Atene so Azo Ahunda

Wango ti Nzapa so a sû na mbeti na Jérémie 7:16 aye ti tene so aChrétien ayeke sambela ande pepe teti mbeni zo so abi lo na gigi ti kongregation ti aChrétien ngbanga ti so lo yeke mbeni wasiokpari so agbian bê ti lo pepe?

Na pekoni so lo fa tene ti ngbanga so lo dë na ndo Juda so aduti be-ta-zo pepe, Jéhovah atene na Jérémie: “Mo sambela teti azo so pepe, mo yä yanga ti mo ti toto wala ti sambela teti ala pepe, na mo voro Mbi teti ala pepe, teti fade Mbi mä mo pepe.”​—Jérémie 7:16.

Ngbanga ti nyen Jéhovah ake na Jérémie ti sambela teti azo ti Israël? Biani, a yeke ngbanga ti kota kengo tene ti ala na mbage ti Ndia ti lo. Polele nga na kamela oko pepe, ‘ala yeke sala nzi, ala yeke fâ zo, ala yeke sala lango-sioni, ala yeke deba na wataka, ala yeke zö yombo teti aBaal, ala yeke tambela na peko ti ambeni nzapa nde.’ Tongaso, Jéhovah atene na aJuif so aduti be-ta-zo pepe: “Fade Mbi lungula mo na gbele Mbi legeoko tongana Mbi lungula aita ti mo kue giriri, même ahale ti Ephraïm kue.” Kite ayeke pepe so a yeke duti na lege ni ande pepe teti Jérémie wala teti mbeni zo nde ti sambela Jéhovah ti zia lege ti fango ngbanga ti Lo.​—Jérémie 7:9, 15.

Legeoko na tene so, bazengele Jean asû mbeti na ndo tâ lege ti tenengo sambela na Nzapa. Kozoni kue, lo mu yanga so na aChrétien: “Tongana e hunda ye na lege ti ye so Lo ye, Lo mä e.” (1 Jean 5:14) Na pekoni, na ndo tene ti sambelango teti ambeni zo, Jean atene: “Tongana mbeni zo aba ita ti lo na salango siokpari so alingbi na kui pepe, a lingbi lo hunda, na fade Nzapa amu fini na zo so, na fade Lo mu fini na ala kue so asala siokpari so alingbi na kui pepe. Mbeni siokpari ayeke so alingbi na kui; mbi tene na lo pepe ti sambela tene ti siokpari so.” (1 Jean 5:16) Jésus nga asala tene ti siokpari so “a mu pardon na ni pepe,” so ti tene siokpari so a sala na mbage ti yingo ti nzoni-kue.​—Matthieu 12:31, 32, NW.

So aye ti tene so azo kue so a bi ala na gigi ti kongregation ti aChrétien, ngbanga ti so ala sala siokpari na ala gbian bê ti ala pepe, asala siokpari so “alingbi na kui” na tongaso a lingbi a sambela pepe teti ala? A yeke lakue tongaso pepe teti so na ambeni ngoi, amara ti kengo ndia tongaso ayeke pepe asiokpari so alingbi na kui. Ti tâ tene ni, a yeke ngangu ti hinga wala ala ‘lingbi na kui.’ Mbeni tapande so alingbi na ni ayeke ti Gbia Manassé ti Juda. Lo leke abalaga na anzapa ti wataka, lo mu amolenge ti lo mveni na sadaka, lo sala aye so andu ayingo sioni, na lo zia na yâ temple ti Jéhovah ayanda so a leke na kode. Biani, Bible atene so Manassé na azo ni asala “ye ti sioni ahon ye so amara asala, amara so L’Eternel afuti ala na gbele amolenge ti Israël.” Teti aye so kue, Jéhovah ase Manassé na zingo lege si a gue na lo na ngba na yâ ti kamba ti wen na Babylone.​—2 aGbia 21:1-9; 2 Chronique 33:1-11.

Asiokpari ti Manassé, atä kota ti ala, ayeke mara ti asiokpari so alingbi na kui? Ti ba ni nzoni, a yeke tongaso pepe teti tondo ni atene na ndo lo na pekoni: “Na lâ ti vundu ti lo, lo voro tele ti lo na L’Eternel Nzapa ti lo, lo sala lo mveni kete mingi na gbele Nzapa ti akotara ti lo. Lo sambela Nzapa, na Nzapa amä toto ti lo, na Lo mä ye so Manassé ahunda, na Lo sala si lo kiri na royaume ti lo na Jérusalem. Tongaso Manassé ahinga L’Eternel ayeke Nzapa.”​—2 Chronique 33:12, 13.

Ni la, a lingbi e tene hio pepe so mbeni zo asala siokpari so alingbi na kui gi ngbanga ti so a bi lo na gigi ti kongregation. A lingbi ti hunda angoi ti tene tâ dutingo ti bê ti zo ni aga polele. Biani, a yeke tene ka fani mingi so mbeni oko ti anda ti tene ti bingo zo na gigi ti bungbi ayeke ti sala si li ti wasiokpari ni aga dä, na si beku aduti dä so fade lo gbian bê nga na lege ti lo.

Teti so zo ni angbâ pepe mbeni ita na yâ ti kongregation, gi azo so ayeke ndulu na lo, na tapande koli wala wali ti lo wala ambeni zo nde ti sewa ni, si alingbi ti ba kozoni mbeni gbiango ye na yâ bê nga na bango ndo ti lo. Ala so ayeke ba mara ti agbiango ye so alingbi peut-être ti tene na nda ni so wasiokpari ni asala la ni pepe mbeni siokpari so alingbi na kui. Ye so alingbi ti pusu ala ti sambela si lo lingbi wara ngangu na lege ti Tene ti Nzapa so a sû na gbe ti yingo, na si Jéhovah asala ye ande na mbage ti wasiokpari ni alingbi na ye so bê ti Lo aye.​—Psaume 44:22 (44:21, NW); Zo-ti-fa-tene 12:16 (12:14, NW).

Atä so dutingo ti ambeni zo alingbi ti mu lege na ala ti hinga nzoni ahon wala wasiokpari ni agbian bê ti lo, ye so alingbi ti duti tongaso pepe teti azo ti kongregation ni kue. Ala lingbi ti gi bê ti ala, ti wara vundu, na même ti pika gere ti ala tongana ala mä mbeni zo na sambelango na gbele kongregation na ndo wasiokpari ni. Teti tene so, a lingbi ala so bê ti ala apusu ala ti sambela teti wasiokpari ni asala ni gi na yâ ti mbeni sambela so ala tene tongana ala yeke gi ala oko, na ziango guengo na li ni ti tanga ti aye ni na maboko ti a-ancien so ayö kungba ni na yâ kongregation.

[Foto na lembeti 31]

A mu pardon na akota siokpari ti Manassé tongana lo sala lo mveni kete mingi na gbele Jéhovah

[Lingu ti foto na lembeti 30]

A londo na Illustrirte Pracht - Bibel/Heilige Schrift des Alten und Neuen Testaments, nach der deutschen Uebersetzung D. Martin Luther’s