti vorongo ti ala aye lani ti ngbâ na Jérusalem na ti wara awango ti abazengele ti Jésus mingi na ndo ni. Ye oko, tongana nyen abazengele alingbi lani ti kaï nzara ti azo kue so aga? Mbaï ti Bible atene na e: “Ala kue so ayeke mveni ti sese, wala mveni ti da, ala kä ye ti ala, ala ga na nginza ti ye so ala kä awe, na ala zia nginza ni na sese na gbele abazengele; na ala kangbi ye na azo oko oko kue alingbi na ye so amanke ala.” (Kusala 4:33-35). Biani, kongregation ti Jérusalem, so a zia ni na sese fini ni, ayeke lani na bibe ti mungo ye!

Na pekoni, ambeni kongregation afa na gigi mara ti bibe ti mungo ye tongaso. Na tapande, aChrétien ti Macédoine, atâa so ala yeke awanzinga, ala mû aye, so ahon ngangu ti ala, na aita ti Judée so ye atia ala (aRomain 15:26; 2 aCorinthien 8:1-7). Mungo maboko ti kongregation ti Philippes na yâ kusala ti Paul ayeke lani ye ti dongo bê (aPhilippien 4:15, 16). Kongregation ti Jérusalem ayeke mû kobe lâ na lâ na awomua so ye atia ala, na abazengele asoro lani akoli mbasambala so alingbi, ti tene ala bâ si a girisa pëpe ti mû ye na ambeni womua so alingbi na ni.​—Kusala 6:1-6.

Akongregation ti aChrétien ti kozo siècle ayeke lani ndulu ti sala ye, même ti sala ni kozoni si angoi ti kpale asi. Na tapande, tongana prophète Agabus asala kozoni tënë ti kota nzara so ayeke ga, adisciple ti kongregation ti Antioche ti Syrie “aleke tënë na popo ti ala ti to ye na aita so aduti na Judée, fade ala oko oko kue ato ye so ala lingbi ti to”. (Kusala 11:28, 29). So tâ pendere bibe si ala fa na mungo ye na amba ti ala kozoni si akpale asi!

Ye nyen apusu ândö aChrétien ti kozo siècle ti mû ye na ti fa mara ti ndoye tongaso? Biani, tongana nyen mbeni zo alingbi ti wara bibe ti mungo ye? E lingbi ti manda ye mingi na bango gi kete tapande ti Gbia David.

David amû ye mingi teti tâ vorongo

Ndulu na angu 500 tongaso, arche ti mbele, mbeni sanduku ti nzoni-kue so ayeke lani fä so Jéhovah ayeke na ndo ni so, ayeke pëpe na mbeni nzoni ndo ti duti dä biani. A yeke zia arche ni ândö na yâ tente wala tabernacle, so ayeke yô ni yongo ti hon na ni na ndo nde nde na ngoi ti tambela ti amolenge ti Israël na yando nga tongana ala yeke tambela na Sese ti Zendo. Gbia David ayeke lani na kota nzara ti zi arche ni na yâ ti tente so abata ni dä, na ti leke mbeni da so alingbi na Jéhovah so alingbi ti zia arche ti nzoni-kue na yâ ni. David asala tënë ni na prophète Nathan, lo tene: “Mo bâ, mbi duti na da ti keke ti cèdre, me Arche ti Mbele ti L’Eternel ayeke na gbe ti rideau.”​—1 Chronique 17:1.

Ye oko, David ayeke lani mbeni zo ti bira. Tongaso, Jéhovah atene na lo so a yeke Salomon molenge ti lo si, na ngoi ti komandema ti lo ti siriri, alingbi ti leke temple ti zia arche ti mbele na yâ ni (1 Chronique 22:7-10). Ye oko, ye so abuba pëpe bibe ti mungo ye ti David. Na lekengo mbeni kota bungbi ti awakua, lo leke ti mû akungba so a lingbi ande ti sala kusala na ni na yâ lekengo temple. Na pekoni lo tene na Salomon: “Mbi leke ye teti da ti L’Eternel. Mbi leke talent ti lor [saki] ngbangbo oko, talent ti argent [saki] oko lege [saki] oko, na gengere na wen so zo alingbi diko kilo ni pëpe teti a yeke mingi mingi; mbi leke keke na tênë nga.” (1 Chronique 22:14). Teti so ye so lo mû anzere na bê ti lo kue pëpe, na yâ nginza ti lo mveni, David amû lor na argent so, na ngoi ti e, ngele ni ahon ngbundangbu 656 ti FCFA. Na ndo ni, amokonzi nga amû gbâ ti anginza ti ala (1 Chronique 29:3-9). Kite ayeke pëpe so David afa lani na gigi bibe ti mungo ye!

Ye nyen apusu ândö David ti mû gbâ ti aye tongaso? Lo hinga so aye kue so lo wara nga so lo sala, a ga lani gi na lege ti deba nzoni ti Jéhovah. Lo yeda na tënë so na yâ sambela ti lo: “O L’Eternel Nzapa ti e, ye kue so e leke ti sala da teti iri ti Mo ti nzoni-kue aga na e na lege ti tïtî Mo, na ayeke ti Mo. O Nzapa ti mbi, mbi hinga Mo tara bê ti azo, na Mo wara ngia na yâ ye ti mbilimbili. Na mbilimbili ti bê ti mbi, mbi mû ye so kue na nzobe. Na fadeso mbi yeke na ngia ti bâ lege so azo ti Mo, so ayeke na ndo so, amû ye na Mo na nzobe.” (1 Chronique 29:16, 17). David abâ lani na nene ni songo ti lo na Jéhovah. Lo hinga nene ti sala na Nzapa na ‘bê ti lo kue, na ti sala na Lo na âme ti lo so awara ngia na yâ Lo’, na lo wara ngia na salango tongaso (1 Chronique 28:9). A-oko lengo so apusu nga akozo Chrétien ti fa na gigi bibe ti mungo ye.

Jéhovah: Kota Wamungo ye

Jéhovah ayeke nzoni tapande ti mungo ye ahon kue. Kota ndoye na bingo bê ti lo na ndo zo asala si “lâ ti Lo asu na ndo azo ti sioni na azo ti nzoni, na Lo sala si ngu apika na ndo azo ti mbilimbili na azo ti kirikiri”. (Matthieu 5:45). Lo mû na azo kue “fini, na mbö, na ye kue”. (Kusala 17:25). Biani, tongana ti so disciple Jacques afa, “matabisi kue ti nzoni na matabisi kue so alingbi kue alondo na nduzu azu, a londo na tïtî Babâ ti lumière”.​—Jacques 1:17.

Kota matabisi ti Jéhovah ahon kue so lo sala na mbage ti e ayeke ti so lo to “Molenge ti Lo ngengele oko, si zo so amä na bê na Lo alingbi kui pëpe, me lo yeke na fini ti lakue lakue”. (Jean 3:16). Zo oko alingbi pëpe ti tene so ni lingbi na mara ti matabisi tongaso, teti so “azo kue asala siokpari awe, ala lingbi na gloire ti Nzapa pëpe”. (aRomain 3:23, 24; 1 Jean 4:9, 10). Sandaga ti kota ngele ti Christ ayeke gunda nga lege ti fa “Matabisi ti Lo so zo alingbi fa nda ni kue pëpe” so ayeke “kota grâce ti Nzapa so ayeke na ndo [e]”. (2 aCorinthien 9:14, 15). Na fango bê ti kiri singila teti matabisi ti Nzapa, Paul azia ni tongana kozo ye ti sala na yâ fini ti lo “ti ga témoin ti Tene-nzoni ti grâce ti Nzapa”. (Kusala 20:24). Lo hinga so a yeke lani ye so Nzapa aye ti tene “azo kue awara salut, na ahinga tene-biani mbilimbili”.​—1 Timothée 2:4.

A yeke sala ye so laso na lege ti mbeni kota kusala ti fango tënë na fango ye so yâ ni akiri akono na ahon akodoro 234 na ndo sese mobimba. Jésus afa ândö kozoni peko ti konongo ti kusala so tongana lo tene: “Fade a fa Tene-nzoni so ti royaume na sese so kue teti tënë ti témoin na amara kue; na tongaso fade nda ni aga.” (Matthieu 24:14). Biani, “a lingbi a fa Tene-nzoni na amara kue kozoni”. (Marc 13:10). Na ngu so ahon, awafango nzo tënë ahon kutu omene amû angbonga 1 202 381 302 ti sala na kusala so, na ala sala a-étude ahon 5 300 000. Teti so ye ni andu ngangu mingi fini ti azo, fango ye so ayeke kota ye mingi.​—aRomain 10:13-15; 1 aCorinthien 1:21.

Ngu oko oko, a yeke sigigi na ambeti kutu mingi, aBible, abuku, na abrochure, ti mû maboko na azo so ayeke na nzara ti tâ tënë ti Bible. Na ndo ni, a yeke sigigi na anuméro ti Tour ti Ba Ndo na ti Réveillez-vous! ahon ngbundangbu oko. Teti so azo angbâ ti yeda na nzo tënë, a yeke leke gbâ ti aDa ti Royaume na aDa ti Assemblée ti aTémoin ti Jéhovah, so a yeke sala kusala na ni ti fa na atënë ti Bible. Ngu oko oko, a yeke leke akota bungbi ti circonscription, ambeni ti lango oko nga na akota bungbi ti district. Fango ye teti lekengo amissionnaire, asurveillant so ague na ndo nde nde, a-ancien na aserviteur ti mungo maboko angbâ nga lakue ti gue na li ni. E yeke kiri singila na Jéhovah teti alekengo ye kue so lo sala na lege ti “ngbâa be-ta-zo na ti ndara”. (Matthieu 24:45-47, NW ). Kite ayeke pëpe so e yeke na kota nzara ti fa na Lo bê ti kiri singila ti e!

Fa bê ti kiri singila na Jéhovah

Anginza kue so a mû ti leke na temple nga ti mû maboko na akozo Chrétien aga na lege ti nginza so azo amû na bê ti ala kue. Ye oko, a lingbi e dabe ti e so zo oko alingbi pëpe ti sala si mosoro ti Jéhovah, Mveni ti aye kue, awu (1 Chronique 29:14; Aggée 2:8). Tongaso, a-offrande so e yeke mû ayeke fä ti ndoye ti e na mbage ti Jéhovah nga nzara ti e ti sala si tâ lege ti vorongo ague na li ni. Paul atene so bê ti mungo ye tongaso ayeke ‘fä ti kiringo singila na Nzapa’. (2 aCorinthien 9:8-13). Jéhovah awa e ti mû aye tongaso teti a yeke fa so e yeke na bibe ti mungo ye nga na nzoni bê na mbage ti lo. Fade Jéhovah ayeke deba nzoni na ndo ala so ayeke ndulu ti mû ye, na so azia bê kue na lo, na fade ala yeke wara aye ti mosoro na lege ti yingo (Deutéronome 11:13-15; aProverbe 3:9, 10; 11:25). Jésus amû lani zendo so ngia ayeke ga na pekoni na tenengo so: “Ngia ayeke na zo so amû ye, ahon ngia ti lo so akamata ye.”​—Kusala 20:35.

A-Chrétien so ayeke na bibe ti mungo ye ayeke ku pëpe gi ngoi so ye atia zo ni. Nde na so, ala yeke gi alege kue ti “sala ye ti nzoni na azo kue; na ahon kue, a lingbi [ala] sala ye ti nzoni na aita ti [ala] awamabe”. (aGalate 6:10). Na wango azo ti lë bibe ti mungo ye tongana ti Nzapa, Paul asû na mbeti: “I girisa pëpe ti sala nzoni na ti mû ye na azo, teti sacrifice tongaso ayeke nzoni na lê ti Nzapa.” (aHébreu 13:16). Ti sala kusala na aye kue so e yeke na ni tongana ngoi, ngangu na mosoro ti e ti mû maboko na ambeni zo, na ti sala si tâ lege ti vorongo ague na li ni anzere mingi na Jéhovah Nzapa. Biani, l  ndoye bibe ti mungo ye.

[Encadré/Foto na lembeti 28, 29]]

Alege nde nde so a soro ti mû na

A-OFFRANDE TETI KUSALA SO A SALA NA NDO SESE KUE

Azo mingi azia nde wala aleke na yâ mama-nginza ti ala mbeni wungo ti nginza so ala zia na yâ asanduku teti a-offrande so kete mbeti “A-offrande teti kusala na ndo sese kue—Matthieu 24:14” ayeke na ndo ni.

Nze oko oko, akongregation ayeke tokua anginza ni na biröo ti aTémoin ti Jéhovah so ayeke na kodoro ti ala. Mo lingbi nga ti tokua a-offrande so mo mû na bê kue gi na filiale so abâ lege ti kusala ni na kodoro ti mo wala na Watch Tower Bible and Tract Society of Pennsylvania, c/o Office of the Secretary and Treasurer, 25 Columbia Heights, Brooklyn, New York 11201-2483. A yeke nzoni a sala achèque na iri ti “Watch Tower”. Mo lingbi nga ti mû tongana matabisi aye ti go, ti mê, ti maboko, na ambeni ye nde ti ngele ngangu. A yeke nzoni mo sû na tele ni mbeni mbeti ti fa so amatabisi so ayeke a-offrande so mo mû biaku.

AMATABISI SO A HUNDA MBENI YE KOZONI

Mbeni zo alingbi ti mû nginza tongana mbeni matabisi na hundango mbeni ye kozoni. Tongana mbeni lâ zo ti mungo nginza ni ahunda ni, a lingbi ti kiri na lo nginza so lo mû tongana offrande. Ti wara sango mingi na ndo tënë so, sû mbeti na Biröo so abâ lege ti nginza na adresse so a fa na use paragraphe ni.

AMATABISI

Nde na amatabisi ti nginza so a mû biaku na ti so a hunda mbeni ye kozoni, ambeni lege nde nde ayeke dä ti mû nginza ndali ti kusala ti fango tënë ti Royaume na ndo kue. Aye so andu:

Assurance: A lingbi ti zia ni na iri ti Société Watch Tower ti tene lo wara ande nginza so mbeni zo amû assurance ndali ni, wala nginza so mbeni zo abata ngbanga ti retraite ti lo.

Nginza na banque: Na yâ ambeni kodoro, a lingbi ti bata teti Société Watch Tower nginza so a zia na banque, mbeni mbeti so afa atene a zia nginza kâ, wala mbeti ti nginza so a bata teti lâ ti retraite, wala so a zia na iri ti Société ti tene lo wara ni tongana zo ni akui.

Ambeti ti mosoro na ti mbele: A lingbi ti mû ambeti ti mosoro na ti mbele na Société Watch Tower tongana mbeni matabisi so a hunda mbeni ye na pekoni pëpe.

Ada: A lingbi ti mû ada so alingbi ti kä ni; zo ni alingbi ti mû ni biaku, wala tongana a ndu tënë ti da ti lango, lo lingbi ti fa so Société ayeke mû ni ande na peko ti kuâ ti lo na lo yeke ngbâ ti lango na yâ ni na ngoi kue so lo de na fini. Kozoni ti mû na filiale mbeni matabisi ti da tongaso, a yeke nzoni a bâ lo si.

Testament na amatabisi so a bata ti mû na mbeni ngoi: A lingbi ti zia na Société Watch Tower ada na nginza na lege ti mbeni testament so ndia ayeda na ni, wala a lingbi ti sû mbeni mbeti ti fa so fade Société Watch Tower ayeke ga mveni ti mbage ti mosoro ni na mbeni ngoi. Lekengo ye ti tene mbeni lege ti vorongo aga ande mveni ti mbeni mosoro alingbi peut-être ti zi lege ti kiri na peko alampo so a lingbi a futa ni.

Amara ti mungo amatabisi tongaso ahunda ti tene zo so aye ti mû ye agbu li ti lo nzoni kozoni. Ti mû maboko na ala so aye ti mû matabisi teti kusala ti aTémoin ti Jéhovah na ndo sese kue na alege nde nde, a leke mbeni brochure na yanga ti Anglais nga na Espagnole, Charitable Planning to Benefit Kingdom Service Worldwide. A sala brochure so ti kiri tënë na gbâ ti atënë so a yeke hunda na ndo mungo amatabisi, atestament, nga na amatabisi so a bata ti mû na mbeni ngoi. A wara nga na yâ ni ambeni nzoni tënë na ndo warango akungba na peko ti kuâ ti mbeni zo, tënë ti lampo, na bango lege ti akungba ti zo mveni. A fa na azo alege nde nde ti mû mbeni matabisi fadeso wala na peko ti kuâ ti ala. Na peko ti dikongo brochure so, na salango lisoro na awamungo wango ti ala na ndo tënë ti lampo nga na aita ti filiale ti kodoro ti ala, azo mingi awara lege ti mû maboko na aTémoin ti Jéhovah ti ndo ti sese kue nga ti wara ye ti nzoni na lege ti wungo ti lampo so ala futa ni. A lingbi ti hunda brochure ni senge na Filiale so ayeke bâ lege ti kusala ni na kodoro ti mo.

Ti wara ambeni sango na ndo ni, mo lingbi ti sala tënë ni na Filiale na tokuango mbeti wala na pikango singa, na lege ti adresse so a mû na gbe ni ge.

Filiale ti aTémoin ti Jéhovah

Association “Les Témoins de Jéhovah”

B.P. 662, Bangui, R.C.A.

Singa: 61-20-70

[Foto na lembeti 26]

Ye nyen apusu lani akozo Chrétien ti duti ndulu ti mû ye?