Yezu Amayigiriza Abanafunzi Bage Okusalira

Ngasi kantu Abafarizeyi bakag’ijira bakag’ilonza okuciyerekana. N’erhi bakajijire akantu kinja, bakag’ilonza abantu bababone. Bakag’isalirira aha nafasi y’abantu banji lyo ngasi muntu ababona. Abafarizeyi bakag’ibikirira amasala malîri omu bukengere banakag’igagalukira-galukira amango bali omu masinagogi n’amango bali omu mabarabara ly’abandi bantu babayumva. Ntyo abantu basomerwa bwenene erhi Yezu ababwira ntya: ‘Murhakag’ishenga ak’Abafarizeyi. Banarhanye oku Mungu asomerwa enyanya z’enderho zabo nyinji, cikone Mungu arhasomerwa enyanya z’ebyo. Isala ziba nshambalo egarhi k’omuntu na Yehova. Orhakag’igalukira zilya nderho zo na zilya amango oli washenga. Yehova aba alonzize omubwire gurhi oli waciyumva ekandalala.

‘Alagi oku mwakashenga: “Larha, oli omu mpingu, izino lyawe likuzibwe, Obwami bwawe buyishe, Obulonza bwawe bube en’igulu nk’empingu.”’ Na kandi Yezu ababwizire bakashenga lyo bapata ebiryo bya ngasi lusiku, lyo bababalirwa ebyaha byabo, na lugenda agandi mazibu gabo.

Yezu aderha ntya: ‘Mukashenga burhahusa. Mugendekere mwakahûna Sho Yehova, ebintu binja. Ngasi mubusi aba alonzize ahe omwana wage ebintu binja. K’erhi mugala wawe akakuhûna omugati, wanamuha ibuye? Erhi akakuhûna ensamaki, ka wanamuha enjoka?’

Enyuma z’aho Yezu abahugûlira isomo ly’obulagirire: ‘Erhi akaba muba mumanyire okuha abana binyu engalo nyinja, ka Sho Yehova, arhamuhe kulusha iroho lyage litagatifu? Mushinganine mukamuhûna kone.’ K’onakolese er’ihano lya Yezu? Bintu bihi okahira omu masala gawe?