Omurhwe gw’Abasoda ba Yehova

Ben-hadadi, mwami w’e Siriya, agendekera arhera e Israheli. Cikone ngasi mango omwami w’e Israheli akafulumuka bulya omulebi Elisha akag’imuha oburhonde. Ntyo Ben-hadadi ahiga okuhêka Elisha cirimisi. Ben-hadadi amanya oku Elisha ali omu vile y’e Dotani, anarhumayo abasoda b’e Siriya lyo bamugwarha.

Abasiriya bahika e Dotani budufu. Erhi buca sezi, omukozi wa Elisha ahuluka anabona evile ezungulusirwe n’abasoda banji. Ayoboha anaderha ntya n’izu linene: ‘Elisha, gurhi rhwajira?’ Elisha amubwira ntya: ‘Abali haguma na nirhu bali banji kulusha abali haguma nabo.’ Mw’ako kasanzi, Yehova ajira omukozi wa Elisha abone oku entondo zal’izungulusire eyo vile zal’iyunjwire nfarasi nyinji n’emituga y’okulwa ivita y’omuliro.

Erhi abasoda b’e Siriya balonza okugwarha Elisha, asalira ntya: ‘Yehova, wekasinga obajire babe mihurha.’ Akantu k’okusomeza kuli kubona oku ciru akaba abo basoda bacikag’ibona, barhahugûkagwa aha bali. Elisha abwira abo basoda ntya: ‘Mwahabusire. Munkulikire, namuyeresa omulume muli mwalonza.’ Bakulikira Elisha e Samariya emunda mwami w’e Israheli al’ilamire.

Erhi Abasiriya bahugûkwa emunda bali, nta kantu bakacijijire. Mwami w’e Israheli adosa Elisha ntya: ‘Ka mbanige?’ Ka Elisha akolesize ako kasanzi ly’acihôla oku bantu balonzagya okumujira kubi? Nanga. Elisha aderha ntya: ‘Orhabanigaga. Obahe ebiryo, onabaleke bagende.’ Ntyo oyo mwami abajirira idinye n’enyuma z’aho abaleka bagende emwabo.