Hundango Ndo
◼ Adiskur so ambeni ita a-enregistré ni wala amû note ni, a yeke nzoni ala tokua ni na azo nde nde?
Adiskur so a mû na bungbi akpengba e (Kus. 15:32). Ni la, so e ye ti kangbi asango ni na azo so aga na bungbi pëpe ayeke na lege ni. So agbakuru ndenge na ndenge ti mungo na go ti azo abâ gigi mingi fadeso, mbeni zo alingbi ti enregistré mbeni diskur na ti tokua ni hio na amba ti lo. Ambeni a-enregistré gbâ ti adiskur na ala yeke bata ni, na yâ ni a yeke wara adiskur so asara ngu mingi awe. Nga na nzoni bibe ala yeke mû ni na ambeni ita wala ala kiri a-enregistré ni ndali ti akamarade ti ala. Ti ambeni ita, ala zi asite Internet na ala zia adiskur ni na ndo ni ti tene azo amû ni na amä ni.
Tongana ala mû adiskur so ndali ti ala wani wala ndali ti afami ti ala, a yeke sioni pëpe. Na ndo ni, a-ancien alingbi ti leke ti tene a enregistré adiskur ndali ti aita so mbakoro wala kobela akanga lege na ala ti ga na bungbi. Ye oko, a yeke senge pëpe si a hunda na e ti kangbi pëpe adiskur so e enregistré ni wala so e mû note ni.
Teti so a yeke mû ka adiskur alingbi na bezoin ti congrégation, ati so a enregistré ni enregistrengo alingbi ti sara si e mä yâ ti atënë ni nde, teti e hinga pëpe ndani so a tene tënë tongaso na yâ ti diskur ni. Nga, a yeke duti ande ngangu na e ti hinga zo wa la amû diskur ni nga lawa. Ti hinga aye so ayeke sara si na bê ti e e hinga e tene tënë ni alingbi na ti ngbâa be-ta-zo nga ayeke tâ na lege ni (Luc 1:1-4). Ti kangbi na azo adiskur so a mû note ni wala so a enregistré ni alingbi ti pusu ambeni zo ti gi ti gboto lê mingi na ndo ti ala wani wala na ndo ti ita so amû diskur ni na nga ti yä iri ti ala.—1 aCor. 3:5-7.
Ngbâa be-ta-zo so ayeke sara ye na ndara asara kusala ngangu ti mû kobe ti yingo “alingbi na [e] na ngoi ni so alingbi”. (Luc 12:42). Ye so andu adiskur so a yeke mû na yâ ti congrégation ti aTémoin ti Jéhovah nga na ambeni ye so a zia na ndo ti site Internet jw.org ti aTémoin ti Jéhovah so zo alingbi ti gue dä na ti mû ti mä ni. Zia e hinga na bê ti e kue so ngbâa be-ta-zo so ayeke sara ye na ndara nga na Bebungbi ti lo ayeke mû na e ye so e yeke na bezoin ni si e kpengba na yâ ti mabe.—Kus. 16:4, 5.