၂ ရှမွေလ
၈ နောက်ပိုင်းမှာ ဒါဝိဒ်က ဖိလိတိလူတွေကို+ တိုက်ခိုက်နှိမ်နင်းပြီး+ မေသေဂမာအရပ်ကို သိမ်းယူလိုက်တယ်။
၂ မောဘလူတွေကိုလည်း+ အနိုင်ရတယ်။ သူတို့ကို မြေပေါ်မှာ တန်းစီလှဲအိပ်ခိုင်းပြီး ကြိုးနဲ့တိုင်းတယ်။ ကြိုးသုံးပုံနှစ်ပုံအတွင်းမှာကျတဲ့ လူတွေကို သတ်ပစ်ပြီး တစ်ပုံကိုတော့ အသက်ချမ်းသာပေးတယ်။+ ဒါကြောင့် မောဘလူတွေဟာ ဒါဝိဒ်ရဲ့ လက်အောက်ခံတွေ ဖြစ်လာပြီး ဆက်ကြေးပေးရတယ်။+
၃ ဇောဘဘုရင်+ ရဟောဘရဲ့သား ဟာဒဒေဇာက အာဏာပြန်ရအောင်လုပ်ဖို့ ယူဖရေးတီးမြစ်ဝှမ်းဒေသကို သွားတဲ့အခါ ဒါဝိဒ်က သူ့ကို နှိမ်နင်းပြီး၊+ ၄ မြင်းစီးသူရဲ ၁,၇၀၀၊ ခြေလျင်တပ်သား ၂၀,၀၀၀ ကို ဖမ်းခေါ်လာတယ်။ မြင်းအကောင် ၁၀၀ ကိုချန်ထားပြီး ကျန်တဲ့မြင်းအားလုံးကို တံကောက်ကြော ဖြတ်လိုက်တယ်။+
၅ ဇောဘဘုရင် ဟာဒဒေဇာကို စစ်ကူဖို့ ဒမတ်စကတ်မြို့သား ဆီးရီးယားလူတွေ+ ရောက်လာတဲ့အခါ ဒါဝိဒ်က ဆီးရီးယားတပ်သား ၂၂,၀၀၀ ကို နှိမ်နင်းပြီး၊+ ၆ ဆီးရီးယားပြည်၊ ဒမတ်စကတ်မြို့မှာ မြို့စောင့်တပ်တွေချထားလိုက်တယ်။ ဒါကြောင့် ဆီးရီးယားလူတွေဟာ ဒါဝိဒ်ရဲ့ လက်အောက်ခံတွေဖြစ်လာပြီး ဆက်ကြေးပေးရတယ်။ ယေဟောဝါက ဒါဝိဒ်စစ်ချီသွားတဲ့အခါတိုင်း အောင်ပွဲခံစေတယ်။+ ၇ ဒါဝိဒ်က ဟာဒဒေဇာရဲ့ မင်းမှုထမ်းတွေဆီကနေ ရွှေဒိုင်းဝိုင်းတွေကို သိမ်းယူပြီး ဂျေရုဆလင်မြို့ကို သယ်လာတယ်။+ ၈ ဟာဒဒေဇာပိုင်တဲ့ ဘေတမြို့နဲ့ ဗေရောသာမြို့ကနေ ကြေးနီအမြောက်အမြားကိုလည်း သိမ်းယူခဲ့တယ်။
၉ ဟာဒဒေဇာရဲ့ တပ်မကြီးတစ်ခုလုံးကို ဒါဝိဒ် ချေမှုန်းလိုက်တဲ့အကြောင်း+ ဟာမတ်ဘုရင်+ တောအိကြားတဲ့အခါ၊ ၁၀ သူ့သား ယောရန်ကို ဒါဝိဒ်မင်းဆီ လွှတ်တယ်။ ဟာဒဒေဇာကို တိုက်ခိုက်အနိုင်ယူတဲ့အတွက် ဂုဏ်ယူဝမ်းမြောက်ကြောင်းပြောပြီး နှုတ်ခွန်းဆက်ခိုင်းတယ်။ (ဟာဒဒေဇာက တောအိကို မကြာခဏ တိုက်ခိုက်ဖူးတယ်။) ယောရန်က ရွှေထည်ငွေထည်၊ ကြေးထည်တွေကိုလည်း ယူလာပေးတယ်။ ၁၁ ဒါဝိဒ်မင်းက အဲဒီပစ္စည်းတွေအပြင် သူသိမ်းယူခဲ့တဲ့ ရွှေငွေတွေ၊ တိုက်ရာပါဥစ္စာတွေကိုပါ ယေဟောဝါအတွက် ဆက်ကပ်လိုက်တယ်။+ ၁၂ ဆီးရီးယား၊ မောဘ၊+ အမ္မုန်၊ ဖိလိတိနဲ့+ အာမလက်လူမျိုးတွေအပြင်+ ဇောဘဘုရင် ရဟောဘရဲ့သား ဟာဒဒေဇာဆီက+ သိမ်းယူခဲ့တဲ့ ပစ္စည်းတွေပဲ။ ၁၃ ဒါဝိဒ်က ဆားချိုင့်ဝှမ်းမှာ ဧဒုံလူ ၁၈,၀၀၀ ကို နှိမ်နင်းပြီး ပြန်လာတဲ့အခါ ဂုဏ်သတင်း ပိုကြီးလာတယ်။+ ၁၄ ဧဒုံပြည်မှာလည်း မြို့စောင့်တပ်တွေ ချထားလိုက်တဲ့အတွက် ဧဒုံပြည်သားအားလုံး ဒါဝိဒ်ရဲ့လက်အောက်ခံတွေ ဖြစ်လာတယ်။+ ယေဟောဝါက ဒါဝိဒ်စစ်ချီသွားတဲ့အခါတိုင်း အောင်ပွဲခံစေတယ်။+
၁၅ အဲဒီနောက် ဒါဝိဒ်ဟာ အစ္စရေးတစ်ပြည်လုံးကို အုပ်စိုးတယ်။+ ပြည်သူပြည်သားအားလုံးကို တရားမျှတစွာ၊ ဖြောင့်မတ်စွာ+ စီမံအုပ်ချုပ်တယ်။+ ၁၆ ဇေရုယာရဲ့သား ယွာဘက+ ဗိုလ်ချုပ်၊ အဟိလုတ်ရဲ့သား ယောရှဖတ်က+ အတွင်းဝန်၊ ၁၇ အဟိတုပ်ရဲ့သား ဇာဒုတ်နဲ့+ အဗျာသာရဲ့သား အဟိမလက်က ပုရောဟိတ်၊ စရာယက စာရေးတော်ကြီး ဖြစ်တယ်။ ၁၈ ယောယဒရဲ့သား ဗေနာယက+ ခေရသိလူနဲ့ ပေလသိလူတွေကို+ အုပ်ချုပ်ရတယ်။ ဒါဝိဒ်ရဲ့သားတွေကတော့ ဝန်ကြီးတွေ ဖြစ်ကြတယ်။