၁ ရာဇဝင်ချုပ်
၂၁ စာတန်က* အစ္စရေးတွေကို တိုက်ခိုက်ဖို့ ဆုံးဖြတ်ပြီး အစ္စရေးလူဦးရေကို စာရင်းကောက်ချင်စိတ် ပေါ်လာအောင် ဒါဝိဒ်ကို လှုံ့ဆော်တယ်။+ ၂ ဒါကြောင့် ဒါဝိဒ်က ယွာဘနဲ့+ ဗိုလ်ချုပ်တွေကို “ဗေရရှေဘမြို့ကနေ ဒန်မြို့အထိ+ သွားပြီး အစ္စရေးလူဦးရေစာရင်း ကောက်ပါ။ လူဘယ်လောက်ရှိမှန်း သိနိုင်ဖို့ ငါ့ဆီ သတင်းပို့ပါ” လို့ပြောတယ်။ ၃ ဒါပေမဲ့ ယွာဘက “ယေဟောဝါဘုရားက မိမိလူမျိုးကို အခုထက် အဆ ၁၀၀ တိုးများအောင် လုပ်ပေးပါစေ။ သူတို့အားလုံးဟာ မင်းကြီးရဲ့လူတွေပဲ မဟုတ်လား။ ဒီကိစ္စကို မင်းကြီး ဘာလို့လုပ်ချင်ရတာလဲ။ အစ္စရေးတွေကို အပြစ်သင့်စေတဲ့သူ ဘာလို့ ဖြစ်ချင်ရတာလဲ” ဆိုပြီးပြောတယ်။
၄ ဒါပေမဲ့ ဒါဝိဒ်မင်းရဲ့စကားဟာ ယွာဘကို လွှမ်းမိုးနိုင်ခဲ့တယ်။ ဒါကြောင့် ယွာဘက အစ္စရေးတစ်ပြည်လုံးအနှံ့ ခရီးလှည့်လည်ပြီးတဲ့နောက် ဂျေရုဆလင်ကို ပြန်လာတယ်။+ ၅ ပြီးတော့ ဒါဝိဒ်မင်းကို လူဦးရေစာရင်း ပေးလိုက်တယ်။ အစ္စရေးအမျိုးမှာ ဓားကိုင်တပ်သား ၁,၁၀၀,၀၀၀၊ ယုဒအမျိုးမှာ ဓားကိုင်တပ်သား ၄၇၀,၀၀၀ ရှိတယ်။+ ၆ ယွာဘက ဒါဝိဒ်မင်းရဲ့စကားကို လုံးဝမကြိုက်တဲ့အတွက်+ လေဝိအနွယ်နဲ့ ဗင်ယာမိန်အနွယ်ကိုတော့ စာရင်းမကောက်ဘူး။+
၇ စစ်မှန်တဲ့ဘုရားသခင်က ဒီလုပ်ရပ်ကို လုံးဝမနှစ်သက်တဲ့အတွက် အစ္စရေးလူတွေကို ဒဏ်ခတ်တယ်။ ၈ အဲဒီအခါ ဒါဝိဒ်က “ကျွန်တော်လုပ်ခဲ့တဲ့ အပြစ်ဟာ ကြီးလေးလွန်းပါတယ်။+ မိုက်မဲတဲ့လုပ်ရပ်ကို ကျူးလွန်မိပါပြီ။+ ကျွန်တော့်အပြစ်ကို ခွင့်လွှတ်ပေးပါ”+ ဆိုပြီး ဘုရားသခင်ကို အသနားခံတယ်။ ၉ ဒါနဲ့ ဒါဝိဒ်ကို စိတ်အာရုံတွေ အသိပေးရတဲ့ ဂဒ်ကို ယေဟောဝါ မှာတယ်–+ ၁၀ “ဒါဝိဒ်ကို သွားပြောပါ၊ ‘“မင်းကို ငါဒဏ်ခတ်မယ်၊ ဒီဘေးဒဏ်သုံးခုထဲက တစ်ခုကို ရွေးပါ” လို့ယေဟောဝါ ပြောတယ်။’” ၁၁ ဂဒ်လည်း ဒါဝိဒ်မင်းဆီ ရောက်လာပြီး “ယေဟောဝါဘုရား ပြောတယ်– ‘ဒီဘေးဒဏ်သုံးခုထဲက ဘယ်တစ်ခုကို ရွေးမလဲ။ ၁၂ တိုင်းပြည်မှာ သုံးနှစ် အငတ်ဘေး ကျရောက်တာ၊+ သုံးလလုံးလုံး ရန်သူတွေရဲ့ ဓားဘေးကြောင့် ဖျက်ဆီးခံရတာ၊+ သုံးရက်လုံးလုံး ယေဟောဝါရဲ့ ဓားဖြစ်တဲ့ ကပ်ရောဂါ ကျရောက်ပြီး+ အစ္စရေးနယ်မြေအားလုံးကို ယေဟောဝါရဲ့ ကောင်းကင်တမန် ဖျက်ဆီးတာဆိုတဲ့+ ဘေးဒဏ်တွေပဲ။ ကျွန်တော့်ကို လွှတ်လိုက်တဲ့အရှင်ကို ပြန်ပြောရမှာမို့လို့ မင်းကြီး စဉ်းစားပါ” ဆိုပြီး လျှောက်တင်တယ်။ ၁၃ အဲဒီအခါ ဒါဝိဒ်က “ငါတော့ ဘေးကျပ်နံကျပ်ဖြစ်နေပြီ။ ယေဟောဝါရဲ့ ကရုဏာကြီးမားတဲ့အတွက် ကိုယ်တော့်လက်ထဲမှာပဲ ကျရောက်ပါစေ။+ လူ့လက်ထဲမှာတော့ မကျရောက်ပါစေနဲ့”+ ဆိုပြီးပြောတယ်။
၁၄ အဲဒီအခါ ယေဟောဝါက အစ္စရေးပြည်မှာ ကပ်ရောဂါ ကျရောက်စေတဲ့အတွက်+ အစ္စရေးလူ ၇၀,၀၀၀ သေဆုံးသွားတယ်။+ ၁၅ ဒါ့အပြင် ဂျေရုဆလင်မြို့ကို ဖျက်ဆီးဖို့ ကောင်းကင်တမန်ကို လွှတ်လိုက်တယ်။ ဒါပေမဲ့ ကောင်းကင်တမန် ဖျက်ဆီးတော့မယ်ဆိုတာကို ယေဟောဝါ မြင်တဲ့အခါ စိတ်မကောင်းဖြစ်ပြီး+ “တော်ပြီ။+ လက်ပြန်ရုပ်လိုက်တော့” လို့ တားတယ်။ အဲဒီအချိန်မှာ ယေဟောဝါရဲ့ ကောင်းကင်တမန်က ယေဗုသိလူမျိုး+ သြရနန်ရဲ့ ကောက်နယ်တလင်းနားမှာ+ ရပ်နေတယ်။
၁၆ ဒါဝိဒ် လှမ်းကြည့်တဲ့အခါ ယေဟောဝါရဲ့ ကောင်းကင်တမန်က မိုးနဲ့မြေကြားမှာ ရပ်နေပြီး ဓားကိုင်ထားတဲ့+ လက်ကို ဂျေရုဆလင်မြို့ဘက် ဆန့်ထားတာ တွေ့ရတယ်။ အထည်ကြမ်း*+ ဝတ်ထားတဲ့ ဒါဝိဒ်နဲ့ အကြီးအကဲတွေလည်း ချက်ချင်းပဲ ဦးညွှတ်ပျပ်ဝပ်လိုက်တယ်။+ ၁၇ ပြီးတော့ ဒါဝိဒ်က ဘုရားသခင်ကို “လူဦးရေစာရင်းကောက်ဖို့ ပြောခဲ့တာ ကျွန်တော်ပါ။ ပြစ်မှားသူဟာ ကျွန်တော်ပါ။ ကျွန်တော် အမှားလုပ်ခဲ့တာပါ။+ ဒီလူတွေ* ဘာလုပ်မိလို့လဲ။ ယေဟောဝါဘုရား၊ ကျွန်တော်နဲ့ အဖေ့အိမ်သားတွေအပေါ်မှာပဲ ကိုယ်တော့်လက် ကျရောက်ပါစေ။ လူမျိုးတော်အပေါ်မှာတော့ ဒီဘေးဆိုး မကျရောက်ပါစေနဲ့”+ ဆိုပြီး အသနားခံတယ်။
၁၈ အဲဒီအခါ ယေဟောဝါရဲ့ ကောင်းကင်တမန်က ယေဗုသိလူမျိုး သြရနန်ရဲ့ ကောက်နယ်တလင်းကို တက်သွားပါ၊ အဲဒီမှာ ယေဟောဝါအတွက် ပူဇော်ရာပလ္လင် တည်ပါဆိုပြီး+ ဒါဝိဒ်ကိုပြောဖို့ ဂဒ်ကို+ မှာလိုက်တယ်။ ၁၉ ဒါဝိဒ်လည်း ပရောဖက်ဂဒ်ကတစ်ဆင့် ယေဟောဝါ မိန့်မှာတဲ့အတိုင်း တက်သွားတယ်။ ၂၀ သြရနန် ဂျုံစပါးနယ်နေတုန်း လှမ်းကြည့်တော့ ကောင်းကင်တမန်ကို တွေ့သွားတယ်။ အဲဒီအခါ သူနဲ့အတူရှိနေတဲ့ သား လေးယောက် ပုန်းနေကြတယ်။ ၂၁ သြရနန်က သူ့ဆီ ဒါဝိဒ်လာနေတာကို မြင်တာနဲ့ ကောက်နယ်တလင်းကနေ ထွက်လာပြီး ဒါဝိဒ်ရှေ့မှာ ဦးညွှတ်ပျပ်ဝပ်တယ်။ ၂၂ ဒါဝိဒ်က “ယေဟောဝါဘုရားအတွက် ပူဇော်ရာပလ္လင် တည်ချင်လို့ မင်းရဲ့ကောက်နယ်တလင်းကို ရောင်းပေးပါ။ တန်ရာတန်ကြေး ပေးပါ့မယ်။ ဒါမှ လူတွေအပေါ် ကျရောက်နေတဲ့ ဘေးဒဏ် ရပ်တန့်သွားမယ်”+ လို့ပြောတယ်။ ၂၃ သြရနန်က “ဒီကောက်နယ်တလင်းကို ယူပြီး အရှင်မင်းကြီး အလိုရှိတဲ့အတိုင်းသာ လုပ်ပါ။ မီးရှို့ရာအလှူတွေအတွက် နွားတွေ၊ ကောက်နှံအလှူအတွက် ဂျုံစပါးတွေနဲ့ ထင်းဆိုက်ဖို့ ကောက်နယ်ပြားကို+ ပေးပါ့မယ်။ ဒါတွေအားလုံးကို ကျွန်တော်ပေးပါတယ်” လို့ ဒါဝိဒ်ကို ပြောတယ်။
၂၄ ဒါပေမဲ့ ဒါဝိဒ်မင်းက “မဖြစ်ဘူး။ တန်ရာတန်ကြေးပေးပြီး ဝယ်မှဖြစ်မယ်။ မင်းရဲ့ဥစ္စာတွေကို ယူပြီး ယေဟောဝါဘုရားကို မပေးချင်ဘူး။ အဖိုးအခမပေးဘဲရတဲ့ မီးရှို့ရာ ပူဇော်သက္ကာတွေကို ငါမပူဇော်ချင်ဘူး”+ လို့ပြောပြီး၊ ၂၅ အဲဒီကောက်နယ်တလင်းအတွက် ရွှေရှယ်ကယ်* ၆၀၀ ကိုချိန်ပြီး သြရနန်ကို ပေးလိုက်တယ်။ ၂၆ ဒါဝိဒ်က အဲဒီမှာ ယေဟောဝါအတွက် ပူဇော်ရာပလ္လင်တည်ပြီး+ မီးရှို့ရာပူဇော်သက္ကာတွေနဲ့ မိတ်သဟာယ ပူဇော်သက္ကာတွေကို ပူဇော်တယ်။ ပြီးတော့ ယေဟောဝါဆီ ဆုတောင်းတဲ့အခါ ပူဇော်ရာပလ္လင်ပေါ် ကောင်းကင်ကနေ မီးကျလာတယ်။+ ဒီနည်းနဲ့ ကိုယ်တော် ဖြေကြားပေးတယ်။ ၂၇ ယေဟောဝါက ကောင်းကင်တမန်ကို+ ဓားအိမ်ထဲ ဓားပြန်သွင်းဖို့ အမိန့်ပေးတယ်။ ၂၈ ဒါဝိဒ်က ယေဗုသိလူမျိုး သြရနန်ရဲ့ ကောက်နယ်တလင်းမှာ ယေဟောဝါ ဖြေကြားမှန်း သိတဲ့အခါ အဲဒီမှာ အမြဲ ပူဇော်တော့တယ်။ ၂၉ တောကန္တာရမှာ မောရှေဆောက်ခဲ့တဲ့ ယေဟောဝါရဲ့ တဲတော်နဲ့ မီးရှို့ပူဇော်ရာပလ္လင်ကတော့ အဲဒီတုန်းက ဂိဗောင်မြို့၊ အထွတ်အမြတ်နေရာမှာ ရှိနေတယ်။+ ၃၀ ဒါပေမဲ့ ဒါဝိဒ်က ယေဟောဝါရဲ့ ကောင်းကင်တမန် ကိုင်ထားတဲ့ ဓားကို ကြောက်လို့ ဘုရားသခင်ကို မေးမြန်းဖို့ အဲဒီနေရာကို မသွားရဲဘူး။