Mandango ye aga na futa

MO BÂ lâ oko awe azo na sorongo lê ti keke? Mingi ti ala ayeke bâ nzoroko ni na konongo ni ti hinga wala a be awe. Ambeni amä fion ni. Ambeni nde ayeke ndu ni, na même ala yeke pete ni. Ambeni nde nga ayeke bâ nengo ni, ala zia mbeni na yâ maboko ti ala mbage na mbage ti bâ so wa ngu ti yâ ni ane mingi ahon mbeni. Azo so ayeke bi bê na nyen? Ala yeke gi nda ti anzene nzene ye, ala yeke gi ti hinga kangbi na popo ti aye, ala yeke dabe ti ala na aye so ala soro kozoni awe na ala yeke haka ye so ala yeke bâ fadeso na ye so ala hinga ni kozo awe. Mbeni nzerengo ye ayeke ku ala teti ala bi bê nzoni mingi na ye so ala yeke soro.

Biani, afuta ti mandango Tënë ti Nzapa ayeke kota mingi ahon so. Tongana mara ti mandango ye tongaso ayeke na kota ndo na yâ fini ti e, mabe ti e ayeke kiri ti kpengba, ndoye ti e ayeke kono ngangu. Fango tënë ti e nga ayeke lë lengo mingi ahon ti kozo na adesizion so e mû ayeke fa polele mingi na gigi so e hinga ti bâ nda ti ye nga e yeke na ndara ti Nzapa. Na ndo mara ti afuta tongaso, aProverbe 3:15 atene: “Na popo ti ye kue so bê ti mo aye, ye oko ti lingbi na lo ayeke pëpe.” Mo yeke wara mara ti afuta tongaso? Lege so mo yeke manda na ye alingbi ti duti kota ye mingi na yâ ni.​—aCol. 1:9, 10.

Mandango ye ayeke nyen? A hon gi senge dikongo ye so ayapu. A hunda na mo ti sala kusala na ngangu ti gbungo li ti mo ti bâ anzene nzene ye so ayeke na yâ ti mbeni tënë. A ndu gingo nda ti ye so mo yeke diko, hakango ni na ye so mo hinga awe nga hingango anda ti tënë so a tene. Tongana mo yeke manda ye, gbu li ngangu na ndo atënë so a fa, so a lingbi ti duti fini ye na lê ti mo. Bâ nga tongana nyen mo mveni mo lingbi ti sala ye alingbi na wango ti Mbeti ti Nzapa mingi ahon ti kozo. Teti mo yeke Témoin ti Jéhovah, mo yeke ye ande nga ti bi bê na ndo alege ti sala kusala na aye so ti mû maboko na ambeni zo nde. Biani, mandango ye andu nga gbungo li ngangu.

Dutingo na bibe so alingbi

Tongana mo yeke leke tele ti manda ye, mo yeke mû ye tongana Bible ti mo, ambeti kue so mo ye ti sala na kusala, mbeni keke ti mbeti na peut-être mbeni mbeti ti sû ye na ndo ni. Me mo yeke leke nga bê ti mo? Bible atene na e so Esdras “azia [“aleke”, NW ] bê ti lo ti gi Ndia ti L’Eternel, ti bata Ndia ni, na ti fa na azo ti Israël kpengba-ndia na kpengba-tene.” (Esdras 7:10). Lekengo bê tongaso andu nyen?

Sambela amû lege na e ti to nda ti manda Tënë ti Nzapa na bibe so alingbi. E ye si bê ti e (zo ti yâ ni ti e mveni) aduti ndulu ti yeda na fango lege ti Jéhovah. Na tongo nda ti kapa oko oko ti mandango ye, hunda na Jéhovah ti tene yingo ti lo amû maboko na mo (Luc 11:13). Hunda na Jéhovah ti mû maboko na mo ti gbu nda ti ye so mo yeke manda ande, ti hinga tongana nyen ye ni ague legeoko na ye so lo leke ti sala, tongana nyen a lingbi ti mû maboko na mo ti zia kangbi na popo ti nzoni na sioni. Hunda nga ti mû maboko na mo ti bâ tongana nyen a lingbi mo bata akpengba-ndia ti lo na yâ fini ti mo nga tongana nyen ye ti manda ni andu songo ti mo na lo (aProv. 9:10). Na ngoi so mo yeke manda ye, ‘hunda lakue Nzapa’ ti wara ndara (Jacq. 1:5). Na bê kue, bâ tele ti mo mveni na lege ti ye so mo manda na ngoi so mo yeke gi mungo maboko ti Jéhovah ti lungula abibe so ayeke na lege ni pëpe wala anzara ti bê so ayeke sioni. Lakue, kiri “tënë ti singila” na Jéhovah teti aye so lo fa na gigi (Ps. 147:7). Ti to nda ti mandango ye na lege ti sambela ayeke sala si e yeke duti na kpengba songo na Jéhovah, teti so a yeke mû lege na e ti kiri tënë na lo na ngoi so lo yeke sala tënë na e na lege ti Bible.​—Ps. 145:18.

Mara ti dutingo ndulu tongaso ti yeda na ye azia kangbi na popo ti azo ti Jéhovah na ambeni wamandango ye nde. Na popo ti azo so ayeke ndulu na Nzapa pëpe, ti dë kite na ye so a sû na mbeti ayeke ye so amû ndo kue. Me so ayeke bango ndo ti e pëpe. E zia bê kue na Jéhovah (aProv. 3:5-7). Tongana e gbu nda ti mbeni ye pëpe, e yeke tene hio pëpe na fandara so a yeke na lege ni pëpe. Na ngoi so e yeke gi nda ni na e yeke zi gunda ni ti wara akiringo tënë, e yeke ku Jéhovah (Mi. 7:7). Legeoko tongana Esdras, e zia na gbele e ti sala ye alingbi na ye so e manda na ti fa ni na ambeni zo. Na mara ti bibe tongaso, e yeke ndulu ti ko afuta mingi na lege ti mandango ye ti e.

Lege ti manda ye

Ahon gi ti to nda ni na paragraphe oko na ti gue na li ni ti si na nda ni, kozoni kue mû ngoi ti gi ti hinga kota tënë ti article wala chapitre ni kue. To nda ni na gingo nda ti lê ti tënë oko oko so ayeke na yâ li ti tënë ni. So ayeke kota li ti tënë ti ye so mo yeke manda ande. Na pekoni, bâ nzoni tongana nyen akete li ti tënë ni atingbi na kota li ti tënë ni. Bâ nda ti afoto, atableau wala atënë ti dango bê kue so ayeke dä. Hunda tele ti mo: ‘Na lege ti kota tënë so mbi bâ, nyen la mbi yeke ku ti manda? Na lege wa ye so ayeke ga ande na ye ti nzoni na mbi?’ Ye so ayeke fa lege na mandango ye ti mo.

Fadeso gi ti wara asango ni. A-article ti manda ti Tour ti Ba Ndo nga na ambeni buku ayeke na ahundango tënë. Tongana mo yeke diko paragraphe oko oko, a yeke nzoni ti zia marque na tele ti akiringo tënë ni. Atâa ahundango tënë ayeke dä pëpe, mo lingbi lakue ti zia marque na tele ti akota tënë so mo ye ti dabe ti mo na ni. Tongana mbeni tënë ayeke fini ye na lê ti mo, mû kete ngoi na ndo ni ti tene mo gbu nda ni nzoni. Duti ndulu ti bâ atapande wala alege ti fango nda ti ye so ayeke mû ande maboko na mo na fango tënë wala so mo lingbi ti yôro na yâ devoir ti mo ti peko. Bi bê na ndo ambeni mbilimbili zo so mabe ti ala alingbi ti kpengba tongana mo na ala akangbi ye so mo yeke manda. Zia marque na tele ti atënë so mo ye ti sala na kusala, nga kiri mo bâ ni tongana mo hunzi awe mandango ye ti mo.

Na ngoi so mo yeke manda ye ni, gi aversê so a fa tënë ti yâ ni pëpe. Bâ tongana nyen versê oko oko atingbi na kota tënë ti paragraphe ni.

Mo lingbi ti tingbi na ambeni tënë so mo gbu nda ni hio pëpe wala so mo ye ti hinga anzene nzene tënë na ndo ni. Ahon ti tene mo zia ala gboto lê ti mo nde, sû ni na mbeti ti kiri ti bâ ni nzoni na pekoni. Fani mingi atënë ni ayeke ga polele tongana mo diko tanga ti mbeti ni. Tongana a yeke tongaso pëpe, mo lingbi ti gi atënë na ndo ni. Aye wa mo lingbi ti sû nde si mo bi lê na ndo ni? Peut-être mbeni versê ayeke dä so a fa pekoni me mo gbu nda ni nzoni pëpe. Wala peut-être mo bâ hio pëpe tongana nyen versê so ague oko na kota li ti tënë so a yeke sala lisoro na ndo ni. Peut-être mo bâ so mo gbu nda ti mbeni mbage ti tënë ni, me nzoni kue pëpe ti fa nda ni na mbeni zo nde. Ahon ti hulu ndo ni, a yeke lege ti ndara ti gi nda ni tongana mo hunzi awe ye so mo to nda ti manda.

Tongana bazengele Paul asû mbeti ti lo na aChrétien Hébreu, so anzene nzene tënë mingi ayeke na yâ ni, lo luti kete ti tene: “Nda ti tënë so e yeke tene ayeke so.” (aHéb. 8:1). Ngoi na ngoi, mo yeke dabe ti mo mveni legeoko tongaso? Bâ ngbanga ti nyen Paul asala tongaso. Na yâ akozo chapitre ti mbeti ti lo so lo sû na gbe ti yingo, lo fa awe so Christ, so ayeke tongana Kota Prêtre ti Nzapa, alï na yayu mveni awe (aHéb. 4:14–5:10; 6:20). Ye oko, na lege so Paul agboto lê na ndo kota tënë so na tongo nda ti chapitre 8, lo leke bibe ti azo so ayeke diko mbeti ti lo ti gbu li ngangu na ndo lege so ye ni andu fini ti ala. Lo fa na gigi so Christ asi awe na gbele Nzapa mveni teti ala, nga lo zi lege na ala ti lï na “Ndo ti Nzoni-kue” na yayu (aHéb. 9:24; 10:19-22). Na yâ mbeti so, a wara ambeni wango nde na ndo mabe, gbungo ngangu nga na tambela ti Chrétien. Beku ti ala so ayeke tâ ye ayeke mû maboko na ala ti sala ye alingbi na awango so. Legeoko nga, tongana e yeke manda ye, ti zia lê na ndo angbongboro tënë ni ayeke mû ande maboko na e ti bâ tongana nyen kota li ti tënë ni ayeke sigigi yeke yeke, nga fade a yeke bata na yâ bibe ti e ambilimbili nda ti tënë ti sala ye alingbi na ni.

Mandango ye mo mveni ayeke pusu mo ande ti sala ye? So ayeke mbeni kota hundango tënë. Tongana mo manda mbeni ye, hunda tele ti mo: ‘Tongana nyen a lingbi ye so andu bango ndo ti mbi nga na aye so mbi yeke gi na yâ fini ti mbi? Tongana nyen mbi lingbi ti sala kusala na wango so ti leke akpale, ti mû adesizion wala ti wara ye so mbi zia na gbele mbi? Tongana nyen mbi lingbi ti sala kusala na ni na sewa ti mbi, na fango tënë nga na yâ ti kongregation?’ Bâ ahundango tënë so mbilimbili na yâ sambela, na bâ atâ ye so ayeke si so na yâ ni mo lingbi ti sala kusala na hingango ye ti mo.

Na pekoni so mo hunzi mbeni chapitre wala article oko awe, mû ngoi ti kiri ti bâ ye ni hio. Bâ wala mo lingbi ti dabe ti mo na angbongboro tënë ni nga atënë so amû ngangu na ni. Tongana mo sala tongaso, ye so ayeke mû maboko na mo ti bata asango so ti sala kusala na ni na mbeni ngoi nde.

Ye so a lingbi ti manda ni

Teti e yeke awakua ti Jéhovah, e yeke na gbâ ti aye ti manda. Me a lingbi e to nda ni na ndo wa? Lâ oko oko, a yeke nzoni e manda versê na atënë ti ndo ni na yâ Gingo nda ti T ënë ti Nzapa lâ oko oko. Yenga oko oko, e yeke gue na abungbi ti kongregation, na ye so e manda ti leke tele teti abungbi so ayeke mû ande maboko na e ti wara ye ti nzoni mingi dä. Na ndo ni, ambeni zo amû na lege ti ndara ngoi ti manda ambeni mbeti ti aChrétien so asigigi kozoni si ala manda tâ tënë. Ambeni nde asoro mbeni mbage ti dikongo Bible ti ala ti yenga oko oko ti manda anzene nzene tënë na ndo ni.

Ye ni ayeke tongana nyen tongana dutingo ti mo amû lege na mo pëpe ti manda nzoni asango kue so fade a yeke bâ na abungbi ti kongregation ti yenga oko oko? Kpe ti tï na yâ gbanda ti sala ni na loro si mo hunzi ni hio wala, tâ ti so ayeke sioni mingi, ti manda ye oko pëpe teti mo lingbi pëpe ti sala ni kue. Nde na so, gi ti bâ ye oke mo lingbi ti manda, na sala ye so nzoni. Sala ni yenga oko oko. Tongana ngoi ayeke hon, sala ngangu ti zia ambeni bungbi nde dä.

“Kpengba azo ti da ti mo”

Jéhovah ahinga so a lingbi amokonzi ti sewa asala kua ngangu ti mû ye na azo so ala ndoye mingi. A-Proverbe 24:27 atene: “Mo leke kusala ti mo so ayeke na gigi, mo sala yaka ti mo alingbi na mo.” Ye oko, a lingbi mo kanga lê pëpe na ndo ti aye ti yingo so atia sewa ti mo. Ni la, versê ni akiri atene: “Na nda ni, mo sala da ti mo [“a lingbi nga mo kpengba azo ti da ti mo”, NW ].” Amokonzi ti sewa alingbi ti sala ye so tongana nyen? A-Proverbe 24:3 atene so azo ti da ayeke “ga nzoni na lege ti hingango nda ti ye.”

Tongana nyen hingango nda ti ye alingbi ti sala nzoni na azo ti da ti mo? Hingango nda ti ye ayeke ngangu so bibe ayeke na ni ti bâ gi pëpe ye so lê abâ. A lingbi ti tene so mbeni nzoni mandango ye na sewa ayeke to nda ni na mandango ti hinga sewa ti mo mveni. Tongana nyen azo ti sewa ti mo ayeke gue na li ni na lege ti yingo? Dengi mê nzoni na ngoi ti alisoro ti mo na ala. Bibe ti demango tele wala ti batango tënë na bê ayeke dä? Gingo aye ti mitele ayeke kota ye mingi na ala? Tongana mo yeke na fango tënë na amolenge ti mo, ala yeke gi bê ti ala ti fa tele ti ala mveni tongana aTémoin ti Jéhovah na akamarade ti ala? Ala wara ngia na yâ kapa ti ala ti dikongo Bible na mandango ye na sewa? Ala yeke sala biani si lege ti Jéhovah aga lege ti fini ti ala mveni? Bango ndo nzoni ayeke fa ande na gigi ye so, mo mokonzi ti sewa, a lingbi mo sala ti leke na ti kpengba alengo ti yingo na yâ zo oko oko ti sewa ti mo.

Gi yâ ti Tour ti Ba Ndo na Réveillez-vous! ti bâ a-article so andu ambilimbili ye so atia ala. Na pekoni, tene na sewa ni kozoni ye so ala yeke manda ande, tongaso si ala lingbi ti bi bê na ndo atënë ni. Sala si ndoye aduti na ngoi ti mandango ye ni. Gi pëpe ti suku na mbeni zo ti sewa ni wala ti zia kamene na lê ti lo. Gboto lê na ndo nene ti ye so ala yeke manda ni, na tingbi ni na aye so atia mbilimbili sewa ti mo. Sala si zo oko oko ti sewa ni amû mbage dä. Mû maboko na zo oko oko ti bâ tongana nyen Tënë ti Jéhovah “alingbi kue” na yâ mungo tâ ye so zo ayeke na bezoin ni na yâ fini.​—Ps. 19:8.

Warango afuta ni

Azo so ahinga ti bâ ndo nzoni, me so agbu pëpe nda ti ye ti yingo, alingbi ti manda dunia, aye so ayeke si na ndo sese na même tele ti ala mveni, me ala gbu pëpe tâ nda ti ye so ala yeke bâ. Me ti azo so ayeke manda Bible lakue, na lege ti mungo maboko ti yingo ti Nzapa, ala lingbi ti bâ na yâ aye so kusala ti maboko ti Nzapa, gango tâ tënë ti aprophétie ti Bible nga zingo nda ti ye so Nzapa aleke ti sala teti deba nzoni ti azo so amä yanga.​—Marc 13:4-29; aRom. 1:20; Apoc. 12:12.

Ye tongaso ayeke pendere ye, me a lingbi a pusu e pëpe ti sala baba. Nde na so, gingo lâ oko oko nda ti Tënë ti Nzapa ayeke mû maboko na e ti ngbâ ti duti na be-ti-molenge (Deut. 17:18-20). A yeke bata e nga yongoro na ngangu ti “handa ti siokpari”. Ngbanga ti nyen? Ngbanga ti so tongana Tënë ti Nzapa ayeke na fini na yâ bê ti e, lekengo na bê ti e kue ti ke siokpari ayeke biani ngangu mingi ahon nzara ti sala siokpari (aHéb. 2:1; 3:13; aCol. 3:5-10). Tongaso, fade e yeke “tambela na lege so alingbi na Seigneur, ti mû ngia na Lo na yâ ye kue, si [e] lë na kusala ti nzoni kue”. (aCol. 1:10). A yeke ye so la e zia na gbele e ti si dä na yâ mandango Tënë ti Nzapa. Nga tongana e sala ye alingbi na ni, e yeke wara futa ti kota ahon atanga ni kue.