Omwanzi mwinja guli guhi?

1. Mwanzi mwinja guhi gurhenzire emwa Nnamahanga?

Nnamahanga alonzize abantu babe n’akalamo k’omwishingo han’igulu. Àlemîre igulu na ngasi bibamo bulya arhusima. Omu nsiku ziyegerire, arhuha akalamo kinja omu ngasi cihugo. Ayishikulira abantu ngasi kantu kalerha amalibuko.​—Osome Yeremiya 29:11.

Nta burhegesi bwa han’igulu bwankakulira abantu obunizi, endwala erhi olufu. Cikwone Nnamahanga arhuhire omwanzi mwinja. Adesire oku ali hofi ahererekeze oburhegesi boshi bw’abantu, ahireh’obwage burhegesi. Abayishi rhambulwa n’obwo burhegesi, bayishibona omurhula n’okuba n’amagala minja.​—Osome Izaya 25:8; 33:24; Daniyeli 2:44.

2. Bici birhumire ogwo mwanzi guli gwa bulagirire muli gano mango?

Amalibuko gahwa hano Nnamahanga ahererekeza abantu babi han’igulu. (Sofoniya 2:3) Mangaci ajira ntyo? Kurhenga mira, Ebibliya, Kanwa ka Nnamahanga, yali edesire oku aga malibuko gankahabire. Ebiri byajirikana ene omw’igulu biyerekine oku Nnamahanga akol’ali hofi akule aga malibuko goshi.​—Osome 2 Timoteyo 3:1-5.

3. Bici rhugwasirwe okujira?

Rhugwasirwe rhuyige okumanya Nnamahanga kugerera oku Kanwa kage, Bibliya. Ebibliya eri nka maruba omubusi w’obuzigire ayandikira abana bage. Erhuyeresire ebi rhugwasirwe okujira lyo rhuba n’akalamo kinja ene, na lyo rhuyishiba n’obuzine bw’ensiku n’amango han’igulu omu nsiku ziyishire. Kobinali, bantu baguma baguma banagaya okukubona oli wayiga Ebibliya. Cikwone, oboba burharhumaga watwik’entege, lyo orhagiheza akalamo kinja Nnamahanga akurheganyize.​—Osome Emigani 29:25; Amafulûlo 14:6, 7.