Amahubiri g’oku Ntondo

Erhi Yezu ayus’icishoga entumwa zage 12, ayandagala oku ntondo ahika aha bantu banji bali. Abo bantu barhengaga e Galilaya, e Yudeya, e Tiro, e Sidoni, e Siriya, n’olundi lunda lw’e Yordani. Balerha abantu bal’ilwazire n’abakag’ilibuzibwa n’abazimu. Yezu abafumya boshi. Enyuma z’aho ashub’isoka hitya oku ntondo atamala anabayigiriza. Ahugûla ebi rhushinganine rhujire erhi akaba rhulonzize rhube bîra ba Mungu. Rhushinganine rhuhugûkwe oku rhulagirire oku burhabale bwa Yehova n’okumuzigira. Cikone rhurhakazigira Mungu erhi akaba rhurhaba rhuzigire abandi bantu. Rhushinganine rhube binja na ba lukogo kuli ngasi muntu, ciru n’oku bashombanyi birhu.

Yezu aderha ntya: ‘Arhali abîra binyu bone mushinganine mukazigira. Kandi mushinganine mukazigira n’abashombanyi binyu n’okubabalira abantu kurhenga oku murhima. Erhi wakagayisa muntu mulebe, oshinganine ajimubona ho n’aho, n’okumuhûna obonjo. Okajirira abandi nk’oku wakalonza na nawe bakujirire.’

Kandi Yezu ahîre abantu amahano minja oku biyerekire ebintu by’omubiri. Aderha ntya: ‘Okuba bîra ba Yehova ko kw’obulagirire bwenene kulusha okuba na nsaranga nyinji. Ecishambo canazimba ensaranga zawe, cikone nta muntu ciru n’omuguma wakazimba obwîra bwawe haguma na Yehova. Murhakag’icilibuza lugenda ebi mwalya, ebi mwanywa, erhi ebi mwayambala. Mulabirize orhunyunyi. Ensiku zoshi Mungu anahe orhunyunyi ebi rhwalya. Okucilibuza lugenda ebintu by’omubiri kurhakayushula ciru lusiku luguma oku bulî bw’akalamo kirhu. Okakengera oku Yehova aba amanyire ebi olagirireko.’

Nta lusiku abo bantu balisag’iyumva owundi muntu waderha aka Yezu. Abakulu babo b’amadîni barhalisag’ibayigiriza enyigirizo za ntyo ciru n’ehitya. Bici byarhumaga Yezu aba mwigiriza mukulu ntyo? Bulya ngasi kantu akag’ikayigiriza kakag’irhenga emwa Yehova.