Obwami Bushushanyizibwe n’Enduluma y’Omurhi

Budufu buguma, Nebukadnezari alorha ecilorho c’okuyobohya. Ahamagala abalume bage b’obwenge lyo bamuhugûlira eco cilorho. Nta muguma muli bo wahashire okumuhugûlira eco cilorho. Buzinda, Mwami aganiza Daniyeli.

Nebukadnezari abwira Daniyeli ntya: ‘Omu cilorho cani, nabwine omurhi. Gwamakula duba-duba gwamanaliha kuhika oku malunga. Abantu boshi okw’igulu bakagubwine. Gwagwerhe ebyasi binja gwanaliko malehe manji. Ensimba zakag’irhamukira omu cihoho c’ogo murhi, n’orhunyunyi rhwakag’iyubaka enyogo zarho oku mashami g’ogo murhi. Buzinda malahika muguma amarhenga emalunga. Amanayakuza ntya: “Mukube ogwo murhi, mushôshole amashami gagwo. Cikwone ecikundukundu cagwo n’emizi yagwo, mubilekere omu lubala omw’idaho, mucishwekere mw’obudagule bw’ecuma cigushe mw’amarhale. Bacihindule omurhima gurhacibâga gwa muntu, kwone gube murhima gwa nsimba, ciyorhe ntyo kuhika myaka [rhusanzi] nda egere. Ngasi muntu yeshi amanya oku Nnâmahanga ye Mwami n’oku anahe obwami ngasi yeshi alonzize.”’

Yehova afulûlira Daniyeli amahugûlo g’eco cilorho. Erhi Daniyeli ahugûkwa eco cilorho, ayoboha bwenene. Aderha ntya: ‘Yagirwa mwami, nakalonzize eci cilorho cibe ciyerekire abashombanyi bawe, cikone we ciyerekire. Enduluma y’omurhi gwakubagwa ali we. Wanyagwa obwami bwawe, onakalya ebyasi omw’ishwa nka nsimba y’emuzirhu. Cikone bulya malahika anadesire oku balekere ecikundukundu c’ogo murhi n’emizi yago omw’idaho, washubiyish’iba mwami.’

Mwaka muguma enyuma z’aho, Nebukadnezari akag’ilambagira oku cigabi c’enyanya c’enyumpa yage y’obwami, anakag’ishagalukira obwinja bw’evile y’e Babiloni. Aderha ntya: ‘Mulole eyi vile nyinja bwenene nayubakaga. Mubwine oku ndi mukulu bwenene!’ Erhi aba ali aderha, izu lyarhenga empingu lyanamubwira ntya: ‘Nebukadnezari! Wamanyagwa obwami.’

Ho n’aho, Nebukadnezari aba musirhe, anaba nka nsimba y’emuzirhu. Byahûna arhenge omu nyumpa yage y’obwami anagend’ilama haguma n’ensimba z’emuzirhu. Emviri za Nebukadnezari zalihuka nka mashala g’ikozi, n’enyunu zage zaba nka za kanyunyi.

Enyuma za myaka nda, Nebukadnezari afuma na Yehova acib’imujira mwami w’e Babiloni. Enyuma z’aho Nebukadnezari aderha ntya: ‘Yehova ahâbwe irenge, ye Mwami w’empingu. Nkolaga manyire oku Yehova ye Murhegesi. Anarhohye abantu b’obucibone, ananaha obwami ngasi muntu alonzize.’