Enderho Zamayandikwa oku Cibambazi

Enyuma za kasanzi kalebe, Baltazari aba mwami w’e Babiloni. Budufu buguma alalika bantu cihumbi b’obulagirire bwenene b’omu cihugo cage okw’idinye. Arhegeka abakozi bage bamulerhere ebikombe by’enoro Nebukadnezari arhôlaga omu hekalu ya Yehova. Baltazari n’abakozi bage banywera mw’ebyo bikombe banakuza bamungu babo. Ho n’aho, okuboko kw’omuntu kwabonekana kwanarhondera kwayandika enderho z’okusomeza oku cibambazi c’enyumpa bakag’iliramwo.

Baltazari ayoboha. Ahamagala abantu bage bakag’ijira eby’obukurungu anabalaganya ntya: ‘Omuntu wakahasha okuhugûla ezi nderho, namujira muntu wa kasharhu w’obuhashe bwenene omu Babiloni.’ Bajira okwabo koshi, cikone barhahashaga okuzihugûla. Buzinda omugoli ayisha anaderha ntya: ‘Hali omulume ohamagalwa Daniyeli wakag’ihugûlira Nebukadnezari ebintu. Nawe anakuhugûlira ezi nderho.’

Daniyeli aja emunda mwami ali. Baltazari amubwira ntya: ‘Okahasha okusoma ezi nderho n’okuzihugûla, nakuha olunigi lw’enoro n’okukujira muntu wa kasharhu w’obuhashe omu Babiloni.’ Daniyeli aderha ntya: ‘Obêrane engalo zawe, cikone nakubwira ebi ezi nderho zihugwîre. Sho Nebukadnezari ali wa bucibone, na Yehova amurhohya. Omanyire ebintu byamuhikiraga byoshi, cikone wamabulira Yehova obukenge omu kunywera idivayi omu bikombe by’enoro byarhengaga omu hekalu ya Yehova. Co cirhumire Mungu ayandisire ezi nderho: Mene, Mene, Tekeli, na Parsini. Ezo nderho zihugwîre oku Abamedi n’Abapersi bagwarha ecihugo ca Babiloni, orhanacibe mwami.’

Byakag’ibonekana nka nta muntu wakahimire evile y’e Babiloni. Eyo vile yal’izungulusirwe n’enkuta ndirî n’olwishi lunene. Cikone obo budufu bo n’obo, Abamedi n’Abapersi barhera eyo vile. Mwami Sirusi w’Abapersi ahabula olwishi ly’abasoda bage bayikira n’okuhika oku mihango y’eyo vile. Erhi bahika kw’eyo mihango, barhimana eri miyigule! Abo basoda baja mw’eyo vile, bayihima bananiga mwami. Enyuma z’aho, Sirusi aba murhegesi w’e Babiloni.

Erhi hagera hofi mwaka muguma, Sirusi aderha ntya: ‘Yehova ambwizire oku nyubake buhyahya ehekalu yage e Yeruzalemu. Ngasi muntu yeshi olonzize okuj’irhabala agwerhe oluhuma lw’okugenda.’ Nk’oku Yehova analaganyagya, Bayahudi banji bagaluka e Yeruzalemu erhi hagera myaka 70 kurhenga Yeruzalemu asherezibwe. Sirusi agalula ebikombe by’enoro n’eby’amarhale n’ebindi bintu Nebukadnezari arhôlaga omu hekalu. K’obwine gurhi Yehova akolesizemwo Sirusi ly’arhabala abantu bage?