Ubwami bw’Imana ni iki?

ICYO BIBILIYA IBIVUGAHO

“Imana yo mu ijuru izimika ubwami butazigera burimburwa.”​—Daniyeli 2:44, Bibiliya​—Ubuhinduzi bw’isi nshya.

“Twahawe umwana w’umuhungu, kandi ubutware buzaba ku bitugu bye.”​—Yesaya 9:6.

ICYO BISHOBORA KUKUMARIRA

• Ubutegetsi bukiranuka bushobora kukugirira akamaro ku giti cyawe.​—Yesaya 48:17, 18.

• Mu isi nshya yegereje, uzagira ubuzima butunganye n’ibyishimo.​—Ibyahishuwe 21:3, 4.

ESE KOKO DUSHOBORA KWEMERA IBYO BIBILIYA IVUGA?

Yego rwose! Hari nibura impamvu ebyiri:

• Yesu yagaragaje ibyo Ubwami bw’Imana buzakora. Yesu yigishije abigishwa be gusenga basaba ko Ubwami bw’Imana buza, ibyo Imana ishaka bigakorwa ku isi (Matayo 6:9, 10). Yesu yagaragaje uko iryo sengesho rizasubizwa.

  Igihe Yesu yari ku isi yagaburiye abashonje, akiza abarwayi kandi azura abapfuye (Matayo 15:29-38; Yohana 11:38-44). Kubera ko Yesu ari Umwami w’Ubwami bw’Imana, yatanze umusogongero w’icyo ubwo Bwami buzakorera abayoboke babwo.​—Ibyahishuwe 11:15.

• Ibibera ku isi bigaragaza ko Ubwami bw’Imana buri hafi kuza. Yesu yahanuye ko iyi si yari kuyogozwa n’intambara, inzara n’imitingito, mbere y’uko Ubwami buzana amahoro ku isi.​—Matayo 24:3, 7.

  Ibyo byose turabibona muri iki gihe. Ubwo rero, dushobora kwiringira tudashidikanya ko Ubwami bw’Imana buri hafi kuvanaho ibyo bibazo byose.