Yehova Alembire Yona

Abantu b’omu vile y’e Ninawi omu Ashuru, bali babi bwenene. Yehova abwira omulebi wage Yona oku aje e Ninawi ly’abarhonda oku bihunyire bashanje olugenzi lwabo. Cikone Yona ayakira omu eneo eri lubero n’eyi bamurhumagamwo. Aja omu bato yakag’ija e Tarsisi.

Erhi ebato eba eri oku nyanja, haba omulaba munji bwenene, n’abakag’ikola omu bato bayoboha bwenene. Bakashenga bamungu babo n’okudosa ntya: ‘Bulya gurhi ebi birhuhikire?’ Buzinda, Yona ababwira ntya: ‘Nie ntumire byabahikira. Ndi nayaka lyo ntag’ijira ebi Yehova ambwiraga njire. Munkwebe omu nyanja, n’ogu mulaba gwahwa.’ Abakag’ikola omu bato barhal’ilonzize bakwebe Yona omu nyanja, cikone abaseza bajire ntyo. Erhi bamukweba omu nyanja, omulaba gwahwa.

Yona arhanya oku afâ. Erhi aba ali omu muhengere gw’enyanja, ashenga Yehova. Enyuma z’aho Yehova arhuma ensamaki nnenene. Yamira Yona, cikone erhamunigaga. Erhi ali omu nda y’eyo nsamaki, Yona asalira ntya: ‘Ndaganyize oku nakakurhumikira ensiku zoshi.’ Yehova alanga Yona nsiku isharhu omu nda y’eyo nsamaki na buzinda alongoza eyo nsamaki yamushalira ebulambo.

Okuba Yehova ayokwire Yona, ka kuli kuderha oku arhacir’ishinganine aje e Ninawi? Nanga. Yehova ashub’ibwira Yona aje e Ninawi. Lero, Yona arhumikira. Aja e Ninawi anabwira abo bantu babi b’eyo munda ntya: ‘Omu nsiku 40, evile y’e Ninawi yasherezibwa.’ Enyuma z’aho akantu k’okusomeza kajirikana, abantu b’e Ninawi bayumvirhiza banashanja olugenzi lwabo. Mwami w’e Ninawi abwira abantu bage ntya: ‘Mulakire Mungu, munaciyunjuze. Nkabaga arharhushereze.’ Erhi Yehova abona oku abantu baciyunjuzize, arhacisherezagya evile y’e Ninawi.

Yona agaya okubona eyo vile erhacisherezibagwa. Orhanye kuli oku: Yehova alembire Yona anamuyeresa olukogo, cikone Yona arhayeresagya abantu b’e Ninawi olukogo. Lubero n’oko, atamala embuga z’evile omu cihoho c’olungu lunenene arhanashagalusiri. Erhi olo lungu luyuma, Yona akunira bwenene. Yehova amubwira ntya: ‘Wamayumviza ogu murhi obonjo bwenene ahali h’okubuyumviza abantu b’e Ninawi. Nababerire obonjo, bamanayokoka.’ Bici Yehova alonzagya okuyigiriza Yona? Abantu b’e Ninawi bo bali ba bulagirire bwenene kulusha ngasi murhi.