Yezu Amajira Bisomerine Binji

Yezu ayishaga hanw’igulu ly’ayaliza omwanzi mwinja gw’Obwami bwa Mungu. Ly’ayerekana ebi Yezu ayish’ijira amango aba ali Mwami, Yehova amuhîre iroho litagatifu ly’ajira ebisomerine. Afumize ngasi bulwala. Ngasi hoshi akag’ija, abantu balwazire bakag’imushimba ly’abarhabala, ananakag’ibafumya boshi. Afumize emihurha, ebihuli, ebirema, anakuzire abantu kw’abazimu. Ciru n’erhi bakahumire oku cishumiro c’omushangi gwage cone, bakag’ifuma. Abantu bakag’ishimba Yezu ngasi aha akag’ija. Ciru n’omu kasanzi akag’ilonza abe yene omu kahwenyenye, arhakag’ilekerera abantu.

Mango maguma, abantu balerha omuntu ohozire ebirumbu omu nyumpa Yezu alimwo. Cikone abo bantu barhahashaga okuhisa oyo muntu mw’eyo nyumpa bulya yali yunjwiremwo abantu. Ntyo barhula omurhule omu cigabi c’enyanya c’eyo nyumpa bamugerezamwo bamuhisa aha Yezu ali. Enyuma z’aho Yezu abwira oyo mulume ntya: ‘Yimuka onalambagire.’ Erhi oyo mulume ajira ntyo, abantu basomerwa bwenene.

Agandi mango erhi Yezu aja omu lugo, balume ikumi bal’ilwazire olushomyo bayimanga banakaderha ntya n’izu linenene: ‘Yezu, orhurhabale!’ Mw’ago mango, abantu balwazire olushomyo barhal’iyemerirwe okuyegerera abandi bantu. Yezu abwira abo balume baje ebwa hekalu nk’oku Irhegeko lya Yehova lyal’idesire abantu balwazire olushomyo bashinganine bajire enyuma z’okufuma. Erhi baba bali omu njira y’okuja ebwa hekalu, bafuma. Erhi muguma muli abo balume bal’ilwazire olushomyo ahugûkwa oku anafumire, agaluka emunda Yezu ali ly’amuvuga omunkwa anakuza Mungu. Egarhi k’abo balume ikumi boshi, oyo muguma yene wavuzire Yezu omunkwa.

Mukazi muguma ali amayusa myaka 12 alwazire, arhanal’icilangalire oku anacifume. Erhi Yezu aba ali omu kagarhi ka bantu banji, oyo mukazi ayisha enyuma zage anahuma oku cishumiro c’omushangi gwage. Ho n’aho, oyo mukazi afuma. Erhi oko kuba, Yezu adosa ntya: “Indi wampumireko?” Oyo mukazi ayoboha bwenene, cikone ayegera Yezu anamubwira okuli. Yezu amurhuliriza omu kuderha ntya: ‘Mwali wani, ogende n’omurhûla.’

Mukulu muguma w’esinagogi wakag’ihamagalwa Yayiro ahûna Yezu ntya: ‘Oyishe emwani! Mwali wani murho alwazire bwenene.’ Cikone embere Yezu aje emwa Yayiro, oyo mwana-nyere afâ. Erhi Yezu ahika emwa Yayiro, abona bantu banji bal’iyishir’irhuliriza ogo mulala. Yezu ababwira ntya: ‘Mumanye mwankalaka; agwishire kone.’ Buzinda agwarha okuboko kw’oyo mwana-nyere anaderha ntya: “We mwana, zuka!” Ho n’aho oyo mwana-nyere azuka, na Yezu abwira ababusi bage bamuhe ebiryo. Orhanye gurhi ababusi bage baciyumvirhe!