Yosiya Al’izigire Irhegeko lya Mungu

Yosiya abaga mwami w’e Yuda erhi agwerhe myaka munani. Mw’ezo nsiku, abantu bakag’ijira eby’obukurungu banakag’iharamya ensanamu. Erhi Yosiya agwerhe myaka 16, alonza okumanya gurhi akaharamyamwo Yehova omu njira nyinja. Erhi agwerhe myaka 20, ashereza ensanamu n’amazabahu omu cihugo coshi. N’erhi Yosiya agwerhe myaka 26, arhôla emipango ly’ehekalu ya Yehova ekubulwa.

Kuhani mukulu, Hilkiya, abona ecitabu cizinge omu hekalu c’Irhegeko lya Yehova; eco citabu cizinge canaba cayandikagwa na Musa. Shafani, mwandisi wa mwami, ahekera Yosiya eco citabu cizinge anarhondera asoma Irhegeko n’izu linene. Yosiya akag’iyumvirhiza, anahugûkwa oku abantu bali bamayusa myaka minji barhali barhumikira Yehova. Mwami Yosiya abwira Hilkiya ntya: ‘Yehova agayire bwenene enyanya zirhu. Ogende omuganize. Yehova akubwira ebi rhushinganine rhujire.’ Yehova ashuza kugerera omulebi-kazi wakag’ihamagalwa Hulda. Aderha ntya: ‘Abantu b’e Yuda bandesire. Nabaha obuhane, cikone ntajire ntyo omu mango Yosiya aba ali arhegeka nka mwami, bulya acirhohize embere zani.’

Erhi Mwami Yosiya ayumva ogo mwanzi, aja ebwa hekalu anahamagala abantu b’e Yuda boshi. Enyuma z’aho asomera olubaga loshi Irhegeko lya Yehova n’izu linene. Yosiya n’abantu boshi balaganya Yehova oku bamurhumikira n’omurhima gwabo goshi.

Abantu b’e Yuda bali bamayusa myaka minji barhajira Pasaka. Cikone erhi Yosiya asoma Irhegeko liyerekine oku Pasaka ashinganine akajirwa ngasi mwaka, abwira abantu ntya: ‘Rhwajirira Yehova Pasaka.’ Buzinda Yosiya arheganya enterekêro anarhôla emipango lyo haba abimbiza oku hekalu. Enyuma z’aho abantu bajira Pasaka, buzinda bajira idinye ly’Emigati erhalimwo Lwango, lyajiraga nsiku nda. Kurhenga amango ga Samweli harhalisag’iba Pasaka oli nk’oyo. Kobinali Yosiya al’izigire Irhegeko lya Mungu. K’onashagalukire okuyiga lugenda Yehova?