Omulwi w’Ivita n’Ehyana-Nyere

Omu cihugo c’e Siriya, mwali ehyana-nyere hy’e Israheli hyahekagwa kuli n’emwabo. Basoda b’e Siriya bamuhekaga kuli n’omulala gwage, anal’ikola ali akolera muka Nahamani mukulu w’abasoda. Ehyo hyana-nyere hyakag’iharamya Yehova ciru akaba abantu bal’ihizungulusire bohe barhakag’imuharamya.

Nahamani agwerhe endwala ndarhi y’oluhu yakag’ihamagalwa lushomyo, anayusize kasanzi kanji agwerhe amalumwa madarhi. Ehyo hyana-nyere hyal’ilonzize himurhabale. Hyabwira muka Nahamani ntya: ‘Manyire muntu mulebe wakafumya balo. Elisha aba mulebi wa Yehova oba omu cihugo c’e Israheli. Anafumya balo.’

Muka Nahamani abwira iba ebi ehyo hyana-nyere hyaderhaga. Bulya Nahamani al’ilonzize afume, aja emwa Elisha e Israheli. Nahamani al’irhanyize oku Elisha amuyegereza nka muntu w’obulagirire bwenene. Cikone ahali h’okuganiza Nahamani busu oku busu, Elisha amurhumira omukozi wage ly’amubwira ntya: ‘Ogende aj’icikweba kali nda omu Lwishi Yordani. Enyuma z’aho wafuma.’

Nahamani agaya bwenene. Anaderha ntya: ‘Nal’irhanyize oku oyo mulebi anfumya omu kusalira Mungu wage n’omu kumpumako. Ahali h’okujira ntyo, amambwira njiyogera omu lwishi lw’e Israheli. Rhugwerhe enyishi nyinja e Siriya. Ka ntakagend’icikweba omu nyishi z’emwirhu?’ Nahamani agaya, anarhenga emwa Elisha.

Abakozi ba Nahamani bamurhabala ly’akubula entanya zage. Bamubwira ntya: ‘Ka hali akantu orhankajira ly’ofuma? Ebi oyu mulebi anakubwizire ojire bili bilembu bwenene. K’orhakabijira kone?’ Nahamani abayumvirhiza. Nahamani aja omu Lwishi Yordani anacikwebamwo kali nda. Erhi ayus’icikweba obwa kali nda, Nahamani arhenga omu mishi erhi anakola afumire yeshi. Ashagaluka bwenene anagend’ivuga Elisha omunkwa. Nahamani aderha ntya: ‘Nkolaga manyire oku Yehova ye Mungu w’okuli.’ Gurhi orhanyize hilya hinyere hy’e Israheli hyaciyumvirhe erhi Nahamani agaluka anakola afumire?