Mû tapande ti Jésus: Fa ye na ndoye

“Mbeni zo asara tënë tongaso lâ oko pëpe.”​—JEAN 7:46.

1. Fango ye ti Jésus asara nyen na ndo ti azo?

TARA ti bâ tongana nyen a duti lani ye ti ngia mingi ti mä Jésus na fango ye na azo! Bible afa na e tongana nyen Jésus asara ye na ndo ti azo so lo tingbi na ala. Na tapande, Luc mbeni wasungo Évangile atene na ndo ti azo ti kodoro ti Jésus atene so “bê ti ala adö ndali ti apendere tënë so ayeke sigigi na yanga ti lo.” Ti azo so amä Jésus lani na ngoi so lo yeke fa ye na ndo ti hoto, Matthieu atene so “li ti [ala] akpe ngbanga ti kode ti fango ye ti lo”. Na Jean atene ti lo so aturugu so a tokua ala ti gbu Jésus akiri maboko senge, ala tene: “Mbeni zo asara tënë tongaso lâ oko pëpe.”​—Luc 4:22; Mat. 7:28; Jean 7:46.

2. Akode ti fango ye wa Jésus ayeke na ni lani?

² Aturugu so atene tâ tënë. Jésus ayeke biani kota Wafango ye so ade a wara mara ti lo na sese so pëpe. Fango ye ti lo ayeke ka polele, a kpengba pëpe nga zo alingbi ti ke ni pëpe. Na kode, lo yeke sara kusala na atoli nga na ahundango tënë. Lo yeke sara si fango ye ti lo alingbi na ngangu ti azo so lo yeke fa ye ni na ala, atâa ala yeke azo so ayeke na kota ndo wala asenge zo. A yeke ngangu na zo pëpe ti mä yâ ti atâ tënë so lo yeke fa, atâa so yâ ni alï mingi. Ye oko, a yeke gi ndali ti aye so pëpe si Jésus ayeke lani kota Wafango ye.

Kota ye ni ayeke ndoye

3. Nyen la afa so Jésus ayeke mbeni wafango ye so ayeke nde mingi na amokonzi-nzapa ti ngoi ti lo?

³ Na popo ti ascribe nga na aFarizien, kite ayeke dä pëpe so ambeni ahinga ndo mingi nga ala yeke na akode ti fango ye na zo. Me nyen la asara si lege so Jésus ayeke fa na ye ayeke nde mingi na ti ala? Amokonzi-nzapa ti ngoi ni so aye tanga ti azo ni pëpe. Ala yeke ne azo ni pëpe, nga ala bâ ala tongana “azo so a deba ala awe.” (Jean 7:49). Me ti Jésus, lo yeke bâ mawa ti azo ni “ngbanga ti so a sara pasi na ala nga yâ ti ala akangbi kirikiri tongana angasangbaga so ayeke na berger pëpe.” (Mat. 9:36). Lo sara ye na azo na bê ti lo kue, lo bâ mawa ti azo nga lo yeke na nzoni bê. Nga, amokonzi-nzapa ti ngoi ni kâ ayeke na tâ ndoye na mbage ti Nzapa pëpe (Jean 5:42). Me ti Jésus, lo ndoye Babâ ti lo nga lo yeke na ngia ti sara ye so bê ti lo aye. Amokonzi-nzapa ti ngoi ti lo aba yâ ti atënë ti Nzapa ti sara na ye ti bê ti ala, me Jésus andoye “tënë ti Nzapa”, lo fa ni, lo zi nda ni, lo gbu koko ni nga lo sara ye alingbi na ni (Luc 11:28). Biani, a bâ ndoye na yâ ti asarango ye ti tere ti Christ, na yâ ti aye so lo yeke fa, na yâ ti sarango ye ti lo na azo, nga na yâ ti lege so lo yeke fa ye na azo.

4, 5. (a) Ngbanga ti nyen a yeke kota ye mingi ti fa ye na ndoye? (b) Na ndo ti tënë ti fango ye, ngbanga ti nyen a yeke kota ye ti hinga ye ni nzoni nga ti fa ni nzoni?

⁴ Ka ti e, a yeke tongana nyen? Teti so e yeke adisciple ti Christ, e ye ti mû tapande ti lo na yâ ti kusala ti e ti fango tënë nga na yâ ti fini ti e (1 Pi. 2:21). Tongaso, ye so e zia na gbele e ti sara ayeke gi pëpe ti fa hingango ye ti Bible na azo me nga ti sara ye tongana ti Jéhovah, mbilimbili na ndo ti tënë ti ndoye. Atâa e hinga ye mingi wala kete, e yeke na gbâ ti akode ti fango ye wala kete, ndoye so e yeke na ni ayeke mû maboko na e ti ndu bê ti azo so e yeke fa ye na ala. Ti lë lengo na yâ ti kusala ti e ti sarango si azo aga adisciple, a yeke nzoni e mû tapande ti Jésus na fango ye na ndoye.

⁵ Biani, ti duti anzoni wafango ye, e yeke na bezoin ti hinga ye nzoni na ndo ti ye so e yeke fa nga e yeke na bezoin ti fa ye ni so nzoni. Jésus amû maboko lani na adisciple ti lo ti sara aye use so kue, nga Jéhovah na lege ti bungbi ti lo amû maboko na e ti sara tongaso laso. (Diko Ésaïe 54:13; Luc 12:42.) Ye oko, atâa so e zia na gbele e ti fa ye so e hinga, e yeke sara ni na bê ti e kue. Tongana e hinga ye ni, e fa ye ni nzoni nga e ye azo so e yeke fa ye na ala, ye ti pekoni alingbi ti duti nzoni mingi. Tongaso, na ngoi so e yeke fa ye na azo, e yeke sara tongana nyen ti fa so e ye ala? Jésus na adisciple ti lo asara ni lani tongana nyen? Zia e bâ ni fadeso.

A lingbi e ndoye Jéhovah

6. Tongana e ye mbeni zo, e yeke sara tënë tongana nyen na ndo ti lo?

⁶ E ye ka mingi ti sara tënë na ndo ti aye so e ndoye ni. Tongana e yeke sara tënë ti mbeni ye so agbu bê ti e, tere ti e ayeke nzere, na azo alingbi ti bâ na lê ti e so tere ti e anzere mingi. Ye so ayeke tâ tënë mbilimbili tongana e yeke sara tënë na ndo ti mbeni zo so e ndoye lo. Mingi ni, e yeke nduru ti fa na ambeni zo ye so e hinga na ndo ti zo ni. E yeke gonda zo ni, e yeke ne lo nga e yeke gbu koko ti lo. E sara tongaso ngbanga ti so e ye si azo aye zo ni so na asarango ye ti lo tongana ti so e ye na lo.

7. Ndoye ti Jésus na mbage ti Nzapa apusu lo ti sara nyen?

⁷ Kozoni ti sara si mbeni zo aye Jéhovah tongana ti e, a lingbi e wani e hinga lo nga e ye lo. A yeke na lege ni ti tene e sara tongaso teti vorongo tâ Nzapa aluti na ndo ti ndoyengo lo (Mat. 22:36-38). Jésus azia mbeni pendere tapande na e. Lo ndoye lani Jéhovah na bê ti lo kue, na bibe ti lo kue, na âme ti lo kue nga na ngangu ti lo kue. Teti so Jésus asara angu mingi mingi na tere ti Babâ ti lo na yayu kozo ti ga na sese, Jésus ahinga lo nzoni mingi. Ye ti pekoni ayeke nyen? Jésus atene: “Mbi ndoye Babâ.” (Jean 14:31). Atënë ti yanga ti Jésus kue nga na asarango ye ti lo kue afa so lo ye Babâ ti lo. Ndoye so apusu Jésus ti sara lakue aye so anzere na bê ti Nzapa (Jean 8:29). Ndoye so apusu lo ti sigigi na nda ti amokonzi-nzapa so atene ala yeke sara kusala na place ti Nzapa, andâ ala yeke handa lê ti azo gi senge senge. Nga, ndoye ni apusu lo ti sara tënë na ndo ti Jéhovah nga ti mû maboko na azo ti hinga Nzapa na ti ndoye lo.

8. So adisciple ti Jésus andoye Nzapa apusu lani ala ti sara nyen?

⁸ Akozo disciple ti Jésus aye Jéhovah tongana ti lo, na ndoye ni so apusu ala ti fa nzoni tënë na mbeto pëpe nga na yapungo tere. Ala sara si fango ye ti ala amû ndo kue na yâ ti Jérusalem, atâa so amokonzi-nzapa so ayeke na ngangu mingi atara ti kanga lege na ala. Adisciple ni alingbi pëpe ti zia ti sara tënë ti aye so ala bâ na ala mä (Kus. 4:20; 5:28). Ala hinga so Jéhovah ayeke lani na ala na lo yeke iri tënë nzoni na ndo ti ala, na a yeke ye so lo sara na ala! Biani, nduru na ngu 30 tongaso na peko ti kuâ ti Jésus, bazengele Paul alingbi ti sû na mbeti so a fa nzoni tënë awe “na création kue so ayeke na gbe ti yayu”.​—aCol. 1:23.

9. E lingbi ti kpengba ndoye ti e na mbage ti Nzapa tongana nyen?

⁹ Tongana e ye ti duti anzoni wafango ye, e nga kue a lingbi e sara kue ti ngbâ ti kpengba ndoye ti e na mbage ti Nzapa. E lingbi ti sara ni tongana nyen? Na lege so e yeke sara lisoro lakue na Nzapa na yâ ti sambela. Nga, e yeke sara si ndoye ti e na mbage ti Nzapa akpengba na lege so e yeke manda Bible, e yeke diko ambeti ti e nga e yeke gue lakue na abungbi ti congrégation. Na ngoi so e yeke hinga ye mingi na ndo ti Nzapa, ndoye ti lo ayeke si yâ ti bê ti e. Na pekoni, tongana azo abâ na yâ ti atënë ti e nga na asarango ye ti e so e ye Nzapa, a lingbi ti pusu ala ti lë songo na Jéhovah.​—Diko Psaume 104:33, 34.

A lingbi e ndoye ye so e yeke fa

10. A yeke hinga nzoni wafango ye na nyen?

¹⁰ Mbeni ye so a yeke hinga na mbeni nzoni wafango ye ayeke so lo yeke ndoye ye so lo yeke fa ni. A lingbi lo hinga so ye so lo fa ayeke tâ tënë, ayeke kota ye nga lo bâ ni na nene ni. Tongana mbeni wafango ye abi bê nzoni na ndo ti ye so lo yeke fa, a yeke bâ ngia ti bê ti lo, na ngia ni so ayeke sara ngangu mingi na ndo ti ala so lo yeke fa ye na ala. Na mbage, tongana mbeni wafango ye abâ na nene ni pëpe ye so lo yeke fa, awamandango ye ni alingbi ande ti bâ ni na nene ni? Bâ tongana buba ye pëpe tapande so mo lingbi ti zia ni na azo tongana mbeni wafango ye na ndo ti Mbeti ti Nzapa. Jésus atene: “Zo kue so a fa ye na lo nzoni mingi, lo yeke ga ande tongana wafango ye na lo.”​—Luc 6:40.

11. Ngbanga ti nyen Jésus aye lani ye so lo yeke fa?

¹¹ Jésus andoye lani ye so lo yeke fa. Lo hinga so lo yeke na ambeni kpengba ye ti fa: tâ tënë na ndo ti Babâ ti lo ti yayu, “atënë ti Nzapa” na “atënë so amû na zo fini ti lakue lakue.” (Jean 3:34; 6:68). Legeoko tongana mbeni lumière so aza na vukongo ndo, atâ tënë so Jésus ayeke fa ni afa na gigi aye so ayeke sioni na agboto lê mingi na ndo ti aye so ayeke nzoni. Atâ tënë ni amû beku nga adë bê ti azo ti tâ be-ti-molenge so amokonzi-nzapa ti wataka ahanda ala nga Zabolo asara pasi na ala (Kus. 10:38). Afango ye ti Jésus na asarango ye ti lo kue afa so lo ye tâ tënë mingi.

12. Bango ndo ti Paul na ndo ti fango nzoni tënë ayeke tongana nyen?

¹² Legeoko tongana ti Jésus, adisciple ti lo andoye tâ tënë na ndo ti Jéhovah nga na ti Christ na ala bâ ni na nene ni mingi, na a sara si awato ti ala alingbi lani pëpe ti zi nzara ti fango tënë na yâ ti ala. Paul asû mbeti na amba ti lo aChrétien ti Rome lo tene: “Mbi yeke tâ na kota nzara ti fa nzoni tënë . . . Teti mbi yeke na kamene ti nzoni tënë pëpe. Biani, nzoni tënë so ayeke ngangu ti Nzapa ndali ti salut ti zo kue so ayeke na mabe.” (aRom. 1:15, 16). Paul abâ fango tënë tongana mbeni ye so ayeke mû nengo na zo. Lo sû na mbeti lo tene: “A mû na mbi kota nzobe ti Nzapa so, si mbi fa na azo ti amara nde nzoni tënë ti amosoro ti Christ so zo alingbi ti gbu nda ni kue pëpe.” (aÉph. 3:8). A yeke ngangu pëpe ti hinga ngia so ayeke na bê ti Paul tongana lo yeke fa na azo tënë na ndo ti Jéhovah na aye so lo leke ti sara.

13. Anda ti tënë wa apusu e ti ye nzoni tënë?

¹³ Nzoni tënë so ayeke na yâ ti Bible amû lege na e ti hinga Wasarango ye na ti duti na nzoni songo na lo. Nzoni tënë so asara si zo awara anzoni kiringo tënë na akpengba hundango ndo so lo yeke na ni; nga a yeke na ngangu ti gbian fini ti e, ti mû na e beku nga ti kpengba e na ngoi ti aye ti vundu. Na ndo ni, a gboto lê na ndo ti mbeni nzoni gigi so ayeke hunzi ande lâ oko pëpe. Mbeni hingango ye so ayeke kota mingi ahon nzoni tënë so ayeke dä pëpe. A yeke mbeni kota matabisi so a mû na e, na so aga na e kota ngia. Nga, tongana e sara si amba ti e abâ nzoni na lege ti matabisi so, e yeke kiri ti wara ngia mingi ahon ti kozo.​—Kus. 20:35.

14. E lingbi ti sara nyen si e ndoye ye so e yeke fa ahon ti kozo?

¹⁴ Nyen la mo lingbi ti sara ti ye nzoni tënë ahon ti kozo? Na ngoi so mo yeke diko Bible, luti ngoi na ngoi ti gbu li ti mo na ndo ti ye so mo diko. Na tapande, tara ti bâ mo na tere ti Jésus na ngoi so lo yeke sara kusala ti lo na sese wala so mo yeke sara ayongoro tambela na tere ti bazengele Paul. Tara ti bâ tere ti mo so mo yeke na yâ ti fini dunia, na mo bâ tongana nyen gigi ni ayeke duti ande nde mingi. Gbu li ti mo na ndo ti aye ti nzoni so mo wara ndali ti so mo yeda na nzoni tënë. Tongana mo ye nzoni tënë ahon ti kozo, azo so mo yeke fa ye na ala ayeke bâ ni. Tongaso, a yeke na lege ni ti tene e gbu li ti e nzoni mingi na ndo ti ye so e manda nga e sara hange na ye so e yeke fa.​—Diko 1 Timothée 4:15, 16.

A lingbi e ndoye azo

15. Ngbanga ti nyen a lingbi awafango ye andoye azo so ala yeke fa ye na ala?

¹⁵ Nzoni wafango ye ayeke sara si azo so lo yeke fa ye na ala aduti nzoni tongaso si ala yeke na nzara ti mû tere ti ala na ye so ala yeke manda na ala duti na ngia ti mû mbage dä. Mbeni wafango ye so ayeke na ndoye ayeke nduru ti fa ye na azo so lo yeke fa ye na ala ndali ti so lo bi bê ti lo mingi na ala. Lo yeke sara si fango ye ti lo alingbi na bezoin ti azo ni nga na ngangu ti gbungo nda ti ye ti ala. Lo yeke bi bê ti lo na ngangu so ala yeke na ni nga na duti ti ala oko oko. Tongana awafango ye ayeke na mara ti ndoye tongaso, azo so ala yeke fa ye na ala ayeke bâ ni, na tongaso fango ye ni nga na mandango ye ni ayeke nzere.

16. Na alege wa Jésus afa lani so lo ndoye azo?

¹⁶ Jésus afa lani mara ti ndoye tongaso. Kota ndoye so lo fa ayeke so lo kä fini ti lo so alingbi kue si azo asö fini ti ala (Jean 15:13). Na ngoi ti kusala ti lo na sese, lo mû ngangu ti lo kue ti mû maboko na azo na lege ti mitele, na mingi ni na lege ti yingo. Ahon ti ku si azo aga na mbage ti lo, lo tambela akilomètre mingi mingi ti fa nzoni tënë na ala (Mat. 4:23-25; Luc 8:1). Lo hinga ti kanga bê ti ku nga lo hinga ti zia tere ti lo na place ti zo. Tongana adisciple ti lo asara mbeni ye so a hunda ti tene a suku na ala, lo yeke sara ni na ndoye (Marc 9:33-37). Lo wa ala na lege so lo fa na ala so ala yeke ga ande anzoni wafango nzoni tënë. Mbeni wafango ye so ayeke na ndoye mingi ahon Jésus ayeke dä pëpe. Ndoye so lo fa na adisciple ti lo apusu ala ti ndoye lo nga, na ti bata acommandement ti lo.​—Diko Jean 14:15.

17. Tongana nyen adisciple ti Jésus afa so ala ndoye azo?

¹⁷ Tongana ti Jésus, adisciple ti lo andoye mingi azo so ala yeke fa tënë na ala. Ala sara na azo nga ala wara lege ti fa nzoni tënë na ala, atâa so sarango ni ahunda ti tene ala kanga bê na yâ ti aye ti ngangu so a sara na ala nga ala zia fini ti ala na lê ti kuâ. Biani, ala ndoye azo so ayeda na nzoni tënë. Atënë ti bazengele Paul so andu bê ti zo mingi. Lo tene: “E sara ye na ala na nzoni bê tongana mbeni mama so ayeke mû me na amolenge ti lo na lo bata ala nzoni. Teti so e ye ala mingi, e yeke lani na ngia ti fa na ala gi nzoni tënë ti Nzapa pëpe, me e mû nga âme ti e kue na ala, ngbanga ti so ala ga azo so e ndoye ala mingi.”​—1 aThes. 2:7, 8.

18, 19. (a) Ngbanga ti nyen e yeke sara ngangu mingi ti fa tënë? (b) Mû mbeni tapande ti fa so ndoye so e yeke fa, azo ayeke bâ ni.

¹⁸ Legeoko nga, laso aTémoin ti Jéhovah ayeke gue na ando kue ti gi azo so asara nzara ti hinga Nzapa na ti sara na lo. Biani, na yâ ti angu 17 so ahon, e mû angbonga ngbundangbu mingi na yâ ti ngu oko oko ti fa tënë na ti sara si azo aga adisciple, na e ngbâ ti sara ni. E sara ni na bê ti e kue, atâa so kusala ti fango tënë ahunda ngoi ti e, ngangu ti e nga na amosoro ti e. Legeoko tongana Jésus, e hinga so Babâ ti e ti yayu aye si azo awara hingango ye so ague na zo na fini ti lakue lakue (Jean 17:3; 1 Tim. 2:3, 4). A yeke ndoye si apusu e ti mû maboko na azo ti vuru bê ti hinga Jéhovah nga ti ye lo tongana ti e.

¹⁹ Ndoye so e yeke fa, azo ayeke bâ ni. Na tapande, mbeni ita-wali so ayeke pionnier na Amerika asû ambeti ti dë bê ti azo so agirisa afami ti ala. Mbeni koli akiri tënë na lo atene: “Na ndembe so mbi wara mbeti ti mo, ye so apika bê ti mbi ayeke so mbeni zo so ahinga mbi pëpe amû ngoi ti lo ti sara mbeti na mbi ti mû maboko na mbi ti kanga bê na yâ ti ye ti ngangu so asi na mbi. Mbi bâ biani so mo ye amba ti mo nga mo ye Nzapa so ayeke fa lege na azo ti gue na fini.”

20. Ti fa ye na ndoye ayeke kota ye?

²⁰ A tene so tongana zo asara ye na ndoye nga na kode, ye ti nzoni mingi ayeke ga na pekoni. Na yâ ti fango ye ti e, e yeke gi ti mû maboko na azo so e yeke fa ye na ala ti hinga Jéhovah nga ti ye lo na bê ti ala kue. Biani, ti duti anzoni wafango ye, a yeke nzoni e ye Nzapa, e ye tâ tënë nga e ye azo. Tongana e gi ti duti na mara ti ndoye so na e yeke fa ni na yâ ti kusala ti e ti fango tënë, e yeke duti na ngia so zo ayeke wara na peko ti mungo ye na zo; a yeke sara nga si tere ti e anzere ti bâ so e mû tapande ti Jésus nga e nzere na lê ti Jéhovah.

Mo yeke kiri tënë tongana nyen?

• Na ngoi so e yeke fa nzoni tënë na azo, ngbanga ti nyen a yeke kota ye ti . . . 

ndoye Nzapa?

ndoye ye so e yeke fa?

ndoye azo so e yeke fa ye na ala?

[Foto na lembeti 17]

Nyen la asara si afango ye ti Jésus ayeke nde na ti ascribe na aFarizien?

[Foto na lembeti 20]

Nzoni fango ye ahunda hingango ye, kode nga na ndoye