E bi bê ti e na akoli wala awali ti aita so ayeke aTémoin pëpe
1. Ambeni ita aye si koli ti ala wala wali ti ala avoro Jéhovah. Nyen la afa so gi ala oko la ayeke na mara ti bibe so pëpe?
1 Ambeni wafango tënë ti yâ ti congrégation ti mo ayeke na awali wala akoli so ayeke Témoin ti Jéhovah pëpe? Tongana ayeke tongaso, kite ayeke pëpe so awafango tënë so aye ti tene akoli ti ala wala awali ti ala aga na yâ ti tâ vorongo legeoko tongana ala. Me, a yeke gi ala oko la aye ti tene akoli ti ala wala awali ti ala aga na yâ ti tâ vorongo pëpe. Legeoko tongana Nzapa, congrégation kue “aye si mara ti azo nde nde kue asö fini ti ala na ala si na tâ hingango ye na ndo ti tâ tënë.” (1 Tim. 2:4). Tongana nyen e lingbi ti bi bê ti e na akoli wala awali ti aita ti yâ ti congrégation ti e so ayeke aTémoin pëpe?
2. Tongana nyen sarango ye na ndara ayeke mû lege na e ti mû maboko na koli wala wali ti mbeni ita so ayeke Témoin pëpe?
2 Kozoni kue, a yeke nzoni e tara ti bâ aye tongana ti so zo so avoro Jéhovah pëpe ayeke bâ. Mingi ti ala aye sewa ti ala na ala yeke sara ngangu ti duti mbeni nzoni koli wala wali me aye so ala mä na bê na ni ayeke nde na ti ti e. Peut-être ye so ala hinga na ndo ti aTémoin ti Jéhovah ayeke gi atënë so ala mä na yanga ti akamarade ti ala so ayeke na nzoni bango ndo pëpe na ndo ti e wala so ala nga kue ahinga ye nzoni pëpe na ndo ti e. Bê ti ambeni alingbi ti son ngbanga ti angoi so awali ti ala wala akoli ti ala ayeke mû kozo ti duti na sewa, ala yeke mû ni ndali ti kua ti Jéhovah. Sarango ye na ndara ayeke mû maboko na e ti sara ye na nzoni bê nga na nengo zo na mbage ti zo so avoro Jéhovah pëpe na e kpe ti gi bê ti e ahon ndo ni tongana e yeke na tere ti zo ni.—aProv. 16:20-23.
3. Nzoni lege ti ga na koli wala wali ti mbeni ita na yâ ti tâ tënë ayeke peut-être so wa?
3 E bi bê ti e na zo ni: Nzoni lege so e lingbi ti ga na koli wala wali ti mbeni ita na yâ ti tâ tënë ayeke peut-être kozoni kue na lege ti asarango ye ti e, me pëpe na lege ti alisoro na ndo ti Bible (1 Pi. 3:1, 2). Ye so ayeke kota na ndo ti tënë so ayeke ti bi bê na zo ni. Aita-wali alingbi ti bi bê ti ala na awali ti aita so ayeke Témoin pëpe, nga aita-koli alingbi ti sara tongaso na mbage ti akoli ni. Na lege wa?
4. Tongana nyen e lingbi ti fa so e yeke bi bê ti e na koli wala wali ti mbeni ita so avoro Jéhovah pëpe?
4 Tongana ade mo tingbi na zo ni kozo pëpe, peut-être mo lingbi ti sara ni na peko ti so mo sara tënë ni na koli ni wala wali ni so ayeke ita. Zia si mo nze pëpe tongana zo ni adë dengo na mbage ti mo na ngoi so mo gue ti bâ lo. So e yeke bi bê ti e na lo na e ye ti sara songo na lo a lingbi ti sara si lo bâ aTémoin ti Jéhovah na nzoni lê (aRom. 12:20). Ambeni Chrétien so akpengba na lege ti yingo ayeke tisa koli wala wali ti mbeni ita nga na sewa ti lo ti te ye na ndo ti ala tongaso si ala hinga lo nzoni na ti zi na yâ ti li ti lo atënë so azo ayeke tene kirikiri na ndo ti aTémoin ti Jéhovah. Ala yeke sara lisoro na lo na ndo ti aye so agbu bê ti lo ahon ti gi ti sara lisoro ni na ndo ti tënë ti Nzapa. Mbeni la tongana ala na zo ni ahinga tere nzoni, ala lingbi ti sara lisoro na ndo ti Bible senge. Wala peut-être lo lingbi ti yeda na tisango ndo ti ga na abungbi ti e ti bâ ye so wali ti lo ayeke manda so, mbilimbili teti so lo hinga ambeni ita ti congrégation ni awe. Même atâa tongana lo yeke nduru ti gi ti hinga tâ tënë pëpe, e lingbi ti gonda lo ndali ti so lo yeke mû maboko na wali ti lo so ayeke ita.
5. Na lege wa a-ancien ayeke bi bê ti ala na akoli wala na awali ti aita so ayeke Témoin pëpe?
5 A yeke nzoni a-ancien abi bê ti ala na akoli wala na awali ti aita so ayeke Témoin pëpe na ala zi lê ti ala na ndo ti alege so ayeke zi na ala ti fa tënë na ala. Zo so ayeke Témoin ti Jéhovah pëpe na so ayeda ti sara lisoro na ndo ti Bible pëpe alingbi ti mä mbeni wango so a yeke mû na lo ti kpengba lo tongana a gbanzi lo na hôpital wala lo wara angangu kpale ti seni. Tongana sewa so koli na wali ni avoro Nzapa nde nde atingbi na kpale, kpale tongana ti kuâ ti mbeni zo ti sewa ni, a-ancien alingbi ti tisa mbeni oko so ayeke Témoin pëpe ti ga ti duti dä na ngoi so ala yeke mû wango ti kpengba sewa ni.
6. Ndani so e yeke bi bê ti e na akoli wala awali ti aita so ayeke Témoin pëpe so ayeke nyen?
6 E bâ ngia so mbeni ita na yâ ti congrégation ayeke wara tongana koli ti lo wala wali ti lo ayeda ti ga na yâ ti tâ tënë. Ye so ayeke mû kota ngia na Jéhovah, na a-ange nga na aita kue na yâ ti congrégation (Luc 15:7, 10). Ye oko, tongana zo ni so ayeke Témoin pëpe so ayeda pëpe na tongo nda ni na aye kue so e sara, e lingbi ti duti na ngia lakue teti so angangu so e sara anzere na Jéhovah so “lo ye si zo oko akui pëpe, me lo ye si azo kue achangé bê ti ala.”—2 Pi. 3:9.
[Kete tënë na lembeti 6]
Nzoni lege so e lingbi ti ga na koli wala wali ti mbeni ita na yâ ti tâ tënë ayeke peut-être kozoni kue na lege ti asarango ye ti e, me pëpe na lege ti alisoro na ndo ti Bible