Obwami Bwayusa Ensiku n’Amango

Budufu buguma, Mwami Nebukadnezari alorha ecilorho c’okusomeza. Eco cilorho camuhangayisa bwenene kuhika abula iro. Ahamagala abakag’ijira eby’obukurungu anababwira ntya: ‘Mumpugûlire ecilorho cani.’ Bamubwira ntya: ‘Wekasinga mwami, orhubwire ebi walosire.’ Cikone Nebukadnezari ababwira ntya: ‘Nanga! Mumbwire ebi nalosire, akaba murhajijiri ntyo nanamuniga.’ Bacib’ibwira mwami ntya: ‘Orhubwire ebi walosire, enyuma z’aho rhwanakuhugûlira byo.’ Aderha ntya: ‘Mweshi muli mwalonza okunteba. Mumbwire ebi nalosire!’ Babwira mwami ntya: ‘Nta muntu wakajira ebi oli warhubwira rhujire. Ebi ohûnyire birhankahashikana.’

Nebukadnezari agaya bwenene anarhegeka oku abantu b’obwenge boshi b’omu cihugo banigwe. Abo bantu bal’ihiziremwo Daniyeli, Shadraki, Meshaki, na Abednego. Daniyeli abwira mwami amuhe kasanzi kasungunu. Enyuma z’aho ye n’abîra bage bashenga Yehova banamuhuna oburhabale. Gurhi Yehova ajijire?

Omu cibonekerezi, Yehova ayeresa Daniyeli ecilorho ca Nebukadnezari anamumanyisa ebi cihugwire. Olusiku lwakulikiraga, Daniyeli aj’ibwira omukozi wa mwami ntya: ‘Mumanye mwakaniga abalume b’obwenge. Nanahugûlira mwami ecilorho cage.’ Oyo mukozi arhôla Daniyeli amuhêka emwa Nebukadnezari. Daniyeli abwira mwami ntya: ‘Mungu akumanyisize ebyaba omu mango gayisha. Ecilorho cawe c’eci: Wabwine ensanamu nnenene yagwerhe irhwe ly’enoro, ecifuba n’amaboko by’enfaranga, enda n’ebibero by’omulinga, amagulu g’ecuma, n’olushando lujijirwe n’ecuma ciri cicange n’ibumba. Enyuma z’aho ibuye lyarhenga oku ntondo, lyanashurha enshando z’eyo nsanamu. Eyo nsanamu yavunyunguka kaba katulo n’empusi yakayehula kulî. Elyo ibuye lyahinduka ntondo nnene yanayunjula okw’igulu lyoshi.’

Enyuma z’aho Daniyeli aderha ntya: ‘Ebi byo ecilorho cawe cihugwîre: Obwami bwawe ly’irhwe ly’enoro. Enfaranga bo bwami bwayisha enyuma zawe. Enyuma z’aho hayish’iba obwami bushushanyize omulinga bwayish’irhambula igulu lyoshi. Enyuma z’aho hayish’iba obwami buzibuhire nka cuma. Buzinda hayish’iba obwami bugabemwo, cigabi ciguma cabo cayish’iba cizubu nka cuma, n’ecindi cigabi cayish’iba cilembagusire nk’ibumba. Ibuye lyahindukaga ntondo bo Bwami bwa Mungu. Bwayish’ishereza n’okuvunyungula amami goshi, n’obo Bwami bwayish’ibêraho ensiku n’amango.’

Nebukadnezari afukama embere za Daniyeli anahira obusu bwage okw’idaho. Aderha ntya: ‘Mungu wawe anakufulûlire eci cilorho. Nta wundi Mungu oli akage.’ Ahali h’okuniga Daniyeli, Nebukadnezari amujira mukulu w’abalume boshi b’obwenge na mwimangizi w’e eneo y’e Babiloni. K’obwine gurhi Yehova ashuzizemwo isala lya Daniyeli?