Balahire Okufukamira Ensanamu

Kasanzi kasungunu enyuma za Mwami Nebukadnezari okulorha lugenda ensanamu, atula ensanamu nnene y’enoro. Ayiyimanza omu kabanda k’e Dura anahamagala abantu b’obulagirire bwenene b’omu cihugo cage, bahiziremwo, Shadraki, Meshaki, na Abednego, lyo barhimanana embere z’eyo nsanamu. Mwami arhegeka ntya: ‘Hano muyumva izu ly’emishekera, ely’ennanga, n’ely’ecinanda, mufukamire eyi nsanamu! Ngasi owankaba arhayifukamiri ho n’aho akwebwa omw’ifuru ly’omuliro.’ K’abo Bahabraniya basharhu bakafukamire eyo nsanamu, erhi bakaharamize Yehova yene?

Enyuma z’aho mwami arhegeka oku bazihe emiziki. Ngasi muntu afukama anaharamya eyo nsanamu, cikone Shadraki, Meshaki, na Abednego barhajiraga ntyo. Balume baguma na baguma babona oku abo barhabana barhajiraga ntyo banabwira mwami ntya: ‘Balya Bahabraniya basharhu balahire okuharamya ensanamu yawe.’ Nebukadnezari arhuma abantu bajibalerha, anababwira ntya: ‘Namuha eyindi nafasi y’okuharamya eyo nsanamu. Akaba murhajijiri ntyo, namukweba omw’ifuru ly’omuliro. Nta mungu yeshi-yeshi wahasha okubayokola kuli nie.’ Bashuza ntya: ‘Rhurhalonzizi orhuhe eyindi nafasi y’okuharamya ensanamu. Mungu wirhu anarhuyokola. Cikone na ciru akaba arhajijiri ntyo, Yagirwa mwami, omanye oku rhurhaharamye eyo nsanamu.’

Nebukadnezari agaya bwenene. Abwira abalume bage ntya: ‘Muyase ifuru ly’omuliro lidurhubale kali nda kulusha oku lidurhubala!’ Buzinda arhegeka abasoda bage ntya: ‘Mushweke aba balume, munabakwebe omw’ifuru!’ Er’ifuru lyal’idurhubire bwenene n’erhi abo basoda baliyegera, bafâ ho n’aho. Abo Bahabraniya basharhu barhogeramw’ogo muliro. Cikone erhi Nebukadnezari ahenguza mw’er’ifuru, abona muli balume bani bali balambagira omu muliro ahali ha balume basharhu. Ayoboha bwenene anadosa abakozi bage ntya: ‘K’arhali balume basharhu rhwakwebaga omu muliro? Mbwine bakola bali bani, na muguma muli bo ashushire malahika!’

Nebukadnezari ayegera bwenene er’ifuru ly’omuliro anayakuza ntya: ‘Muhuluke omo, mwe bakozi ba Mungu Oli Enyanya Bwenene!’ Abantu boshi basomerwa okubona oku Shadraki, Meshaki, na Abednego barhengaga omu muliro barhanayagalisiri ciru n’ehitya. Oluhu lwabo, emviri zabo, n’emishangi yabo birhahyaga, barhanakag’ibaya muliro.

Nebukadnezari aderha ntya: ‘Mungu wa Shadraki, Meshaki, na Abednego ali mukulu. Anarhumire malahika amanabayokola. Nta mungu yeshi-yeshi oli aka Mungu wabo.’

Ak’abo Bahabraniya basharhu, k’ohizire okubêra mwishwekerezi kuli Yehova ciru wakahikirwa na mazibu gahi?