Yehova Alanzire Yezu

Omu cihugo ciguma c’ebushoshokero bw’izuba bw’e Israheli mwali abantu bal’iyemire oku enyenyezi zanabalongoza. Budufu buguma, balume baguma b’Ebushoshokero bw’Izuba babona enyenyezi yakag’ilangala bwenene omu malunga, banayikulikira. Eyo “nyenyezi” yabahisa e Yeruzalemu. Abo balume barhondera okudosa abantu ntya: ‘Ngahi omwana wayish’iba mwami w’Abayahudi ali? Rhuyishire lyo rhumufukamira.’

Erhi Herodi, mwami w’e Yeruzalemu, ayumva lugenda oyo mwami muhyahya, ayoboha bwenene. Adosa abakulu ba bakuhani ntya: ‘Ngahi oyu mwami ashinganine aburhirwe?’ Bamushuza ntya: ‘Abalebi badesire oku ashinganine aburhirwe e Betelehemu.’ Muli oko Herodi ahamagala balya balume b’Ebushoshokero bw’Izuba anababwira ntya: ‘Muje e Betelehemu mulonze oyo mwana. Muyish’igaluka mumbwire ngahi ali. Nani nnonzize nj’imufukamira.’ Cikone obo bwali bunywesi.

Elya “nyenyezi” yacib’irhondera yagenda. Abo balume bayikulikira kuhika e Betelehemu. Eyo “nyenyezi” yayimanga enyanya za nyumpa nguma n’abo balume baja mw’eyo nyumpa. Barhimanamwo Yezu na nnina, Mariya. Bafukamira oyo mwana banamuha enoro, enshangi n’obuku. Ka Yehova ye warhumaga abo balume lyo barhimanana na Yezu? Nanga.

Mw’obo budufu, Yehova abwira Yozefu ntya omu cilorho: ‘Herodi alonzize okuniga Yezu. Orhôle mukawe na mugala wawe muyakire e Misri. Mubêre yo kuhika amango namubwira oku hakola hali obulanzi, mwanagaluka.’ Ho n’aho, Yozefu n’omulala gwage baja e Misri.

Yehova ali abwizire balya balume b’Ebushoshokero bw’Izuba oku barhagalukaga emwa Herodi. Erhi Herodi ahugûkwa oku abo balume barhacigalusire, akunira bwenene. Bulya Herodi arhakacibwine Yezu, ahâna irhegeko oku abana-rhabana boshi b’e Betelehemu bayumanine na Yezu banigwe. Cikone Yezu yehe ali omu bulanzi e Misri.

Enyuma za kasanzi kalebe, Herodi afâ. Yehova abwira Yozefu ntya: ‘Mwanagalukaga bulya nta mazibu gacihali.’ Yozefu, Mariya, na Yezu bagaluka e Israheli, banarhondera okulama omu vile y’e Nazareti.