Esteri Amayokola Olubaga Lwage

Esteri ali munyere Muyahudi wal’ilamira omu vile y’e Suza omu Persi. Omu myaka y’embere, Nebukadnezari ahêkaga omulala gwa Esteri kurhenga e Yeruzalemu. Esteri aleragwa na muzala wage Mordekayi, wakag’ikolera Mwami Asuerusi w’e Persi.

Mwami Asuerusi al’ilonzize apate owaba Mugoli muhyahya. Abakozi bage bamulerhera abakazi b’iranga linja bwenene b’omu cihugo bahiziremwo na Esteri. Egarhi k’abo bakazi boshi mwami acishoga Esteri ly’aba mugoli. Mordekayi abwira Esteri oku arhahira ahakaderha oku aba Muyahudi.

Mulume muguma w’obucibone wakag’ihamagalwa Hamani ye wali mukulu w’abaluzi boshi. Akag’ilonza ngasi muntu yeshi amufukamire. Mordekayi alahira okujira ntyo, n’oko kwarhuma Hamani agaya bwenene, analonza okumuniga. Erhi Hamani amanya oku Mordekayi ali Muyahudi, ajira ekomplo y’okuniga Abayahudi boshi bali omu cihugo. Abwira mwami ntya: ‘Abayahudi bali bantu bagalu-galu; oshinganine obanige.’ Asuerusi aderha ntya: ‘Obajire oku wakanalonza,’ anamuha obuhashe bw’okuhiraho irhegeko. Hamani ahiraho irhegeko libwizire abantu banige Abayahudi boshi omu nsiku 13 z’omwezi gwa Adari. Yehova akag’ibona ebyakag’ijirikana.

Esteri arhamanyaga oku el’irhegeko lyahizirweho. Muli oko Mordekayi amurhumira ekopi y’el’irhegeko, anamubwira ntya: ‘Ogende oj’iganiza mwami.’ Esteri aderha ntya: ‘Ngasi muntu wakaja omunda mwami ali buzira mulali gwa mwami, ananigwa. Hakola hali nsiku 30 mwami arhandalika oku nje omunda ali! Cikone nayija. Mwami akanyerekeza akarhi kage k’obwami, nanalama, cikone akaba arhajijiri ntyo, baniga.’

Esteri aja omu ngo ya mwami. Erhi mwami abona Esteri, amuyerekeza akarhi kage k’obwami. Esteri aja emunda mwami ali, na mwami amudosa ntya: ‘Esteri, bici olonzize nkujirirage?’ Aderha ntya: ‘Nonzize nkulalike we na Hamani okw’idinye.’ Erhi bali kw’er’idinye, Esteri ashub’ibalalika oku lindi. Erhi bali okw’idinye lya kabirhi, mwami ashub’imudosa ntya: ‘Esteri, bici olonzize nkujirirage?’ Aderha ntya: ‘Hali omuntu olonzize okuniga anige n’olubaga lwani. Wekasinga orhuyokole.’ Mwami adosa ntya: ‘Indi olonzize okukuniga?’ Ashuza ntya: ‘Oyu mulume mubi Hamani.’ Asuerusi agaya bwenene anarhegeka oku Hamani anigwe ho n’aho.

Cikone, nta muntu wakavunyire irhegeko Hamani ahiragaho, ciru na mwami arhakahashire okujira ntyo. Muli ntyo mwami ajira Mordekayi abe mwimangizi w’abaluzi boshi, anamuha obuhashe bw’okuhiraho irhegeko lihyahya. Mordekayi ahiraho irhegeko lyal’iyemerire abayahudi okucihalira amango bamarherwa. Omu nsiku 13 z’omwezi gwa Adari, Abayahudi bahima abashombanyi babo. Kurhondera ago mango bakajira idinye ly’okukengera obo buhimi ngasi mwaka.