Daniyeli Ali omu Bulumba bw’Entale

Owundi mwami w’e Babiloni ali Dariyusi w’Omumedi. Dariyusi abona oku Daniyeli ali lubero n’abandi bantu. Aha Daniyeli omukolo gw’okuyimangira abantu b’obulagirire bwenene b’omu cihugo. Abo balume bayagalwa enyanya za Daniyeli banalonza okumuniga. Bal’imanyire oku Daniyeli akag’ishenga Yehova kasharhu omu lusiku, muli oko babwira Dariyusi ntya: ‘Waliha mwami, hashinganine habe irhegeko liyerekine oku ngasi muntu agwasirwe akakushenga wene. Ngasi muntu orharhumikiri ely’irhegeko ashinganine akwebwe omu bulumba bw’entale.’ Dariyusi ashagalukira ezo ntanya anayandika irhegeko liyerekine oko.

Erhi Daniyeli ayumva lugenda ely’irhegeko lihyahya, ho n’aho aja emwage. Aja embere z’idirisha ly’enyumpa yage, afukama anashenga Yehova. Abo balume bayagalagwa enyanya za Daniyeli baja omu mwa Daniyeli banamurhimana ali asalira. Balibirhira emwa Dariyusi n’okumubwira ntya: ‘Daniyeli arhali akurhumikira. Anashenge Mungu wage kasharhu omu lusiku.’ Dariyusi al’izigire Daniyeli arhanal’ilonzize Daniyeli afê. Ayusa olusiku loshi ali arhanya lugenda oku akayokolamwo Daniyeli. Cikone ciru na mwami arhakacihashire okushanja irhegeko yene asinyagya. Byahuna abwire abalume bage bakwebe Daniyeli omu bulumba bw’entale nkali.

Mw’obo budufu, Dariyusi ahangayika bwenene anabula iro enyanya za Daniyeli. Erhi buca sezi, alibirhira ebwa bulumba bw’entale anayakuza Daniyeli. Amubwira ntya: ‘Ka Mungu wawe anakuyokwire?’

Dariyusi ayumva izu. Lyal’izu lya Daniyeli! Daniyeli ashuza Dariyusi ntya: ‘Malahika wa Yehova anafunzire orhunwa rhw’entale. Zirhanyagazize ciru n’ehitya.’ Dariyusi ashagaluka bwenene! Arhegeka oku Daniyeli arhenzibwe omu bulumba bw’entale. Daniyeli arhayagalikaga ciru n’ehitya. Mwami ahana irhegeko, aderha ntya: ‘Mukwebe abalume bashobekaga Daniyeli omu bulumba bw’entale.’ Erhi abo balume bakwebwa omu bulumba bw’entale, zabashanshanyula.

Dariyusi arhumira abantu bage boshi irhegeko lidesire ntya: ‘Ngasi muntu ashinganine akarhinya Mungu wa Daniyeli. Ayokwire Daniyeli kurhenga omu bulumba bw’entale.’

K’onashenge Yehova ngasi lusiku aka Daniyeli?