Yezu Amacishoga Ntumwa Ikumi n’Ibirhi

Erhi Yezu ayusa hofi mwaka muguma n’enusu ali ahubiri, aba n’omuhigo gw’obulagirire gw’okurhôla. Ba ndi akacishozire lyo bakola haguma naye? Ba ndi akakomerezize lyo balongoza ecigamba c’Ecikristu? Yezu al’ilagirire oku burhabale bwa Yehova ly’arhôla eyo mihigo. Muli oko aja oku ntondo aha akabire yene, anayusa obudufu boshi ali asalira. Erhi buca sezi, Yezu ahamagala abanafunzi bage boshi anacishogamwo ntumwa 12. K’omanyire amazino gabo? Egarhi k’ezo ntumwa zage hali Petro, Andreya, Yakobo, Yowane, Filipo, Bartolomayo, Tomasi, Mateyo, Yakobo mwene Alufayo, Tadeyo, Simoni, Yuda Iskariyoti.

Ezo Ntumwa 12 zakajire zakabalama haguma naye. Erhi Yezu ayus’izikomereza azirhuma lyo zikahubiri zone. Yehova aha ezo ntumwa obuhashe bw’okufukuza abazimu n’okufumya abantu balwazire.

Yezu adesire oku ezo Ntumwa zage 12 bali bîra bage, anakag’ibalangalira. Abafarizeyi bakag’irhanya oku ezo ntumwa bali bantu barhasomaga na ba busha-busha. Cikone Yezu akomereza ezo ntumwa lugenda omukolo gwazo. Ezo ntumwa zabezire haguma na Yezu omu kasanzi k’obulagirire bwenene k’akalamo kage, nk’embere z’okufâ kwage n’enyuma z’okufûka kwage. Aka Yezu, banji egarhi k’ezo Ntumwa 12 bali b’e Galilaya. Baguma na baguma muli bo bagwerhe abakazi.

Entumwa bali bantu barhali bimana banakag’ijira amagosa. Hali amango bakag’iderha buzira kurhanya n’okurhôla emihigo mibi. Hali amango bakag’ibula bwaba ba kulembera. Hali ciru n’amango bajire kadali lyo bamanya indi wali w’obulagirire bwenene egarhi kabo. Cikone bali bantu binja bal’izigire Yehova. Bo babire musingi gw’ecigamba c’Ecikristu enyuma za Yezu okugaluka empingu.