Yehoyada Ali wa Burhwali

Yezebeli agwerhe omwali wakag’ihamagalwa Ataliya, wali mubi aka nina. Ataliya ali muka mwami w’e Yuda. Erhi iba afâ, omugala arhondera arhambula. Cikone erhi omugala afâ, Ataliya acijira murhegesi w’e Yuda. Cikone buzinda alonza okuyusa loshi omulala gwakag’irhengamwo abami, omu kuniga ngasi muntu wakabire murhegesi ahali hage, ciru aniga na binjikulu bage. Ngasi muntu akag’imuyoboha.

Kuhani Mukulu Yehoyada na mukage Yehosheba, bal’imanyire oku ebi Ataliya akag’ijira byali bibi bwenene. Bahira obuzine bwabo omu mazibu lyo bafulika mwinjikulu muguma wa Ataliya wakag’ihamagalwa Yowasi. Bamulerera omu hekalu.

Erhi Yowasi agwerhe myaka nda, Yehoyada ahamagala abarhambo boshi na Bene-Levi anababwira ntya: ‘Mulange enyumvi z’ehakalu, murhanayemeraga omuntu yeshi-yeshi ajamwo.’ Enyuma z’aho Yehoyada ajira Yowasi abe mwami w’e Yuda anamuyambisa ishungwe okw’irhwe. Abantu b’e Yuda baderha ntya n’izu linene: ‘Mwami alame nsiku nyinji!’

Mwami-kazi Ataliya ayumva olubi lw’abantu analibirhira ebwa hekalu. Erhi abona omwami muhyahya, ayama ntya n’izu linene: “Bagoma! Bagoma!” Abarhambo bagwarha oyo mwami-kazi mubi bamuhulusa banamuniga. Cikone gurhigi byabire lugenda olugenzi lubi ashumyagya abantu babe nalo?

Yehoyada arhabala abantu bajire eciragane haguma na Yehova omu kumulaganya oku bamuharamya yene. Yehoyada ababwira bashabe ehekalu ya Baali, bavunyungule n’ensanamu zali omu cihugo. Ahiraho bakuhani na Bene-Levi bakakolera omu hekalu ly’abantu bacib’ikaharamizamwo. Ahiraho abalanzi b’emihango bakalanga ehekalu ly’omuntu orhaciri arhakag’ijamwo. Enyuma z’aho Yehoyada n’abarhambo bahêka Yowasi ebwa nyumpa ya mwami banamutamaza oku cirhi c’obwami. Abantu b’e Yuda bashagaluka. Bulya Ataliya arhacihali n’enterekêro ya Baali erhacihali, abantu bacib’iba n’obulyo bw’okuharamya Yehova bwinja. K’obwine gurhi oburhwali bwa Yehoyada bwarhabiremwo bantu banji?