ISOMO LYA 70
Bamalahika Bamayaliza Okuburhwa kwa Yezu
Sezari Ogiste, Murhegesi w’e Roma, arhegeka oku abantu boshi bagaluke emunda baburhagwa lyo bagend’iciyandikisa. Muli oko Yozefu na Mariya babalamira e Betelehemu, emunda omulala gwa Yozefu gwarhengereraga. Go ganali mango Mariya akabusiremwo.
Erhi bahika e Betelehemu, hantu haguma hone babwine bakabezire mwali omu cumpa bakag’ilikizamwo ensimba. Mwo na Mariya aburhire omugala Yezu. Amuboha omu birere anagend’imugwishiza omu combo bakag’ilikizamwo ensimba.
Hofi n’e Betelehemu, bangere baguma na baguma bakag’ilala embuga bali balanga obuso bwabo. Ho n’aho, malahika muguma ayimanga embere zabo banabona obulangashane bw’irenge lya Yehova. Abo bangere bayoboha, cikone malahika aderha ntya: ‘Mumanye mwankayoboha. Mmudwirhire omwanzi mwinja bwenene. Ene Masiya anabusirwe e Betelehemu.’ Ho n’aho, bamalahika banji babonekana omu malunga, banaderha ntya: ‘Mungu ahâbwe irenge empingu, n’okw’igulu kube omurhûla.’ Enyuma z’aho abo bamalahika bahera. Gurhi abo bangere bajijire?
Abo bangere babwirana ntya: ‘Rhuje e Betelehemu bo na buno.’ Bagenda duba-duba banarhimana Yozefu na Mariya bali omu nyumpa balikizamwo ensimba banagwerhe akabonjo kabo.
Ngasi muntu wakag’iyumva ebi malahika anabwizire abo bangere akasomerwa. Mariya arhanya bwenene oku nderho za malahika arhanaziyibagiraga ciru n’ehitya. Abo bangere bagaluka ebwa buso bwabo, banavuga Yehova omunkwa enyanya z’ebi babwine n’ebi bayumvirhe.
‘Emwa Nyamuzinda narhengaga. Arhali niene nacidwirhe, ci ye wantumaga.’—Yowane 8:42