Use mbage ni: Salango a-étude so ayeke gue na li ni
Lekengo tele ti sala a-étude
1 Ti sala mbeni étude ti Bible nzoni, a hunda gi pëpe ti sala lisoro na ndo atënë ti yâ ti mbeti ni na ti diko aversê so a sû ni pëpe. A lingbi e fa ye ni na mbeni lege so andu bê ti wamandango ye ni. Ye so ahunda ti leke tele nzoni na bingo bê na zo ni.—aProv. 15:28.
2 Tongana nyen ti leke tele: Kozoni, sambela Jéhovah na ndo ti wamandango ye ni nga na abezoin ti lo. Hunda na Jéhovah ti mû maboko na mo ti ndu bê ti lo (aCol. 1:9, 10). Ti tene kota tënë ni aduti polele na li ti mo, mû kete ngoi ti bâ li ti tënë ti chapitre wala ye ti manda ni, akete li ti tënë nga aye tongana afoto. Hunda tele ti mo: ‘A ye ti gboto lê na ndo kota tënë wa?’ So ayeke mû maboko na mo ti sigigi na angbongboro tënë ni na ngoi so mo yeke sala étude ni.
3 Kiri mo bâ yeke yeke aparagraphe oko oko kue. Hinga mbilimbili akiringo tënë na ahundango tënë so a sû, na sungo kamba na gbe ti angbongboro tënë ni. Gi ti hinga tongana nyen aversê so a fa tënë ti yâ ni pëpe atingbi na kota tënë ti paragraphe ni, na mo soro so wa si a lingbi ti diko ni na ngoi ti mandango ye ni. Ti sû anote ti aversê na tele ti aparagraphe ni alingbi ti mû maboko na mo. Wamandango ye ni alingbi ti bâ ande so ye so lo yeke manda ayeke Tënë ti Nzapa.—1 aThes. 2:13.
4 Fa ye si alingbi na zo ni: Na pekoni, bâ ye ti manda ni na bingo bê na ndo ye so atia wamandango ye ni. Tara ti bâ kozoni ahundango tënë nga na atënë so peut-être lo lingbi ti wara kpale ti gbu nda ni wala ti yeda na ni. Hunda tele ti mo: ‘Ye nyen lo yeke na bezoin ti hinga wala ti sala si lo gue na li ni na lege ti yingo? Mbi lingbi ti ndu bê ti lo tongana nyen?’ Na pekoni, fa ye ni alingbi na ni. Ngoi na ngoi, mo lingbi ti bâ nene ti leke mbeni tapande, mbeni fango nda ti tënë wala ambeni hundango tënë ti mû maboko na zo ni ti gbu nda ti mbeni tënë wala versê (Néh. 8:8). Kpe ti yôro na yâ ni atënë so a yeke na bezoin ni pëpe ti tene kota tënë ni aga polele. Ti sala mbeni ndulu tënë ti dango bê na hunzingo ti étude ni ayeke mû maboko na zo ni ti bata angbongboro tënë ni.
5 Bâ ngia so e yeke wara ni tongana afini zo asi na lengo ti mbilimbili teti gloire ti Jéhovah! (aPhil. 1:11). Ti mû maboko na ala ti sala ye so, leke tele ti mo nzoni na ngoi kue so mo yeke sala mbeni étude.