ISOMO LYA 55
Malahika wa Yehova Alanzire Hezekiya
Obwami bw’e Ashuru bwal’ikola buli bwarhegeka amûko ikumi g’obwami bw’e Israheli. Senakeribu, mwami w’e Ashuru al’ilonzize arhôle n’amûko abirhi g’obwami bw’e Yuda. Bunyi-bunyi arhondera arhôla evile z’e Yuda. Cikone evile al’ilonzize arhôle yali y’e Yeruzalemu. Senakeribu arhamanyaga oku Yehova akag’ilanga evile y’e Yeruzalemu.
Hezekiya, mwami w’e Yuda, alipa Senakeribu nsaranga nyinji ly’arhag’ishereza evile y’e Yeruzalemu. Ciru akaba Senakeribu arhozire ezo nsaranga, agendekera arhuma abasoda bage b’emisi lyo bagend’irhera evile y’e Yeruzalemu. Abantu bali omu vile y’e Yeruzalemu bayoboha bwenene bulya Abaashuru bal’ikola bali bayegera evile y’e Yeruzalemu. Buzinda Hezekiya abwira abantu ntya: ‘Mumanye mwankayoboha. Abaashuru bagwerhe emisi, cikone Yehova arhujira rhube n’emisi kubalusha.’
Senakeribu arhuma omurhambo wage, Rabushake, e Yeruzalemu ly’aj’ishekera abantu. Oyo Rabushake ayimanga embuga z’evile anaderha ntya n’izu linene: ‘Yehova arhakamurhabala. Murhayemeraga Hezekiya amurheba. Nta mungu wakamukula omu maboko girhu.’
Hezekiya ashenga Yehova ly’amudosa ebi ashinganine ajire. Yehova ashuza ntya: ‘Orhayobohaga enyanya z’ebi oyo Rabushake anadesire. Senakeribu arharhôle evile y’e Yeruzalemu.’ Enyuma z’aho, Hezekiya ahâbwa amaruba garhenga emwa Senakeribu. Ago maruba gal’idesire ntya: ‘Mucihire omu maboko girhu. Bulya Yehova arhamuyokole.’ Hezekiya ashenga ntya: ‘Wekasinga Yehova, orhuyokole lyo ngasi muntu amanya oku wene we Mungu w’okuli.’ Yehova amubwira ntya: ‘Mwami w’e Ashuru arhaje omu Yeruzalemu. Nalanga evile yani.’
Senakeribu al’ilangalire oku omu kasanzi kasungunu arhôla evile y’e Yeruzalemu. Cikone budufu buguma, Yehova arhuma malahika muguma aha akambi k’abasoda ba Senakeribu kali embuga z’evile. Oyo malahika aniga basoda 185 000 ba Senakeribu! Mwami Senakeribu aheza abasoda bage boshi b’emisi. Nta kundi akacijijire ahanyuma n’okugaluka emwage. Yehova alanga Hezekiya n’evile y’e Yeruzalemu nk’oku analaganyagya. Ka nka wali e Yeruzalemu wakalangalire Yehova?
“Malahika wa Yehova anagwike akambi kuzunguluka abamuyoboha boshi, ananabayokole.”—Ennanga 34:7, NWT