Barhabana Bani Barhumikire Yehova

Erhi Nebukadnezari arhôla abaluzi b’e Yuda n’okubahêka e Babiloni, aha mukozi muguma wa mwami wakag’ihamagalwa Aspenazi omukolo gw’okubashibirira. Nebukadnezari abwira Aspenazi acishoge egarhi kabo abarhabana bagwerhe amagala nkana n’iranga linja. Eyo misole yakayusize myaka isharhu eli yakomerezibwa. Eyo misole yakakomerezibwe okuba bakozi b’obulagirire ba mwami w’e Babiloni. Bakayigirizibwe okusoma, okuyandika, n’okuderha olulimi lw’e Babiloni lwakag’ihamagalwa Ciakadi. Bal’ihunyirwe bakalya ebiryo biri nk’ebi mwami n’abakozi bage bakag’ilya. Egarhi k’abo barhabana hali bani bakag’ihamagalwa, Daniyeli, Hananiya, Mishaeli, na Azariya. Aspenazi abaha amazino g’e Babiloni: Belteshaza, Shadraki, Meshaki, na Abednego. K’oko kukomerezibwa kwakarhumire baleka okukolera Yehova?

Abo barhabana bani bal’ihizire okurhumikira Yehova. Bal’imanyire oku barhashinganini balye ebiryo biri nk’ebi mwami akag’ilya bulya Irhegeko lya Yehova lyal’idesire oku biguma muli byo birhal’icîre. Ntyo babwira Aspenazi ntya: ‘Wekasinga orhajaga warhuha ebiryo biri nk’ebya mwami.’ Aspenazi ababwira ntya: ‘Erhi mwakabula bwalya na mwami akabona oku muli nk’abalwazire, ananiga!’

Daniyeli apata ntanya ndebe. Abwira omuntu wakag’ibashibirira ntya: ‘Wekasinga oyuse nsiku ikumi oli warhuha ebishogo-shogo n’amishi. Enyuma z’aho orhugerere oku barhabana bali balya ebiryo biri nk’ebya mwami.’ Owakag’ibalanga ayemera.

Enyuma z’ezo nsiku ikumi, Daniyeli n’abîra bage basharhu bakabonekana bagwerhe amagala minja kulusha abandi barhabana boshi. Yehova ashagaluka okubona bamurhumikire. Anaha ciru Daniyeli obwenge bw’okuhugûkwa ebibonekerezi n’ebilorho.

Erhi abo barhabana bayusa bakomerezibwa, Aspenazi abahêka embere za Nebukadnezari. Mwami abaganiza anabona oku Daniyeli, Hananiya, Mishaeli, na Azariya bagwerhe obwenge banali masu bwenene kulusha abandi barhabana boshi. Ntyo acishoga abo barhabana bani lyo bakakolera omu nyumpa yage y’obwami. Kanji-kanji mwami akag’ibahuna amahano gayerekire ebintu by’obulagirire. Yehova abajira babe benge bwenene kulusha abalume b’obwenge ba mwami n’abakag’ijira eby’obukurungu.

Ciru akaba bali omu cihugo ca bene, Daniyeli, Hananiya, Mishaeli, na Azariya barhayibagiraga oku bali bakozi ba Yehova. Ka nawe wagendekera wabêra mwishwekerezi kuli Yehova, ciru n’amango orhali haguma n’ababusi bawe?