Erhi Yezu Agwerhe Myaka 12

Yozefu na Mariya bal’ilamire e Nazareti haguma na Yezu n’abandi bagala babo na bali babo. Yozefu akag’ihikiriza amalagirire g’omulala gwage kugerera omukolo akag’ijira gw’okubinja, anakag’iyigiriza omulala gwage lugenda Yehova n’Irhegeko lyage. Ogo mulala gwakag’ija ngasi mango oku sinagogi lyo guharamya Mungu, gwanakag’ija e Yeruzalemu ngasi mwaka oku lusiku lukulu lwa Pasaka.

Erhi Yezu agwerhe myaka 12, omulala gwage gwajira omubalamo mulî gw’okuja e Yeruzalemu nk’oku gwanayorhaga gujira. Evile y’e Yeruzalemu yalimwo bantu banji bayishaga oku lusiku lukulu lwa Pasaka. Buzinda, Yozefu na Mariya barhondera bagaluka emwabo, banarhanya oku Yezu ali omu cigusho c’abantu bakag’ibalama haguma nabo. Cikone erhi bamulonza egarhi k’abantu b’omu mulala gwabo, barhamubonaga.

Bagaluka e Yeruzalemu, banayusa nsiku isharhu zoshi bali balonza mugala wabo. Enyuma z’aho, baja omu hekalu. Barhimanamwo Yezu atamire egarhi k’abalimu, ali abayumvirhiza bwinja n’okubadosa amadoso g’obulagirire. Abo balimu basomerwa bwenene enyanya za Yezu banarhondera bamudosa amadoso. Banakag’isomerwa bwenene enyanya z’amashuzo akag’ibaha. Babona oku al’ihugûsirwe Irhegeko lya Yehova.

Yozefu na Mariya bal’ihangayisire bwenene. Mariya aderha ntya: ‘We mwana, rhwakulonzize ngasi hoshi! Ngahi wali?’ Yezu aderha ntya: ‘Ka murhal’imanyire oku nshinganine mbe hano omu nyumpa ya Larha?’

Yezu agaluka emwabo e Nazareti haguma n’ababusi bage. Yozefu ayigiriza Yezu omukolo gw’okubinja. Gurhi orhanyize Yezu al’iyosire erhi ali musole? Erhi Yezu ali akula, agendekera aba na bwenge bunji n’okuyemerwa na Mungu n’abantu.