Okusherezibwa kw’e Yeruzalemu

Abantu b’e Yuda bakaleka Yehova kanji-kanji, n’okuharamya bamungu b’obunywesi. Yehova ajira myaka minji ali acihangana okubarhabala. Arhuma balebi banji lyo babarhonda, cikone barhayumvagya. Lubero n’oko, bakashekera abo balebi. Gurhi Yehova ayusizemwo olo lugenzi lwabo lw’okuharamya ensanamu?

Nebukadnezari, mwami w’e Babiloni, akag’ilwisa amashanja n’okugarhôla. Erhi ahima evile y’e Yeruzalemu oburhangiriza, agwarha mpira Mwami Yehoyakini, abaluzi, abalwi b’ivita, abalume bakag’itula bintu bilebe, anabahêka e Babiloni. Anarhôla obuhirhi boshi bwali omu hekalu ya Yehova. Enyuma z’aho Nebukadnezari ajira Sedekiyasi abe mwami w’e Yuda.

Oku murhondero, Sedekiyasi akag’irhumikira Nebukadnezari. Cikone amashanja gali hofi n’abalebi b’obunywesi bahanula Sedekiyasi aleke okurhumikira mwami w’e Babiloni. Yeremiya arhonda Sedekiyasi ntya: ‘Erhi wakabula bwarhumikira oyo mwami, abantu bafâ, haba ishali n’endwala omu cihugo c’e Yuda.’

Erhi ayusa myaka munani ali arhegeka, Sedekiyasi ahiga okuleka okurhumikira mwami w’e Babiloni. Ahuna abasoda b’e Misri bamurhabale. Enyuma z’aho Nebukadnezari arhuma abasoda barhere evile y’e Yeruzalemu, banagwika akambi kuzunguluka evile yoshi. Yeremiya abwira Sedekiyasi ntya: ‘Yehova anadesire oku erhi wakacihira omu maboko ga mwami w’e Babiloni, we n’abantu b’omu vile mweshi mwanagendekera mwalama. Cikone erhi wakabula bwacihira omu maboko gage, Abababiloni bayoca eyi vile y’e Yeruzalemu n’okumushweka mweshi.’ Sedekiyasi aderha ntya: ‘Ntacihira omu maboko gage!’

Erhi hagera mwaka muguma n’enusu, abasoda b’e Babiloni barhula olukuta lw’e Yeruzalemu banaja omu vile bayiyoca yoshi. Bayoca ehekalu, baniga bantu banji, banashweka ebihumbi by’abantu.

Sedekiyasi afulumuka okunigwa e Yeruzalemu, cikone Abababiloni bamulibirhako. Bamugwarhira hofi n’e Yeriko banamuhekera Mwami Nebukadnezari. Mwami w’e Babiloni aheka Sedekiyasi hantu halebe ly’abona gurhi ali aniga abana bage. Enyuma z’aho Nebukadnezari arhula Sedekiyasi amasu anamuhira omu prizo, na buzinda Sedekiyasi afîra mw’eyo prizo. Cikone Yehova alaganya abantu b’e Yuda ntya: ‘Enyuma za myaka 70, namugalula emwinyu e Yeruzalemu.’

Bici byahikire emisole yahekagwa omu prizo e Babiloni? Ka bagendekire babêra bishwekerezi kuli Yehova?