Yehova Amarhuma Yeremiya ly’Aj’ihubiri

Yehova acishoga Yeremiya ly’aba mulebi. Amubwira aj’ihubiri abantu b’e Yuda anabarhonde baleke okujira ebintu bibi. Yeremiya aderha ntya: ‘Cikone Yehova, nciri mwana-rhabana. Ntamanyiri gurhi naganizamwo abantu.’ Yehova amubwira ntya: ‘Omanye wankayoboha. Nakubwira ebi waderha. Nakurhabala.’

Yehova abwira Yeremiya ahamagale abagula b’omu lugo, abere akabindi embere zabo, anaderhe ntya: ‘Yeruzalemu asherezibwa nk’oku ako kabindi kasherezibwe.’ Erhi Yeremiya ajira nk’oku Yehova aderhaga, abagula bagaya bwenene. Kuhani muguma wakag’ihamagalwa Pashuru ashurha Yeremiya anamushweka amaboko n’amagulu. Obudufu boshi, Yeremiya arhakahashire okucishaganya. Erhi buca sezi Pashuru amushwekula. Yeremiya aderha ntya: ‘Ntakacilembera ebi. Nkola naleka okuhubiri.’ Cikone, ka kobinali alesire okuhubiri? Nanga. Erhi Yeremiya ashub’irhanya bwenene lugenda oko, aderha ntya: ‘Omwanzi gwa Yehova ko guli nka muliro gundimwo. Ntakaleka okuhubiri.’ Yeremiya agendekera arhonda abantu.

Enyuma za myaka milebe, haba omwami muhyahya w’e Yuda. Bakuhani n’abalebi b’obunywesi bal’ishombire ebi Yeremiya akag’iderha. Babwira abaluzi ntya: ‘Oyu muntu ashinganine afê.’ Yeremiya aderha ntya: ‘Erhi mwakanyirha mwanaba muyisire omuntu orhagwerhi magosa. Ntaderha ebi ndonzize, nankaderha ebirhenzire emwa Yehova.’ Erhi abaluzi bayumva ntyo, baderha ntya: ‘Oyu muntu arhashinganini anigwe.’

Yeremiya agendekera ahubiri, n’abaluzi bagaya bwenene. Babwira mwami anige Yeremiya. Mwami ababwira bajire Yeremiya nk’oku balonzize. Barhôla Yeremiya bamukweba omu mwina guyunjwire bijondo banarhanya oku afîramwo. Yeremiya arhondera aholobera mw’ebyo bijondo.

Mukozi muguma wa mwami wakag’ihamagalwa Ebed-meleki, abwira mwami ntya: ‘Abaluzi bakwebire Yeremiya omu mwina! Erhi rhwakamuleka mw’ogo mwina, anafâ.’ Mwami arhegeka Ebed-meleki arhôle balume 30 bagend’ikula Yeremiya mw’ogo mwina. K’orhabwini oku rhushinganine rhuyige olwiganyo lwa Yeremiya orhayemeraga aleka akantu koshi-koshi karhume aleka okuhubiri?